Ibitabo Perezida Kagame asanga urubyiruko rukwiye gusoma

Yanditswe na IGIHE
Kuya 28 Kanama 2018 saa 09:27
Yasuwe :
0 0

Ubwo Perezida Kagame yaganiraga n’urubyiruko rw’abanyamwuga mu ngeri zitandukanye mu kiganiro cyiswe ‘Meet the President’, umwe mu bitabiriye wtwa Mico Thaddée wiga mu Bushinwa yamubajije ibitabo bitatu asanga urubyiruko rwasoma bikarufasha.

Perezida Kagame abinyujije kuri Twitter, yatanze igisubizo, yerekana ko asanga uwamubajije ikibazo ndetse n’urundi rubyiruko basoma igitabo cyitwa ‘How Will You Measure Your Life’ cya Clayton M. Christensen, James Allworth na Karen Dillon.

Hari kandi igitabo cyitwa ‘Emotional Intelligence (Working with Emotional Intelligence) cya Daniel Goleman’ na Thunder from the East-Nicholas D.Kristof & Sheryl WuDunn’.

Mu gitabo ‘How Will You Measure Your Life’ Clayton M. Christensen, James Allworth na Karen Dillon, batera abantu umuhate ndetse n’ubumenyi bwo kugera ku ndoto zabo zose.

Iki ni igitabo cyashimwe na Steve Jobs, umunyamerika wagize uruhare rukomeye mu iterambere ry’ikoranabuhanga ku Isi, akaba umwe mu bashinze uruganda rwa Apple rukora telefoni za iPhone, mudasobwa za iMac, iPad ndetse n’ibindi bikoresho by’ikoranabuhanga.

Steve Jobs yavuze ko ari ‘igitabo cyamuteye imbaraga’ ndetse gifatwa nka kimwe mu bitabo byiza by’ubucuruzi byasohotse.

Ni igitabo kigamije gufasha umusomyi uwo ari we wese yaba umunyeshuri, umwarimu, uri mu mwuga, uwawuvuyemo, umubyeyi, kugera ku ntego ze z’ubuzima.

Iki gitabo kirimo ibintu byagufasha guhuza ubuzima bwawe mu mwuga n’ubundi buzima busanzwe.

Gitanga inama zo gushyira umutima n’igihe cyawe cyose mu byo ukora.

Gitanga amasomo y’uburyo umubano w’umuntu n’abandi ukwiye guhabwa umwanya munini, gutekereza ku bindi ariko buri kimwe kikagira igihe cyacyo no kutagwa mu mutego wo gutekereza ibidafite umumaro.

Mu gitabo ‘Emotional Intelligence cya Daniel Goleman’, umwanditsi ahishura ko icy’ingenzi cyane cyagufasha kugera ku nzozi zawe atari ubuhanga, impamyabumenyi mu bucuruzi, cyangwa imyaka y’ubunararibonye.

Avuga ko ibanga ryagufasha kwitwara neza ku kazi no gutera imbere, ari ‘ukugira ubuhanga bwo kumenya uko utwara ibyiyumviro bya buri wese n’ibyawe ubwawe’. Muri make ni ukwimenya, kugira umwete no kudacika intege.

Igitabo cya Gatatu Perezida Kagame asanga urubyiruko rwasoma ni icyitwa ‘Thunder from the East’ cya Nicholas D.Kristof & Sheryl WuDunn.

Abanditsi bavugamo uko ihungabana ry’ubukungu muri Aziya ryagize ingaruka kuri za miliyoni z’abantu ryari ikintu cyiza cyagombaga kuba.

Bashingira ko ryasenye icyenewabo mu myanya y’akazi no mu buyobozi, guheza ibituruka mu bindi bihugu ndetse n’ibyemezo bya za Guverinoma byapyinagaje abacuruzi imyaka myinshi, bigatuma uyu mugabane wongera gutera imbere.

Mu biganiro byiswe ‘Meet the President’, Umukuru w’Igihugu yasabye urubyiruko gukoresha ubwenge bwarwo n’ubumenyi rwakuye mu ishuri, mu gushakira ibisubizo ibibazo bihari, aho gutinya kubukoresha ngo badahomba.

Perezida Kagame yabwiye urubyiruko ibitabo bitatu rwasoma

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza