00:00:00 IGIHE NETWORK KN KINYARWANDA EN ENGLISH FR FRANCAIS

Iburengerazuba: Abakuru b’Imidugudu 3621 batangiye guhabwa telefoni zigezweho

Yanditswe na Mukwaya Olivier
Kuya 16 Nyakanga 2021 saa 01:41
Yasuwe :
0 0

Ubuyobozi bw’Intara y’Iburengerazuba, bwatangiye ibikorwa byo gukwirakwiza ‘smart phone’ 3621 ku bakuru b’imidugudu muri iyo Ntara, mu rwego rwo kuborohereza akazi kabo karimo no gutanga raporo za buri munsi, zitarimo imibare n’inyandiko gusa, ahubwo zirimo n’amafoto na video aho bibaye ngombwa.

Guverineri w’Intara y’Iburengerazuba, Habitegeko François, yatangije ibi bikorwa ku mugaragaro, atanga telefone ku bayobozi b’imidugudu 97 bo mu Murenge wa Busasamana uri mu Karere ka Rubavu, mu gihe izindi na zo zizatangwa vuba.

Musafiri Ildephonse, mu izina ry’abahawe izi telefone, yavuze ko zizabafasha gutanga raporo irimo n’amafoto.

Ati “Hano tugira akazi kenshi kuko duturiye umupaka, hakaba hanagaragara ibyaha bitandukanye. Twajyaga dukora raporo mu magambo ariko kuba baduhaye izi telefoni tuzajya tunashyiraho amafoto na video kugira ngo byumvikane neza ku buryo bworoshye.”

Gen.Maj. Alexis Kagame wari uhagarariye Ingabo z’u Rwanda, yasabye abayobozi b’imidugudu kuzajya bazifashisha batanga amakuru, banerekana ibitagenda kugira ngo bikemurwe.

Ati “Izi telefoni zigezweho muhawe, zizabafashe gutanga amakuru neza, ariko mujye munerekana ibitagenda kugira ngo ababishinzwe babikurikirane.”

Guverineri Habitegeko yavuze ko zatanzwe mu bihe bya Covid-19 zikaba zikwiye gutangira gukoreshwa muri ibi bihe.

Ati “Tuzibahaye kugira ngo muri iki gihe duhanganye n’icyorezo cya Covid-19, ngo bazifashishe mu guhanahana amakuru no kuvugana n’izindi nzego aho bakeneye bakunganirwa kuko bari basanganywe telefoni zisanzwe, bakohereza ubutumwa no guhamagara ariko izi bahawe bazajya bakoresha internet, bakore raporo yuzuye irimo amafoto ku buryo busobanutse.”

Yakomeje avuga ko iki gikorwa kigomba kumara iminsi ibiri, imidugudu 3621 igomba kuba yamaze kuzihabwa mbere y’uko gahunda ya Guma mu Rugo itangira mu turere twayishyizwemo mu Ntara y’Iburengerazuba.

Telefoni 97 zatanzwe ku bayobozi b'imidugudu iri mu Murenge wa Busasamana mu Karere ka Rubavu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .