Kwamamaza

Ibitaravuzwe ku banyarwanda bashaka kujya mu mitwe y’iterabwoba

Yanditswe kuya 30-08-2016 saa 11:50' na Ntakirutimana Deus


Kuba u Rwanda ruzi ko atari ikirwa cyiberaho mu mutuzo ushushe nka Paradizo, bituma rwiha intego zo gucungira hafi umutekano warwo ngo udahungabanywa n’iterabwoba ryugarije Isi, riherutse gufatitwamo n’abarasiwe mu bikorwa nk’ibyo, abanze kuburana kuko batavugana ‘n’abakafiri’ n’abise igihugu igikafiri.

- Babwiye Perezida w’Urukiko ko batavugana n’umukafiri

- Bashukira urubyiruko mu mashuri yabo bita amadarasa

- Bica abo badahuje ukwemera kuko baba bizeye ijuru

- Baracyari gushaka abayoboke, ntibiragera aho biturikirizaho ibisasu

Urubyiruko ruraburirwa ngo rwigobotore umutego nk’uwaguyemo bagenzi barwo bishoye muri ibyo bikorwa, ababyeyi bagasabwa kuba maso, abayobozi nabo bakibutswa kudahuga.

Ikibazo cy’iterabwoba cyagarutsweho ku wa Mbere tariki ya 29 Kanama 2016, ubwo hateranaga inteko rusange y’Umujyi wa Kigali.

Umuyobozi wa Brigade ya 204 ikorera mu Mujyi wa Kigali, Brig. Gen. Denis Rutaha, yasobanuye ko ikibazo cy’iterabwoba kivugwa mu Rwanda n’ubwo kitaragera aho abantu biturikirizaho ibisasu.

Gen. Rutaha yavuze ko urwego rwo gutega ibisasu rubanzirizwa no gutegura abazabikora, bashakwa mu bayoboke bacengezwamo imigambi mibi, bagahindura imyumvire biciye mu nyigisho bahabwa.

Ati “[Mu Rwanda] Dushobora kuba tutaragera kuri icyo cyiciro cyo kwituritsa cyangwa kwica abantu ku bwinshi, ariko birasa nk’aho barimo kugerageza ku buryo babona abayoboke, nta kundi babashaka bafite amayeri n’uburyo bwinshi bakoresha.”

Kimwe n’ahandi hose, abo mu Rwanda nabo bashingira ku myumvire n’ibitekerezo by’uko bagomba kurwana intambara ntagatifu (Djihad) ku buryo umuntu wese utari umuyisilamu nkabo ndetse n’abayisilamu basanzwe agomba guhinduka

Mu Rwanda bakomeje gushaka abayoboke

Gen. Rutaha yavuze ko abari muri iyo mitwe bamaze iminsi bagerageza gushaka abayoboke mu Rwanda, bahereye cyane mu bayisilamu basanzwe.

Ati “Baba bafite imyumire y’ubutagondwa, ngo bagamije kurwana intambara ntagatifu. Mumaze iminsi mubyumva mu makuru, hari abo twagiye tubona babigerageza bakavuga ko imyemerere nk’iyo ibajyana mu ijuru kandi ko undi muntu utemera nkabo atagomba kubaho.”

Yakomeje agira ati “Baraza bakabwira umuntu ko muri Islam harimo amafaranga, bati ngwino tuguhindure, abandi bati hari ishuri i Nairobi ngwino ujye kwiga, abandi bakabashyira mu nzu bagatangira kubigisha Korowani itandukanye n’iyo tuzi. Bafite ukuntu bayigisha n’uko bayumva, cyane bakajya mu rubyiruko, bakaba ariho bashakishamo abayoboke.”

Mu bice bitandukanye by’Umujyi wa Kigali ngo hari aho bagiye batahurwa barashinze amashuri bita ‘amadarasa’, usanga urubyiruko rugenda bakarwigishirizamo rugahinduka mu myumvire ndetse no ku mubiri.

Gen. Rutaha yakomeje abwira Inteko Rusange y’Umujyi wa Kigali ati “Abari basanzwe biga bata ishuri, bagatangira gusuzugura abayisilamu basanzwe, bahereye ku bayobozi babo, niba ari Imam [Umuyobozi w’Umusigiti] bakamusuzugura bakamwereka ko imyemerere ye atari yo, bagatangira mbese gukora ibikorwa bikwereka ko Isi yabarambiye bashaka uburyo bayivamo.”

Umuyobozi wa Brigade ya 204 ikorera mu Mujyi wa Kigali, Brig. Gen. Denis Rutaha

Ngo ntibashaka “u Rwanda rw’urukafiri”

Minisitiri w’Ubutegetsi bw’Igihugu Francis Kaboneka yagaragaje ko icyo kibazo kigomba guhagurukirwa, ababyeyi bakita ku burere bw’abana babo ndetse n’abayobozi nabo bakaba maso.

Ati “Mwumvishe ejo bundi ibyabereye mu Bugarama, abana b’Abanyarwanda bakavuga ko u Rwanda ari urukafiri, ugafata ikarita y’igihugu ukayishyiramo umurongo wo kwerekana ko ibyo byose ari ibikafiri. Abana bato! Ni abana banyu ni abo muyobora muhaguruke....”

Minisitiri Kaboneka yavuze ko icyo kibazo kijya kuvumburwa cyari kimaze gufata indi sura, kuko abafatiwe mu Mujyi wa Kigali bajyanywe imbere y’urukiko bakabwira Perezida warwo ko batamuvugisha kuko ari umukafiri kandi batavugana n’abameze gutyo.

Ati “N’aba b’ejo bundi bafatiwe i Bugarama nibyo bavugaga. Ese aho utuye aho uyobora urabizi neza ko wizeye 100% ko udashobora kuba ufite ibibazo nk’ibyo by’abo bana, urabikurikirana, uramenya ibyo barimo urabigaragaza?”

Minisitiri Kaboneka yavuze ko nk’uko ibikorwa by’abakora iterabwoba bumva ko bibajyana mu ijuru, uwashaka kujyayo yagenda ariko agaha abandi amahoro.

Ati “Uwumva ashaka kujya mu ijuru yirukanke agende ariko aduhe amahoro. Kujya mu ijuru ngo ni uko uhitanye abandi, sinzi n’ibyo bitabo basoma ari Bibiliya na Korowani ari cyo byigisha! Kandi sibyo kuko no mu ndamukanyo ‘Assalamu ’Alaikum’ bisobanura ngo gira amahoro, tubane n’amahoro y’Imana. Amahoro y’Imana bisobanura kumena amaraso? Uraramukanya amahoro y’Imana warangiza ugakora ibyo Imana idakunda!”

Minisitiri Kaboneka yasabye abayobozi kuba maso babungabunga umutekano u Rwanda rufite

Umuyobozi wa Polisi mu Mujyi wa Kigali, ACP Bosco Rangira, yemeza ko uzafatirwa muri ibyo bikorwa atazihanganirwa, kuko nta kujenjeka mu bijyanye n’umutekano, asaba abayobozi gutangira amakuru ku gihe mu rwego rwo guhashya abafite imigambi mibisha.

Ati “U Rwanda rwahisemo amajyambere n’amahoro asesuye .Twese twitandukanye nabo kuko ubahishira amategeko y’u Rwanda ateganya ko iyo utavuze ikibi gikorwa n’ugikora uba uri umufatanyacyaha, muhanwa kimwe nawe ntabwo usigara. Waba uri Umukuru wa Polisi, waba uri Meya, umuyobozi w’akagari.”

Yakomeje agira ati “Ndashaka kugira ngo mbabwire hano turi, ibintu nk’ibyo bibe gasopo kuri buri bantu bose babikora. Gasopo ni iyihe, abantu mubatahure muberekane.”

Hari uwasabye ko ufatiwe mu iterabwoba yicwa

Uwitwa John Mukama ushinzwe umutekano mu Mudugudu wa Bukinanyana mu Murenge wa Kimironko, yasabye ko uwajya ugaragaraho ibikorwa by’iterabwoba yajya yicwa.

Ati “Ingingo y’utekereza kuzana iterabwoba, nasabaga ko hatangwa ubutumwa ko buri wese ubigerageje, nta kujya mu nkiko ngo ajye kwiregura. Oya, ahubwo isasu rikamurira aho ako kanya agitangira kubitekereza.”

Umuyobozi wa Polisi mu Mujyi wa Kigali, ACP Rangira yavuze ko hari inzira nyinshi zo guhangana n’abashaka guhugabanya umutekano w’Igihugu, ku buryo kubarasa atariwo muti.

Ati “Ku kibazo cy’ibyihebe, amasasu ngira ngo urabizi ko ahenda, akora iyo byananiranye. Byari byananirana? Oya! Hari inzira nyinshi, urushishi ushobora kuba warukubita inyundo, ushobora kurusyonyora... dukoreshe inyundo ku rushishi?”

“Ndabizeza ko kiriya kibazo kitazamara kabiri. Nidufatanya bariya biyita ibyo batari byo tuzabashobora, ariko iby’amasasu ntabwo biraba ngombwa,ntabwo ari ugupfa kuyatumura ku nshishi.”

Guhera muri 2016 abantu batanu bamaze kwicirwa mu bikorwa by’iterabwoba mu Rwanda, bose bari mu idini ya Islam. Uretse abarashwe, hari n’irindi tsinda rya 16 bari gukurikiranwa n’Urukiko rwisumbuye rwa Gasabo, bakekwaho gukorana n’umutwe w’iterabwoba wa Islamic State.

Aba bafunzwe bashimangira ko bazira kugaragaza “ukuri” muri Islam, bakaba bafungiye mu bice bitandukanye birimo Intara y’Amagepfo, Amajyaruguru no mu Mujyi wa Kigali.

Umuyobozi wa Polisi mu Mujyi wa Kigali, ACP Bosco Rangira

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 29 Nzeri 2016
Copyright © 2009 -2014 - IGIHE Ltd - All Rights Reserved