Ibitazibagirana kuri Sayinzoga wayoboraga komisiyo ya ‘Demobilisation’ akaba n’umunyabigwi muri Karate

Yanditswe na Rabbi Malo Umucunguzi
Kuya 17 Mata 2017 saa 06:16
Yasuwe :
1 0

Ku mugoroba wo kuri iki Cyumweru nibwo hamenyekanye inkuru y’urupfu rwa Jean Sayinzoga, umusaza wari umenyerewe mu bikorwa bitandukanye cyane mu mukino njyarugamba wa Karate no muri Komisiyo y’Igihugu yo gusezerera no gusubiza mu buzima busanzwe ingabo zavuye ku rugerero (RDRC).

Aho yanyuze yahasize ikimenyetso benshi batazibagirwa, biturutse ku butwari bwe, imiyoborere ye cyangwa umurava yagaragaje mu kazi.

Iyi komisiyo yashinzwe muri Mutarama 1997, ishyirwaho byemewe n’amategeko n’Iteka rya Perezida mu 2002. Kuva yashingwa, Sayinzoga ni umwe muri babiri bayoboye iyi komisiyo kuko yasimbuye Ephreim Kabayija mu 2001, akaba yitabye Imana amaze kuri uwo mwanya hafi imyaka 17.

Komiseri muri RDRC, Fred Nyamurangwa bakoranaga guhera mu 2004, avuga ko bamufataga nk’inyangamugayo, ku buryo yari amaze kurenga kuba umuyobozi akaba umubyeyi kuri benshi.

Yagize ati “Icya mbere cyo twebwe twamufataga nk’inyangamugayo, icya kabiri nk’umuntu ukunda igihugu, icya gatatu nk’umuntu washoboye gushishikariza abantu kubana mu mahoro. Ni gahunda ya leta, ariko noneho iyo ushobora gushishikariza abantu abataha bagataha, abasezererwa mu ngabo nabo bagasezererwa bakagera aho babana mu makoperative, icyo ni igikorwa kizima cyane yatugejejeho.”

“Ikindi ni uko yashoboye kumenyekanisha igihugu nk’u Rwanda kuko yajyaga agenda no mu bihugu byo hanze, akamenyekanisha igihugu mu kubanisha Abanyarwanda, cyari igikorwa yari ashoboye cyane mu kuvuganira iryo shami yari ashinzwe. Yari umugabo w’icyitegererezo, ikindi mu buryo bw’abakozi, yari umuyobozi mwiza ariko ari n’umubyeyi.”

Nubwo Komisiyo yo gusezerera no gusubiza mu buzima busanzwe ariyo bamwe bamumenyemo cyane, yafatwaga nka Sekuru w’umukino njyarugamba wa Karate mu Rwanda, kuko yawutangirije i Burundi ariko amashami yawo akagera mu rwa Gasabo.

Bamwitaga ‘Sensei’ cyangwa mwarimu, aho Sinzi Tharcisse wamugwaga mu ntege muri Karate mu Rwanda rwose yagize ati ni ‘inzu y’ibitabo dutakaje’.

Sayinzoga yitoje Karate kuva mu buto bwe, akorera imyitozo mu bihugu bitandukanye ku buryo ariwe wari imbere mu midali ya Karate mu Rwanda, aho yari afite ‘dan’ ya gatandatu yahawe mu 2015, Sinzi Tharcisse akagira ‘dan’ ya gatanu.

Yagize ati “Niwe watangije umukino wacu mu Burundi muri 1973, mbona umukandara w’umukara muri 84, nanjye nywutangiza mu Rwanda muri 1988 kuko we yahaje nyuma ya Jenoside. Ni we wadutozaga, urumva ko niwe watureze, mbega niwe dukomokaho.”

“Yaje mu Rwanda asanga hari aho natoje ariko umukino niwe wawutangije. Mbega ni nk’inzu y’ibitabo dutakaje.”

Indi mirimo ya hafi izwi yakoze ni aho yayoboye Inama Njyanama y’Akarere ka Rutsiro mu Ntara y’Iburengerazuba guhera mu 2011 nkugeza 2016 ubwo hatorwaga komite nshya.

Ntirenganya Gervais bakoranye icyo gihe akaba yari anamubereye Visi Perezida, yabwiye IGIHE ko Sayinzoga yabaye umuntu witanga cyane, nubwo yahuzaga ibikorwa by’iyi nama aturutse mu Mujyi wa Kigali.

Yagize ati “Yari umusaza mwiza, witanga, ukurikirana ku kazi, kandi uvugisha ukuri. Yari umuyobozi w’Inama Njyanama kandi akaba umuyobozi ureba inyungu z’abaturage, utagira aho abogamiye, ureba mbese ibikwiye akaba aribyo bikorwa.”

Sayinzoga yaboneye izuba mu karere ka Rutsiro mu Murenge wa Mushubati mu kagali ka Bumba ahagana mu 1942. Yaguye mu bitaro byitiriwe Umwami Faisal azize kanseri y’umwijima, akaba atabarutse afite imyaka 75.

Ikiganiro IGIHE iherutse kugirana na Sayinzoga


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza