Ibitangazamakuru bigiye gufashwa kujya bibona amakuru yizewe ku bakunzi babyo

Yanditswe na Mukaneza M.Ange
Kuya 19 Gicurasi 2017 saa 06:54
Yasuwe :
0 0

Ni kenshi usanga ibitangazamakuru birimo televiziyo, radio n’ibyandika bitegura ibiganiro cyangwa inkuru runaka, bigasobanya n’ibyifuzo by’abakunzi babyo, kubera kutagira amakuru ahagije kandi yizewe arebana n’ibyifuzo byabo n’ibyiciro barimo.

Ibi bigira ingaruka ku bafite ibitangazamakuru n’abifuza gutambutsa ubutumwa bwabo kuko baba batazi icyo basabwa kugira ngo ibyo bifuza gutambutsa bigere ku bo bigenewe.

Mu gukemura iki kibazo, Ikigo GeoPoll gikora ubushakashatsi butandukanye kigiye gutangiza serivisi zo kugenzura uburyo abaturage bafata ibitangazamakuru bitandukanye (Media Measurement).

Mu nama yahuje iki kigo na bamwe mu bahagarariye ibitangazamakuru bikorera mu Rwanda kuri uyu wa Gatanu, Ubuyobozi bwa GeoPoll bwagaragaje ko bizatuma ibitangazamakuru birushaho gufata ibyemezo bishingiye ku byifuzo by’ababikurikirana.

Umuyobozi ushinzwe kwagura ubucuruzi bwa GeoPoll muri Afurika y’Amajyepfo, Matt Angus-Hammond yagize ati “Dukoresha uburyo bwizewe kandi bworoshye, binyuze mu kubaza abantu ibibazo dukoresheje ubutumwa bugufi. Abantu bagira uruhare mu bushakashatsi nta kiguzi tubaka, ahubwo iyo bamaze kuduha amakuru tubishyurira ubutumwa bwose bakoresheje.”

Yakomeje avuga ko bafasha radio kumenya amakuru y’abayikurikiranye nibura buri masaha abiri, mu gihe televiziyo bayigaragariza uko iri kurebwa buri minota 30.

Ati “Dufite ubushobozi bwo kunonosora ibisubizo baduhaye tukamenya niba badusubije babishyizeho umutima koko. Duhora duhinduranya uburyo ibibazo bikurikiranye, uburyo ibitangazamakuru bikurikiranye, ku buryo niba abantu bari gupfa gusubiza duhita tubibona.”

Umuyobozi w’ishami rishinzwe kumenyekanisha ibikorwa mu Kigo cy’Igihugu cy’Itangazamakuru, RBA, Vuningoma Jean de Dieu yavuze ko ubushakashatsi nk’ubu buzajya bufasha abari mu itangazamakuru kurushaho gutegura ibiganiro bishingiye ku byifuzo by’ababikurikirana.

Ati “Tuzamenya icyo bashaka, na bo bashobore kubona icyo bifuza ku binyamakuru. Ikindi kandi bizafasha n’umuntu cyangwa ikigo gikeneye kwamamaza kumenya ikinyamakuru akwiye gukorana na cyo.”

Yakomeje avuga ko akenshi ibitangazamakuru bitegura ibiganiro bishingiye ku bushobozi bwabyo n’ibikora ubushakashatsi ugasanga birifashisha uburyo umuntu yakwita gakondo.

GeoPoll ikorera mu bihugu bigera kuri 33 byo muri Afurika, ikaba ifasha byinshi mu bigo bikomeye kumenya uko ibicuruzwa na serivisi zabyo zakirwa n’abo zigenewe.

Mu bushakashatsi ikora yifashisha telefoni igendanwa, aho yoherereza umuntu ibibazo bitandukanye akagenda abisubiza. Utifuza kugira uruhare mu bushakashatsi na we yerekwa inzira anyuramo akabihagarika.

Umuyobozi ushinzwe kwagura ubucuruzi bwa GeoPoll muri Afurika y’Amajyepfo, Matt Angus-Hammond

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza