Ibitaro birindwi mu Rwanda byarangije umwaka nta mubyeyi uhapfiriye

Yanditswe na Twarabanye Venuste
Kuya 9 Ugushyingo 2019 saa 01:07
Yasuwe :
0 0

Minisiteri y’ubuzima yatangaje ko ibitaro birindwi mu Rwanda byasoje umwaka wa 2018/19 nta mubyeyi ubitakarijemo ubuzima abyara, kubera ubufatanye bw’inzego n’ubwitange bw’abakora mu rwego rw’ubuzima.

Mu Rwanda impfu z’ababyeyi bapfa babyara zagabanyutse ku kigero cya 75% mu myaka 20 ishize.

Ibi byagezweho kubera imbaraga zashyizwe mu buvuzi zirimo gushyira 16% by’ingengo y’imari mu buvuzi n’ubwishingizi bw’ubuzima kuri bose bwa mituweli.

Hari kandi umusaruro w’urwego rw’abajyanama b’ubuzima babonwa nk’urugero rukomeye rw’ibyo abanyarwanda bashobora kwikorera, mu myaka 20 bamaze. Mu gihugu cyose hari abajyanama b’ubuzima 58,445.

Ubwo Perezida Kagame yahuraga n’abaganga muri iki cyumweru, Minisitiri w’Ubuzima Dr. Diane Gashumba yatangaje ko ibitaro bya Butaro, Kinihira, Nyanza, Ruli, Kacyiru, Karongi na Kirinda byabashije kumara umwaka nta mubyeyi ubitakarijemo ubuzima abyara.

Dr Gashumba yavuze ko ibyo byashobotse kubera ubufatanye bw’inzego n’ubwitange bw’abakozi agira ati “Hari ibitaro kubera ubufatanye bw’inzego z’ibanze n’abayobora ibitaro, kubera ubwitange bw’abakozi, kubera gufata neza ibikoresho bafite, babasha kumara umwaka nta mubyeyi upfuye muri ibyo bitaro”.

Imibare yerekana ko umubare w’ababyaza mu Rwanda wazamutse aho wavuye ku mubyaza 1 ku baturage 66,749 ugera ku mubyaza umwe ku baturage 4064 muri 2017.

Umuyobozi w’ibitaro by’icyitegererezo bya Karongi akaba n’uhagarariye ibitaro by’uturere, Dr. Ayingeneye Violette yabwiye IGIHE ko ubukangurambaga bwo kubyarira kwa muganga, amahugurwa ku babyaza mu bigo nderabuzima n’abaganga b’inzobere, ari bimwe mu bifasha gutera iyo ntambwe.

Ati “Kuba ababyeyi barakanguriwe kubyarira kwa muganga ntibabyarire mu rugo, nubwo bitaraba neza ijana ku ijana ariko byaradufashije, kuba abaganga bamanuka bakajya ku bigo nderabuzima kwigisha ababyaza baho kugira ngo bagire ubumenyi buhagije nabyo byaradufashije ikindi kuba dufite abaganga b’inzobere bita ku buzima bw’umubyeyi, nabyo byaradufashije ku buryo iyo tugize ikibazo kije kigoranye baba hafi bagahita bafasha, uwo twari kohereza CHUK bakamufashiriza hano.”

Ibitaro by’icyitekegererezo bya Karongi bifite inzobere mu buzima bw’ababyeyi ebyiri. Muri rusange mu Rwanda hari abaganga b’inzobere 504.

Dr. Ayingeneye yavuze ko uruhare rw’abajyanama b’ubuzima muri ubwo bukangurambaga no kuba hafi y’ababyeyi ari umusanzu ukomeye.

Avuga ko ubukangurambaga abajyanama b’ubuzima bakora ndetse bakanaherekeza ku kigo nderabuzima ufite ikibazo bakamwitaho byihuse biri mu bituma ababyeyi badapfa babyara.

Ati “Iyo hari ugize ikibazo bataragera ku kigo nderabuzima bagahamagara imbangukiragutara, tukamusanga aho ari tukamugeza kwa muganga, kuko bafite kode zitishyura amafaranga bahita baduhamagara.”

Ababyeyi basabwa kubungabunga ubuzima bwabo mbere na mbere by’umwihariko kwitabira kujya kwa muganga mu gihembwe cya mbere, kubahiriza gahunda zo kwipimisha kandi ugize ikibazo akitabaza umujyanama w’ubuzima akamuherekeza kwa muganga.

Icyakora abasama inda batifuza ko bimenyekana bashobora kuba imbogamizi kuri iyi ntego yo kugabanya impfu z’ababyeyi bapfa babyara n’abana bapfa bavuka kugera kuri zero. Basabwa gutinyuka na bo kuko bahabwa serivisi zose zihabwa umubyeyi nta kibazo.

Ababyariye mu bitaro bikuru bya Karongi [Kibuye] kuva muri Nyakanga 2018 kugeza muri Kamena 2019 ni 2,254. Naho abo mu bigonderabuzima bishamikiye kuri ibyo bitaro ni 5,443.

Umuyobozi w’ibitaro by’icyitegererezo bya Karongi akaba n’uhagarariye ibitaro by’uturere, Dr. Ayingeneye Violette yashimye umusanzu w'abajyanama b'ubuzima mu kugabanya ababyeyi bapfa babyara

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza