Kwamamaza

Iby’ingenzi bizaranga Rwanda Cultural Day i San Francisco

Yanditswe kuya 20-09-2016 saa 14:04' na Cyprien Niyomwungeri


Ku nshuro ya mbere Rwanda Day izanye ubudasa bwo kwibanda ku muco Nyarwanda nk’isoko ya byinshi n’inkingi mwikorezi mu kubaka igihugu no kunga Abanyarwanda.

Uyu mwaka Rwanda Day izaba kuwa 24 Nzeri mu Mujyi wa San Francisco muri Leta ya California, imwe muri 50 zigize Leta Zunze Ubumwe za Amerika.

Yahawe izina ryihariye ‘Rwanda Cultural Day’ hagamijwe kurushaho kwita ku muco Nyarwanda no kuwukundisha abatawuzi. Uyu munsi ufite insanganyamatsiko igira iti “Agaciro: Umurange wo kwiyubaha’.

Abanyarwanda n’inshuti zabo bazitabira uwo munsi bazibutswa uburyo umuco Nyarwanda ari isoko ya byinshi n’inkingi mwikorezi mu kubaka igihugu. Hazaganirwa uko u Rwanda rwabashije kwishakamo ibisubizo rugendeye ku muco gakondo n’uburyo byafashije igihugu gukemura ibibazo.

Indangagaciro z’ubumwe n’ubwiyunge n’uburyo umuco wagira uruhare mu kugabanya ubukene no kwimakaza imiyoborere myiza bizagarukwaho muri Rwanda Day y’uyu mwaka.

Ibizibandwaho muri Rwanda Day

Itorero ry’Igihugu ‘Urukerereza’ rizakina umukino werekana indangagaciro z’ibanze z’umuco Nyarwanda nk’ibirango bwite by’Abanyarwanda.

Uyu mukino w’iminota 30 uzaba ugabanyijemo ibice bine birimo; kugaragaza ibyiza by’u Rwanda binyuze mu mbyino zihariye arizo intwatwa n’ikinimba. Mu gice cya kabiri hazerekanwa uko Abanyarwanda ba kera babagaho, uburyo bwo kwigisha abana indangagaciro binyuze mu itorero ku bahungu no mu rubohero ku bakobwa.

Muri iki gice hazerekanwa imihango y’ubukwe bwa Kinyarwanda nko kurambagiza, gufata irembo, gusaba, gushyingirwa no gutwikurura. Hazanerekanwa uko Abanyarwanda bo hambere bakiraga umwana mu muryango binyuze mu kubyara no guhemba ababyeyi.

Mu gice cya gatatu urukerereza ruzagaragaza iterambere ry’imiyoborere muri sosiyete Nyarwanda kuva kera kugeza ubu. Muri iki gice hazerekanwa uko kera amakimbirane yakemurirwaga muri Gacaca.

Hazanagaragazwa gahunda zo kwishakamo ibisubizo nk’umuganda, ubudehe, imihigo. Hakazasozwa imbyino z’amoko atandatu ziserukiye ibice binyuranye by’igihugu.

Ibiganiro ku muco Nyarwanda

Ibiganiro bizibanda mu kwibutsa abitabiriye Rwanda Day urugendo igihugu cyanyuzemo. Hazagarukwa cyane ku buryo Abanyarwanda baba mu mahanga bafasha igihugu cyababyaye mu iterambere binyuze mu muco wabo, mu rurimi ndetse no mu bikorwa by’ishoramari bifatika.

Imurikabikorwa ndangamuco

Muri Rwanda Day y’uyu mwaka hazabaho igice cyo kumurika bimwe mu birango 13 by’umuco Nyarwanda. Aha harimo ibicuze mu byuma, ubuhinzi, ibiribwa, inzoga, ubugeni n’ibindi.

Hazerekanwa indangagaciro z’ibanze z’Umunyarwanda zirimo; kubaha Imana, gukunda igihugu, kubaha umuryango, kubaha ubuzima, kugira umutima, kugira ubupfura, kunga ubumwe, gukunda umurimo, no kwagura amarembo.

Hazamurikwa ibitabo n’ibindi bihangano Nyarwanda bibumbatiye umuco. Biteganyijwe ko hazabaho n’ibiganiro byihariye ku bana n’urubyiruko, aho bazavuza ingoma, bagacuranga inanga, bakavuza ikondera, bakivuga, bagasakuza n’ibindi.

Iyi Rwanda Day izitabirwa n’Abanyarwanda, inshuti zabo, abayobozi bakuru bo mu nzego za Leta n’abikorera.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved