Ibitaro 42 bigiye kugenzurwa uko byatanze akazi, abagahawe mu buriganya birukanwe

Yanditswe na Evariste Nsengimana
Kuya 2 Ugushyingo 2018 saa 04:18
Yasuwe :
0 0

Komisiyo y’igihugu y’Abakozi ba Leta yavuze ko igiye gukora ubugenzuzi bwimbitse mu bitaro bya Leta 42 mu gihugu, bw’uko byashyize abakozi mu kazi, abakagiyemo mu buriganya bafatirwe ingamba zirimo no kwirukanwa.

Byavugiwe mu kiganiro iyi komisiyo yagiranye n’abanyamakuru kuri uyu wa Gatanu. Cyibanze kuri raporo y’ibikorwa byayo by’umwaka wa 2017/2018 yaraye ishyikirijwe Inteko rusange y’Inteko Ishinga Amategeko, imitwe yombi.

Perezida w’Inama y’Abakomiseri muri iyi komisiyo, Habiyakare François, yavuze ko ibitaro bigiye kugenzurwa muri uyu mwaka wa 2018/19, ibyavuyemo bikagaragazwa muri raporo izatanga umwaka utaha.

Umunyamabanga w’iyi Komisiyo, Angelina Muganza, yavuze ko ‘Igenzura rigamije kureba niba abakozi babyo bashyizwe mu myanya mu buryo bujyanye cyangwa bunyuranyije n’amategeko.’

Urugero ni nk’aho umuntu ashobora gushingwa abakozi nyamara yarize iby’imari kandi uwo mwanya usaba uwize iby’ubuyobozi no gucunga abakozi.

Ati “Dushobora gusanga bitaranakozwe neza. Rero aho tuzasanga umuntu yarashyizwe mu mwanya atujuje ibisabwa [..] tuzatanga inama ko akwiye gukurwamo agashyirwa mu wo yujurije ibisabwa, waba udahari agasezererwa.”

Muganza yavuze ko iryo suzuma rijyanye n’amabwiriza ya Minisitiri yashyizweho mu 2018, agenga uburyo abakozi bashyirwa mu myanya y’akazi y’ibitaro bya Leta.

Iyi komisiyo isanzwe buri mwaka ikora amagenzura ajyanye n’uko abakozi ba Leta bashyirwa mu kazi.

Umwaka ushize, yagenzuye abo mu Turere 12, Uwawubanjirije yari yagenzuye ab’utundi 18 mu gihe uwayibanjirije yombi yari yagenzuye abo mu bitaro.

Komisiyo igenzura ibitaro, yari yagaragaje ko ‘Bidafite imiterere (abayobozi bafite inshingano zivangavanze), iyari ihari yari yarataye igihe, Komisiyo itanga inama y’uko hashyirwaho ijyanye n’igihe.’

Bivuze ko iri genzura rigiye gukorwa rigamije kureba aho ibyo bitaro bigeze bikosora ibyo byasabwe.

Mu Turere 12 twagenzuwe umwaka ushize, tubiri byagaragaye ko ‘Hari imyanya itarimo abakozi kandi yarategenyirijwe ingengo y’imari, utundi umunani harimo imyanya irimo abakozi badafite impamyabumenyi zisabwa n’ibindi.

Ibi ngo biterwa n’uko umukozi ava mu mwanya akarere ntikabashe guhita kamusimbuza cyangwa abakurikirana igikorwa cyo gushaka abakozi badasesengurana ubushishozi ibyangombwa batanga.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza