00:00:00 IGIHE NETWORK KN KINYARWANDA EN ENGLISH FR FRANCAIS

Ibyaha 10 bizahaje Umuryango Nyarwanda kurusha ibindi

Yanditswe na Muhonzire Sylvine
Kuya 8 Nyakanga 2021 saa 02:39
Yasuwe :
0 0

Kimwe mu byo abiga amategeko babwirwa bwa mbere, ni uko nta sosiyete itarangwamo icyaha ku Isi, nta n’iyitezwe keretse ahari muri ya paradizo nka bimwe tubwirwa n’abizera Imana.

Mu gihe tutaragerayo rero turi mu Rwanda, kandi si paradizo ari na yo mpamvu rufite amategeko ahana ibyaha kuko bihari, kugira ngo ababikora babibazwe nibura turebe ko twagira sosiyete nziza ikorerwamo ibyaha bicye.

Imibare y’Ikigo cy’Igihugu cy’Ibarurishamibare, NISR, igaragaza ko mu 2010, icyaha cyo kwica ari cyo cyari ku mwanya wa mbere mu byaha icumi bya mbere byiganje kuruta ibindi mu Rwanda, mu gihe mu 2018, kitari no mu 10 bya mbere.

Muri Raporo y’iki kigo yo mu 2020, hagaragaramo ibyaha 10 byasaritse Umuryango Nyarwanda kurusha ibindi kuva mu 2015 kugera mu 2018.

1. Ubujura

Icyaha cyo kwiba ni cyo cyaha cyiganje cyane mu Rwanda kuruta ibindi kuva mu 2015 kugera 2018, kuko muri iyo myaka ine yose habonetse ibyaha 24.526.

Uko imyaka yagendaga yisunika, ibyaha by’ubujura byagendaga byiyongera kuko mu 2015, habonetse ibyaha 3.052 mu mwaka wakurikiye haboneka 2.580, mu 2017 bigera ku 8.502 mu gihe mu 2018 habonetse ibigera ku 10.392.

Intara y’Uburengerazuba ni yo yabonetsemo ibyaha byinshi by’ubujura mu 2018 na 2019, aho habonetse ibigera 4.655, ikurikirwa n’Umujyi wa Kigali wagize ibyaha 3.850, mu gihe Intara y’Amajyaruguru yari yabonetsemo 1.966, ari na yo yagize bicye.

Iki cyaha gihanwa n’ingingo ya 166 y’itegeko Nº68/2018 ryo ku wa 30/08/2018. Uwahamwe na cyo ahanishwa igifungo kitari munsi y’umwaka umwe ariko kitarenze imyaka ibiri, ihazabu y’amafaranga y’u Rwanda atari munsi ya 1.000.000 Frw ariko atarenze 2.000.000 Frw, imirimo y’inyungu rusange mu gihe cy’amezi atandatu cyangwa kimwe gusa muri ibyo bihano.

Gusa iki gihano gishobora guhinduka bitewe n’icyo uwibye yakoresheje, aho yibye n’ibyo yibye.

2. Gukubita cyangwa gukomeretsa umuntu

Si abantu bose bazi ko gukubita umuntu cyangwa kumukomeretsa ari icyaha gihanwa n’amategeko y’u Rwanda, nyamara kiri mu byaha byakozwe n’abantu benshi dore ko mu myaka ine hagaragaye ibyaha 21.547. Muri byo 3.073 byatewe n’amakimbirane yo mu ngo.

Mu 2015 habonetse ibigera 4.063, mu gihe mu 2016 byiyongereye bikaba 4.371, mu 2017 nabwo birazamuka biba 5.665 ndetse no mu 2018 biba 7.448. Byinshi muri ibi byaha biterwa no kutumvikana hagati y’abantu ndetse n’ibikorwa by’urugomo.

Mu 2018 na 2019, ibyaha byinshi byabonetse mu Ntara y’Uburengerazuba yagize ibyaha 5.551, Umujyi wa Kigali urakurikira n’ibyaha 4.964, Intara y’Amajyepfo iza ku mwanya wa Gatatu, aho yagaragayemo ibyaha 4.545, igakurikirwa n’Intara y’Uburengerazuba yagize 3.358, naho iyagaragayemo bike ni iy’Amajyaruguru yabonetsemo ibyaha 2.988.

Iki cyaha cyo gihanwa n’ingingo ya 121 y’itegeko Nº68/2018 ryo ku wa 30/08/2018 riteganya ibyaha n’ibihano muri rusange. Iri tegeko riteganya ko uwo gihamye ahanishwa igifungo kitari munsi y’imyaka itatu ariko kitarenze imyaka itanu n’ihazabu y’amafaranga y’u Rwanda atari munsi 500.000 Frw ariko atarenze 1.000.000 Frw.

3. Gukoresha ibiyobyabwenge

Kunywa cyangwa gukoresha ibiyobyabwenge ni icyaha gikunda kumvikana cyane nubwo benshi batemeranya n’itegeko rigishyiriraho ibihano. Gusa usanga abanyweye ibyo biyobyabwenge ari bo biganje mu bikorwa by’urugomo, kwiba ndetse n’ibindi.

Iki cyaha ni icya gatatu mu byaha byiganje kuko kuva mu 2015 kugera mu 2018, ibi byaha byabaye 17.305, gusa byagiye byiyongera buri mwaka kuko mu 2015 byari 3.992, ukurikiyeho biriyongera biba 4.059, mu 2016 bigera kuri 4.250, naho mu 2017 birazamuka bigera ku 5004.

Umujyi wa Kigali n’Intara y’Uburengerazuba niho hagaragaye umubare munini w’abantu bakoresheje ibiyobyabwenge mu 2018 na 2019, mu gihe iy’Uburasirazuba ariyo yagaragayemo umubare muto w’abantu bakoresha ibiyobyabwenge.

Kunywa ibiyobyabwenge cyangwa urusobe rw’imiti ikoreshwa nka byo bihanwa n’ingingo ya 263 y’itegeko Nº68/2018 ryo ku wa 30/08/2018. Uwahamwe na byo ahanishwa igifungo kitari munsi y’umwaka umwe ariko kitarenze imyaka ibiri cyangwa imirimo y’inyungu rusange.

Uwafashwe abihinga, abicuruza cyangwa akora ibisa na byo ahanishwa igifungo kitari munsi y’imyaka 20 ariko kitarenze imyaka 25 n’ihazabu y’amafaranga y’u Rwanda atari munsi ya 15.000.000 Frw ariko atarenze 20.000.000 Frw kubyerekeye ibiyobyabwenge bikomeye.

4. Gusambanya abana

Iki ni icyaha cyaje ku mwanya wa kane mu byugarije Umuryango Nyarwanda kuva mu 2015 kugeza mu 2018 ndetse n’ingaruka zacyo zikunda kugaragarira mu bwiyongere bw’imibare y’abana baterwa inda bari munsi y’imyaka 18.

Ubushakashatsi bwa Minisiteri y’Uburinganire n’Iterambere ry’Umuryango bwagaragaje ko kuva mu 2016 Kugeza mu 2018, abana 70.614 batewe inda.

Abasambanyije abana bose si ko bafatwa ngo bahanwe, ni yo mpamvu mu myaka ine kuva 2015 kugeza 2018 habonetse ibyaha 8.594, mu 2019 haboneka ibisaga 3.600, ari na wo mwaka wabonetsemo ibyaha byinshi kurusha indi myaka.

Mu 2018 na 2019, Intara y’Uburasirazuba yagaragayemo imibare myinshi y’abakoze iki cyaha kuko habonetse ibyaha 1.930, iy’Amajyepfo hagaragaramo 1,097, Umujyi wa Kigali haboneka 990, Uburengerazuba biba 875 mu gihe Amajyaruguru yabonetsemo 825.

Gusambanya umwana bihanwa n’ingingo ya 133 y’itegeko Nº68/2018 ryo ku wa 30/08/2018. Uwahamwe na byo ahanishwa igifungo cy’imyaka 20 ariko kitarenze 25. Iyo asambanyije uri munsi y’imyaka 14 ahanishwa igihano cya burundu kimwe n’iyo asambanyije urengeje 14 akamutera uburwayi budakira cyangwa ubumuga na bwo ahanishwa igihano cya burundu.

5. Kwihesha ikintu cy’undi hakoreshejwe uburiganya

Ibi byaha na byo byaje mu icumi bya mbere byakozwe mu Rwanda kuko biri ku mwanya wa Gatanu mu byiganje kuva mu 2015 kugeza 2018, aho habonetse ibigera ku 2.989.

Mu 2015 iki cyaha cyaje ku mwanya wa cyenda mu byaha byiganje mu Rwanda kuko byari 357, mu gihe mu 2018 cyaje ku mwanya wa gatandatu aho habonetse ibigera ku 1.056.

Ibi byaha bikunze kugaragara mu bacuruzi cyane ndetse no mu bashoferi batwara amakamyo aho babikora bagamije kubikuramo inyungu nyinshi cyangwa se bakinjiza ibicuruzwa bitemewe mu Rwanda, rimwe na rimwe bitujuje ubuziranenge.

Ibi byaha byiganje cyane mu Mujyi wa Kigali, aho mu 2018 na 2019 habonetse ibigera ku 1004. Intara y’Uburasirazuba niyo yakurikiye n’ibyaha 322, mu gihe iyabonetsemo ibyaha bike ari Intara y’Amajyaruguru yagize 165.

Iki cyaha gihanishwa ingingo ya 174 y’itegeko Nº68/2018 ryo ku wa 30/08/2018. Uhamijwe iki cyaha ahanishwa igifungo kitari munsi y’imyaka ibiri ariko kitarenze imyaka itatu n’ihazabu y’amafaranga y’u Rwanda atari munsi ya 3.000.000 Frw ariko atarenze 5.000.000 Frw.

Gusa iyo byerekeranye n’amafaranga, igihano kiriyongera igifungo kikaba imyaka itari munsi itatu ariko itarenze imyaka itanu n’ihazabu y’amafaranga y’u Rwanda arenze 5.000.000 Frw ariko atarenze 7.000.000 Frw.

6. Guhozanya ku nkeke hagati y’abashakanye

Hagati y’abashakanye hagiye hagaragara umugabo uhohotera umugore we cyangwa umugore wahohoteye umugabo ndetse kuva mu 2015 kugeza mu 2018 hagaragagaye ibyaha nk’ibi 2.564.

Mu 2019, umubare w’ibi byaha byabonetse wari 2.105, hafi umubare w’ibyagaragaraye mu myaka ine yose. Mu 2015 hari hagaragaye ibyaha 394 gusa ariko mu 2018 bigera kuri 967.

Ihohoterwa cyangwa guhoza ku nkeke uwo bashakanye ni kimwe mu byaha biterwa n’amakimbirane yo muryango aterwa n’impamvu nyinshi zirimo ubusinzi, gucana inyuma, kutumvikana ku mitungo, agasuguro n’ibindi.

NISR igaragaza ko mu 2018 na 2019 ibyaha by’ihohoterwa hagati y’abashakanye byinshi byagaragaye mu Ntara y’Amajyepfo kuko hagaragaye ibigera kuri 739 mu gihe ahagaragaye bike ari mu Mujyi wa Kigali habonetse 524.

Iki cyaha gihanishwa ingingo ya 147 y’itegeko Nº68/2018 ryo ku wa 30/08/2018 riteganya ibyaha n’ibihano muri rusange. Uhamwe na cyo ahanishwa igifungo kitari munsi y’umwaka umwe ariko kitarenze imyaka ibiri.

7. Gukoresha ibikangisho

Icyaha cyo gukoresha ibikangisho na cyo kiri mu byaha byiganje mu Muryango Nyarwanda kuko imibare ya NISR yerekana ko kuva mu 2015 kugeza mu 2018 habonetse ibigera ku 2.084.

Umujyi wa Kigali ni wo wagaragayemo ibi byaha byinshi mu 2018 na 2019, kuko hagaragaye ibigera kuri 878, ukurikirwa n’Intara y’Amajyepfo yagaragaweho 876, mu gihe Intara yabonetsemo bike ari iy’Amajyaruguru yagaragayemo 460.

Amategeko y’u Rwanda ateganya ko umuntu wese ukoresha ibikangisho agamije kugirira nabi undi, byaba mu magambo, mu marenga, mu bimenyetso, mu mashusho cyangwa mu nyandiko aba akoze icyaha. Iyo agihamijwe, ahanwa n’ingingo ya 128 y’itegeko Nº68/2018 ryo ku wa 30/08/2018.

Ugihamijwe n’urukiko ahanishwa igifungo kitari munsi y’umwaka umwe ariko kitarenze imyaka ibiri n’ihazabu y’amafaranga y’u Rwanda atari munsi 300.000 Frw ariko atarenze 500.000 Frw.

8. Guhimba inyandiko

Guhimba inyandiko, kuyihindura cyangwa kuyikoresha iriho umukono cyangwa igikumwe bitari byo, ni kimwe mu bintu bikunze kuragara cyane hano mu Rwanda nubwo bitari ku rwego rwo hejuru.

Mu byaha icumi bya mbere byagiye bigaragara buri mwaka, icyaha cyo guhimba cyangwa gukoresha inyandiko mpimbano cyagaragaye cyane mu 2015, 2016 na 2017, naho mu 2018 ndetse na 2019 ntikigeze kiza mu byaha byakozwe cyane. Muri iyo myaka itatu yose habonetse ibigera ku 1.831.

Iki cyaha gihanwa n’ingingo ya 276 y’itegeko Nº68/2018 ryo ku wa 30/08/2018 riteganya ibyaha n’ibihano muri rusange. Uhamwe na cyo ahanishwa igifungo kitari munsi y’imyaka itanu ariko kitarenze imyaka irindwi n’ihazabu y’amafaranga y’u Rwanda atari munsi ya 3.000.000 Frw ariko atarenga 5.000.000 Frw cyangwa kimwe gusa muri ibyo bihano.

Iyo guhimba inyandiko byakozwe n’umukozi wa Leta mu murimo ashinzwe cyangwa n’undi ushinzwe umurimo w’igihugu, igihano kiba igifungo kitari munsi y’imyaka irindwi ariko kitarenze imyaka icumi n’ihazabu y’amafaranga y’u Rwanda atari munsi ya 2.000.000 Frw ariko atarenze 3.000.000 Frw cyangwa kimwe gusa muri ibyo bihano.

9. Ubuhemu

Ubuhemu ni icyaha kirangwa no kuba umuntu yakwigarurira ikintu yahawe cyangwa yarindishijwe, kuba yakirigisa, kugitagaguza cyangwa kugiha undi muntu.

Iki cyaha kiri mu byaha 10 bya mbere byakozwe mu Rwanda. Gusa cyagaragaye mu 2017 mu byaha byakozwe cyane kuva mu 2015 kugeza mu 2018, aho hagabonetse ibigera kuri 790.

Iyo hari ugihamijwe n’urukiko ahanishwa igifungo kitari munsi y’imyaka itatu ariko kitarenze imyaka itanu n’ihazabu y’amafaranga y’u Rwanda atari munsi ya 500.000 Frw ariko atarenze 1.000.000 Frw, nkuko biteganywa n’ingingo ya 176 yo y’itegeko Nº68/2018 ryo ku wa 30/08/2018.

10. Kwigana cyangwa guhimba amafaranga

Kwigana cyangwa guhindura ibiceri cyangwa inote by’amafaranga akoreshwa mu Rwanda, ni icyaha cyaje ku mwanya wa 10 mu byugarije Umuryango Nyarwanda guhera mu 2015 kugeza mu 2018 kuko habonetse ibigera kuri 679.

Ibi byaha byaje mu 10 bya mbere byiganje mu 2015 ndetse na 2016 naho mu yindi myaka yakurikiyeho ntikigeze kiza mu byaha byakozwe cyane.

Mu gitabo cy’amategeko ahana y’u Rwanda, harimo ko uwakoze icyaha cyo kwigana cyangwa guhindura amafaranga akoreshwa mu Rwanda, kuyazana cyangwa kuyakwiza mu Rwanda, iyo abihamijwe n’urukiko ahanishwa igifungo kitari y’imyaka itanu ariko kitarenze imyaka irindwi.

Iyo gikozwe ku rwego mpuzamahanga, igihano kiba igifungo kitari munsi y’imyaka irindwi ariko kitarenze imyaka 10 n’ihazabu y’amafaranga y’u Rwanda atari munsi ya 7.000.000 Frw ariko atarenze 10.000.000 Frw.

Uwayakiriye abizi neza ko ari amahimbano, niyo yaba atarayazanye cyangwa atarayakoze, agahamwa nabyo, ahanishwa igihano cy’igifungo kitari munsi y’umwaka umwe ariko kitarenze imyaka itatu.

Uretse ibi byaha 10 byiganje cyane mu Rwanda kuva mu 2015 kugeza mu 2018, hari ibindi byagiye bigaragara cyane mu bihe binyuranye birimo gukoresha ‘Cheque’ itazigamiye, guhakana no gupfobya Jenoside yakorewe Abatutsi, ruswa, kurigisa cyangwa kugwatiriza ibintu by’abandi.

Umujyi wa Kigali niwo wagaragayemo ibyaha byinshi kuva mu 2015 kugeza mu 2018 kuko hagaragaye ibigera ku 31.866, ukurikirwa n’Intara y’Iburasirazuba yabonetsemo 26.960, iy’Amajyepfo igira ibyaha 19.797, iy’Uburengerazuba igira 17.383, iyagize ibyaha bike ni iy’Amajyaruguru yagaragawemo 15.344.

Uko imibare y'abakoze ibyaha yari ihagaze hagati ya 2015 na 2018
Gukubita no gukomeretsa nibyo byaje ku mwanya wa mbere mu byaha byakozwe mu 2015
Ibyaha bitanu bya mbere byakozwe mu 2016
Ibyaha bitanu byakozwe cyane mu 2017
Icyaha cy'ubujura cyayoboye ibindi mu byaha byakozwe mu 2018

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .