Ibya Coup d’Etat yateguriwe Habyarimana mu 1980 ikaburizwamo

Yanditswe na Ferdinand Maniraguha
Kuya 14 Ugushyingo 2018 saa 11:18
Yasuwe :
0 0

Burya koko ngo hazima uwatse, hakangana abakundanye!. Kuwa 5 Nyakanga 1973 byari ibyishimo kuri Habyarimana Juvénal, Théoneste Lizinde, Alexis Kanyarengwe na bagenzi babo nyuma yo guhirika ubutegetsi bwa Grégoire Kayibanda, bashinjaga kuba imbohe y’ibitekerezo by’abanzi b’amahoro bisenya ubumwe bw’igihugu.

Lizinde niwe wagiye kuri radiyo mu gitondo cyo kuri iyo tariki, abwira abaturage impamvu we na bagenzi be bafashe umwanzuro wo gukuraho Kayibanda.

Aba basirikare bakuru umunani biyise ‘Camarades du 5 Juillet’ bafashe igihugu barakiyobora, amahanga n’Umuryango w’abibumbye barabishima, by’umwihariko bashima uburyo ubwo butegetsi bushya bwari bushishikajwe n’iterambere ry’icyaro.

Icyakora ibyishimo, ubufatanye n’ubuvandimwe bw’abo ntibwamaze kabiri kuko nyuma y’imyaka irindwi kuwa Gatatu tariki 23 Mata 1980, hasohotse amakuru atunguranye y’uko Major Lizinde wo mu Bugoyi yafatanywe n’abandi basaga 40 bakekwaho gutegura umugambi wo guhirika Habyarimana.

Mu Ukuboza uwo mwaka, Kanyarengwe wari Minisitiri w’Umutekano n’imirimo ya Leta wanafatwaga nka nimero ya kabiri mu butegetsi bwa Habyarimana yarahunze, ahungira muri Tanzania nyuma yo kumenya amakuru ko ari ku rutonde rw’abakekwaho gufasha Lizinde gutegura umugambi wo guhirika ubutegetsi.

Urubanza rwa Lizinde na bagenzi be rwatangiriye mu Ruhengeri muri Nzeli 1980, rusomwa tariki 25 Ugushyingo 1981. Mu baregwaga, 23 bahamijwe ibyaha naho 24 bagirwa abere.

Bamwe bakatiwe igifungo kiri hagati y’imyaka ibiri na 20, naho Major Lizinde na Alphonse Kagenza bari ku isonga y’umugambi wo guhirika Perezida bakatirwa urwo gupfa.

Ku munsi w’ubwigenge mu 1982, Perezida Habyarimana yababariye imfungwa, Lizinde na Ndegeya bagabanyirizwa igihano, bahabwa igifungo cya burundu.

Kuki inshuti magara za Habyarimana zashatse kumuhirika?

Amakuru n’abatangabuhamya bavuga kuri iyi ngingo baranyuranya, gusa icyumvikana neza ntabwo umwuka hagati y’abasirikare bakuru bari barafashe ubutegetsi wari mwiza.

Zimwe mu nyandiko zo mu 1986 zashyizwe hanze n’Urwego rw’Amerika rushinzwe ubutasi (CIA), zigaragaza ko byavugwaga ko Lizinde yari yateguye Coup d’Etat kugira ngo abone uko ashyira mu bikorwa urwango yari afitiye abatutsi.

Mu rubanza Ferdinand Nahimana, Hassan Ngeze na Jean Bosco Barayagwiza bashinjwagamo ibyaha bya Jenoside mu mwaka 2003, hatumijwe umutangabuhamya ushinjura witwa Helmut Strizek.

Uwo mugabo yabaye mu Rwanda mu myaka ya 1980 ari umukozi w’Umuryango w’Ubumwe bw’i Burayi i Kigali.

Mu buhamya yatanze, Strizek yavuze kuri Coup d’Etat yaburijwemo mu 1980, avuga ko nubwo nta mpamvu nyayo yamenyekanye, ngo hari umwuka mubi hagati y’abasirikare bakuru bari barafashe ubutegetsi.

Yagize ati “Hari ibyavugwaga ku bibazo bamwe mu basirikare bari bafitanye na Habyarimana. Hari ikibazo mu basirikare bari barafashe ubutegetsi”.

Strizek yavuze ko by’umwihariko Lizinde, yaziraga igitabo yari aherutse gusohora cyakanguriraga abaturage kwanga abatutsi.

Kwivanga mu bucuruzi bw’Akazu no gutahura Kalinga

Perefegitura ya Ruhengeri ari naho haba Pariki y’Ibirunga yayoborwaga na Protais Zigiranyirazo, akaba umuvandimwe wa Agatha Kanziga, umugore wa Habyarimana.

Ni umwe mu bari bakomeye mu gatsiko kiswe ‘Akazu’ kagenzuraga ubukungu bw’igihugu n’ubutegetsi, kari kagizwe n’abo mu muryango wa Habyarimana.

Bivugwa ko Zigiranyirazo yajyaga avana ibyana by’ingagi muri pariki, afatanyije n’umugore w’Umubiligi wari uzwi nka Colette wabaga ku Gisenyi, bakabyohereza kubigurisha mu Bubiligi.

Umunsi umwe ibyana by’ingagi byatewe ikinya bipakirwa indege ya ‘Sabena’ ngo bijye mu Bubiligi. Indege imaze guhaguruka i Kigali yahuye n’ikibazo biba ngombwa ko isubira hasi, urugendo rurasubikwa.

Bukeye bwaho, bamwe mu bakozi bo ku kibuga cy’indege baje kumva urusaku rudasanzwe muri ya ndege ya Sabena yari igikorwa ngo ikomeze urugendo, bibatera ubwoba bahita bamenyesha Lizinde wari ushinzwe iperereza imbere mu gihugu.

Lizinde amaze kuhagera, ahashyirwa imizigo mu ndege harafunguwe basanga ni ibyana by’ingagi byakangutse bitaragera i Bruxelles, babajije nyir’uwo muzigo basanga ni wa mubiligikazi witwa Collette.

Bidatinze Lizinde yahise asaba Perezida Habyarimana ko Collette yirukanwa mu Rwanda, Habyarimana arabyemera ariko bibabaza Zigiranyirazo bari basanzwe bakorana.

Lizinde ngo yatangiye kwangishwa Habyarimana ariko undi ntabyiteho kuko nta mpamvu ifatika yabibonagamo.

Ibintu byaje kuba bibi mu myaka ya 1979 ubwo inzego z’iperereza zavumburaga ingoma ya Kalinga na Cyimugigizi mu rugo rw’umucuruzi wo muri Pakistani i Nyanza.

Izo ngoma bivugwa ko zari zarahabikijwe n’umwamikazi Rosalie Gicanda nyuma y’imvururu zo mu 1959 zakuyeho ubwami.

Izo ngoma zimaze kuvumburwa, Lizinde yanditse igitabo ‘La découverte de Kalinga ou la fin d’un mythe’ kivuga kuri izo ngoma, agaragazamo ko ari we wazivumbuye.

Iki gitabo cyarakaje cyane Habyarimana kuko we yumvaga ko izo ngoma zavumbuwe n’inzego z’iperereza zikuriwe na Habyarimana ubwe, aho kuba Lizinde ku giti cye. Lizinde yatangiye gushinjwa agasuzuguro no kwigira umunyabwenge kurusha Perezida.

Birashoboka ko uburakari bwa Habyarimana bwongezwaga n’urwango Zigiranyirazo n’Akazu bari bafitiye Lizinde wivanze mu mikorere yabo.

Habyarimana yaje gutegura uburyo azirukana Lizinde mu gisirikare no ku buyobozi bw’urwego rw’iperereza, ahita ashyiraho n’itsinda ry’abagombaga kujya baneka Lizinde rwihishwa.

Mu byo Lizinde yategurirwaga harimo kumufunga bakamugerekaho imfu z’abahoze ari abayobozi ku butegetsi bwa Kayibanda.

Ku bw’amahirwe, Lizinde yaje kumenya ibiri kumutegurirwa, ararakara yiyemeza guhirika Habyarimana ku butegetsi.

Mu gihe umugambi yari awugeze kure, Lizinde ngo yaje gukora ikosa aza kuwubwira umwe mu bagore bari inshuti ze, biza kugera kuri Habyarimana umugambi uburizwamo gutyo.

Nubwo imvano y’iyo Coup d’Etat ivugwa kwinshi, inyandiko za CIA zigaragaza ko imaze kuburizwamo, Habyarimana yatangiye kwiyegereza abasirikare abahemba neza, abohereza mu myitozo ya gisirikare hirya no hino ariko abahungisha cyane politiki.

Kanyarengwe na Lizinde baje kuba abanzi bakomeye ba Habyarimana ndetse kugeza ubwo bemeye kwinjira muri FPR Inkotanyi yarwanyaga ubutegetsi bwe.

Lizinde yatorokejwe n’Inkotanyi tariki 23 Mutarama 1991, mu gitero bagabye kuri gereza ya Ruhengeri.

Abahanga mu mateka na politiki bavuga ko gushwana no gufunga abo basirikare bari barafashije Habyarimana kugera ku butegetsi, ari ikosa rikomeye yakoze kuko byatangiye kuzana umwuka mubi muri ba ‘Camarades du 5 Juillet’.

Abahutu bo mu Majyaruguru n’iburengerazuba bacitsemo ibice mu gihe abahutu bo mu Nduga bo n’ubusanzwe batamwiyumvagamo bamuziza ko yabiciye abayobozi.

Iri kosa hari abemeza ko ariryo ryatumye ubutegetsi bwe bugera mu marembera.

Bamwe muri Camarades du 5 Juillet bafashije Habyarimana kujya ku butegetsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza