Kwamamaza

Ibwirizwa rishya rishobora guhombya abamamarizaga ku muhanda w’i Kanombe

Yanditswe kuya 11-09-2016 saa 15:47' na Niyonsenga Schadrack


Abamamarizaga ku byapa byo ku muhanda werekeza ku Kibuga Mpuzamahanga cy’Indege cya Kigali bavuga ko bashobora guhura n’igihombo nyuma y’ibwiriza ry’umujyi wa Kigali ryasabye kubikuraho.

Ku wa Kane taliki ya 08 Nzeli 2016 ni bwo ubuyobozi bw’Umujyi wa Kigali bwasabye ibigo by’ubucuruzi n’ibindi byamamarizaga ku byapa biherereye kuri uyu muhanda kubikuraho, icyemezo aba bacuruzi bavuga ko gishobora gutuma bahomba bitewe n’iri bwiriza ritunguranye.

Iyo ugeze i Nyandungu mu ihuriro ry’imihanda yerekeza ku kibuga cy’indege i Kanombe no mu ntara y’Iburasirazuba bw’u Rwanda utangira kubona ibyapa bitandukanye biha ikaze abakerarugendo binjira mu Rwanda.

Bimwe mu bigo bikoresha ibi byapa kuri ubu biratangaza ko hari igihombo gikomeye bigiye guhura nacyo kubera ko ibi byapa byabafashaga mu kwinjiza amafaranga menshi binyuze mu kwamamaza.

Abakoraga ibi byapa nabo bavuga ko ibi bizabakururira igihombo kuko hari abakiriya babo batandukanye barimo amahoteli, amabanki, n’ibindi bigo by’ikoranabuhanga ngo byari byaramaze gusinyana nabo amasezerano yo kwamamaza muri bene ubu buryo mu gihe cy’amezi arenga atandatu y’umwaka.

Umwe utashatse ko amazina ye atangazwa yabwiye The Eastafrican dukesha iyi nkuru ko hari igihombo iribwirizwa rishobora guteza.

Yagize ati “Abakiriya bacu bari baratwishyuye mu gihe cy’umwaka, abandi amezi atandatu. Ubu bizadusaba kubasubiza amafaranga yabo niba tutabonye ahandi hantu heza ho kubamamariza hameze nk’aha.”

Aba bamamaza bavuga ko bahamagajwe mu nama itunguranye bahagera bagahabwa ibwiriza ryo gukuraho ibyapa byabo bitarenze uwo munsi.

Abamamariza kuri uyu muhanda bavuze ko bohererejwe ubutumwa bubamenyesha ko abafite ibyapa biherereye mu nkengero z’ikibuga cy’indege bose batumiwe mu nama igamije kubashakira aho ibi byapa byashyirwa hatabangamiye imirimo yo kwagura ikibuga cy’indege bahagera bagategekwa gukuraho ibyapa byabo mu gihe kitarenze umunsi umwe byabananira ubuyobozi bw’umujyi bukabibakuriraho.

Undi wamamarizaga ibigo by’ubucuruzi kuri byo byapa yagize ati “ Twifuzaga ko iri tegeko ryabanza kuganirwaho. Ntabwo twahawe igihe ngo dusobanurire abakiriya bacu. Batubwiye ko bari budushakire ahandi dushyira ibyapa ariko ntaho batweretse.”

Aba bamamazaga bavuga ko babwiwe ko ari itegeko rivuye mu biro by’Umukuru w’Igihugu ngo kubera impamvu z’umutekano.

Ubuyobozi bwabasabye gukoresha ibyapa byo mu bwoko bw’ikoranabuhanga kuko ari byo bifata umwanya muto.

Byinshi muri ibi byapa biri kuri uyu muhanda wa Kanombe bikodeshwa n’ibigo byamamaza ku madolari ya Amerika ari hagati ya $900 na $1,200 ku kwezi, bivuze ko byinjirizaga ba nyirabyo amadolari agera ku bihumbi 12 by’amadorali, asaga 9 648 240 Frw ku mwaka.

Umuvugizi w’Umujyi wa Kigali, Bruno Rangira, yabwiye IGIHE ko aba bafite ibyapa ku muhanda werekeza ku kibuga cy’indege bari bamaze amezi atandatu baramenyeshejwe ko bagomba kubikuraho.

Ati “ Umwaka ushize, habayeho kwandikira ba nyir’ibyapa bose bahabwa amezi atandatu bijyanye n’amabwiriza y’umujyi wa Kigali mu rwego rwo guhindura ibyapa. Hari amabwiriza icyo gihe yanasohotse mu igazeti agena uko ibyaha muri Kigali bigomba kuba biteye. Icyo gihe hamenyeshejwe ba nyir’ibyapa mu buryo bwo kuyubahiriza kandi bose barandikiwe bari babizi.”

Yakomeje avuga ko bitewe n’uko imbago z’ikibuga cy’indege ziyongereye kubera ibikorwa remezo bishya ndetse no kubera impamvu z’umutekano ariyo mpamvu ibi byapa bigomba kuhava, gusa ngo mu gihe bubahirije amabwiriza agenga ibyapa muri Kigali, bashobora kwamamaza ahandi.

Ibyapa biherereye ku muhanda werekeza ku kibuga cy'indege bigomba kuvanwaho

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 28 Nzeri 2016
Copyright © 2009 -2014 - IGIHE Ltd - All Rights Reserved