Ibitero by’ikoranabuhanga byagabwe ku gisirikare n’amabanki mu Burusiya no mu Rwanda

Yanditswe na Philbert Girinema
Kuya 9 Kanama 2016 saa 12:55
Yasuwe :
0 0

Abashakashatsi bo mu bigo bibiri bitanga serivisi z’ubwirinzi bwa mudasobwa, batangaje ko bavumbuye itsinda ry’abajura mu by’ikoranabuhanga (Hackers), bagabye ibitero byo kuneka amabanga y’ibihugu birimo u Burusiya, u Bushinwa, Iran, u Rwanda, u Bubiligi na Suède.

Ikigo Symantec cyo muri California na Kaspersky yo mu Burusiya byemeza ko abo bajura mu by’ikoranabuhanga biyise "Strider" cyangwa "ProjectSauron".

Abashakashatsi ba Symantec kuri uyu wa Mbere batangaje ko iryo tsinda ryatangiye gukora muri 2011, rikaba rishobora kuba rifitanye imikoranire n’ikigo cy’ubutasi [kitatangajwe], rikinjira mu mabanga ryifashishije virusi yitwa ‘Remsec’.

Ibyo bigo byibasiwe na Remsec muri ibyo bihugu birimo ibya Leta, ibigo by’ubushakashatsi, ibigo bya gisirikare, ibitanga serivisi z’itumanaho n’ibigo by’imari.

Iyi Remsec ishobora kwinjira mu ikoranabuhanga ry’ikigo cyose aho kuba muri mudasobwa y’umuntu umwe gusa, ku buryo iha abashaka kwiba amakuru uburenganzira busesuye ku mashini iyo virusi yagezemo.

Abashakashatsi ba Symantec bavuze ko hari ibigo bine n’abantu ku giti cyabo bo mu Burusiya, Ikigo cy’Indege cyo mu Bushinwa, Ikigo cyo muri Suède na Ambasade iri mu Bubiligi, bari mu mboni z’abo bajura.

Kaspersky yo yavuze ko yabonye ibigo 30 byo mu Burusiya, Iran n’u Rwanda, bimaze kugerwaho n’ibi bitero, ndetse bishoboka ko byageze no muri bimwe mu bihugu bivuga Igitaliyani.

Abahanga bo muri Symantec bahamya ko bashingiye ku bushobozi bw’ikoranabuhanga ry’abo bajura n’ibigo bari kwibasira, bishoboka ko babikora batumwe n’igihugu runaka nubwo batagira icyo batunga agatoki.

Symantec yagize iti “Dushingiye ku bushobozi bafite mu kwiba amakuru muri virusi yabo n’ubwoko bw’inzego bagambiriye kwinjiramo, birashoboka ko ababikora bashyigikiwe n’igihugu runaka,”

Kaspersky yo yagize iti “Turatekereza ko igitero gikomeye nk’iki, kigamije kwiba amakuru y’ibanga, gishoboka gusa ari uko gishyigikiwe n’ubuyobozi bw’igihugu runaka […] Kaspersky Lab nta makuru afatika ibifiteho, ariko ibikorwa bya ProjectSauron birashoboka cyane ko byasabye inzobere zihagije n’ingengo y’imari ishobora kugera muri miliyoni z’amadolari.”

Umuyobozi wa Symantec ushinzwe ibijyanye n’ubwirinzi, Orla Fox, yavuze ko bidakunda kubaho ko mu mwaka bavumbura ibitero nk’ibi birenze kimwe cyangwa bibiri mu mwaka.

Symantec ivuga ko Remsec yagaragaje bimwe mu bimenyetso bisa n’ibya virusi ya Flamer, ndetse na Kaspersky ikemeza ko icyo gitero cya ProjectSauron gifitanye isano n’iriya virusi [flamer] n’ubwo itemeza niba hari aho zaba zihuriye.

Flamer ihuzwa cyane n’indi virusi yitwa Stuxnet, abahanga mu by’ikoranabuhanga bavuga ko yakoreshejwe na Leta Zunze Ubumwe za Amerika na Israel mu kwinjira mu ikoranabuhanga rya Iran ryagenzuraga ibikorwa by’intwaro za kirimbuzi mu myaka icumi ishize.

Muri Gashyantare uyu mwaka, Minisitiri w’Urubyiruko n’Ikoranabuhanga, Jean Philbert Nsengimana, yatangaje ko buri munsi u Rwanda rugabwaho ibitero by’ikoranabuhanga bisaga 1000 n’ubwo bisubizwa inyuma.

Muri Gashyantare 2015, Banki Nkuru y’u Rwanda (BNR) ni rumwe mu nzego za Leta zashimangiye ko Abajura bakoresha ikoranabuhanga bagerageje inshuro zigera kuri miliyoni 23 ngo bibe amafaranga, ariko bagasanga inzego zishinzwe ikoranabuhanga zayo zarashyizeho ubwirinzi.

Bimwe mu bifasha umuntu kurinda amakuru ye muri mudasobwa, harimo gushyiramo ubwirinzi bwa virusi, guhitamo ijambo ry’ibanga rikomeye rigizwe n’inyuguti hamwe n’imibare, gushaka ububiko bwa kabiri bw’amakuru yawe ahenze; kwirinda kwinjira ku mbuga izo arizo zose zigusabye kuzisura no kwirinda kwemeza ahantu hagusaba kukubikira ijambo ry’ibanga.

Raporo y’umugenzuzi mukuru w’imari ya Leta ya 2013/2014, igaragaza ko Ikigo cy’Igihugu cy’Uburezi (REB) cyibwe hifashishijwe ikoranabuhanga ibihumbi 516 by’amadorali ya Amerika bingana n’amafaranga miliyoni zisaga 370 cyishyurira abanyeshuri 14 biga muri Nigeria.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244