Ibishingirwaho mu gusaba gatanya ku bashakanye byavuguruwe

Yanditswe na Kanamugire Emmanuel
Kuya 15 Nzeri 2016 saa 12:19
Yasuwe :
0 0

Itegeko rishya rigenga abantu n’umuryango rigaragaza impinduka ku bishobora gutuma abashyingiranywe basaba gutana burundu.

Iri tegeko nº 32/2016 ryo ku wa 28/08/2016 ryasohotse mu Igazeti ya Leta nº37 yo ku wa 12/09/2016.

Ubusanzwe abasaba gatanya bashingiraga ku bintu bitandatu biteganywa n’itegeko ryo muri 1988 birimo kuba umwe muri bo yarahawe igihano cy’ icyaha gisebeje cyane, ubusambanyi, guhoza undi ku nkeke, kwanga gutanga ibitunga urugo, guta urugo igihe cy’amezi cumi n’abiri nibura no kumara nibura imyaka itatu abashakanye batabana ku bushake bwabo.

Itegeko rishya rigenga abantu n’umuryango ryongeyeho izindi mpamvu ebyiri zashingirwaho n’umwe mu bashakanye mu gihe asaba ubutane.

Izo mpamvu ziteganywa n’ingingo ya 218 ni ihohoterwa rishingiye ku gitsina ndetse no kutabana mu gihe kirenze amezi cumi n’abiri akurikirana uhereye igihe habereye ishyingirwa nta mpamvu zifite ishingiro.

Usibye izo mpamvu ebyiri, iri tegeko rishya rinateganya ko abashakanye bamaze nibura imyaka ibiri batabana ku bushake bwabo (aho kuba imyaka itatu nk’uko byari bimeze mu itegeko rya 1988) bashobora gusaba ubutane.

Akandi gashya iri tegeko rizanye ni uko kutabana bitewe n’uko umwe mu bashyingiranywe afashwe nabi bititwa guta urugo mu gihe yagiye abimenyesheje ubuyobozi bumwegereye bigakorerwa inyandiko.

Usibye kuba iri tegeko rishya risa n’iryoroshya kandi rikagura impamvu zashingirwaho hasabwa ubutane, hari n’izi mpinduka ziri mu iri tegeko mu birebana n’ubutane.

Abakozi bo mu rugo bashobora gutanga ubuhamya mu rubanza rw’ubutane

Iri tegeko rishya riteganya ko iyo bibaye ngombwa ko hakorwa iperereza, umuntu wese ashobora kubazwa mu rubanza. Ubuhamya bw’abana, ababyeyi b’abashyingiranwe n’ubw’abakozi bo mu rugo rwabo na bwo bwitabwaho (ingingo ya 222).

Urukiko rushobora gutegeka umwe mu bashyingiranwe kuva mu rugo akajya kuba acumbitse ahandi

Itegeko rishya rigenga abantu n’umuryango mu ngingo yaryo ya 224 riteganya ko aho urubanza rw’ubutane rwaba rugeze hose, umucamanza ashobora gufata ibyemezo by’agateganyo byerekeye ababuranyi, abana babyaranye ndetse n‘umutungo.

Ingingo ya 225 ivuga ko umucamanza ashobora kugena urera abana mu gihe cy’urubanza rw’ubutane kugira ngo arengere inyungu zabo. Ashobora kubashinga by’agateganyo umwe mu bashyingiranywe cyangwa undi muntu akanagena uruhare rwa buri wese mu bashyingiranywe ku bitunga abana.

Buri wese mu bashyingiranywe, yaba urega cyangwa uregwa, ashobora gusaba umucamanza uruhushya rwo kuva mu rugo rwabo, akajya kuba ahandi. Buri wese kandi mu bashyingiranywe ashobora gusaba urukiko gutegeka uwo bashyingiranywe kuva mu rugo rukamugenera uburyo bwo gucumbika ahandi.

Icyakora, umwe mu bashyingiranywe ushinzwe kumenya abana agomba kuguma mu rugo kugeza igihe urubanza rwa burundu rutanga ubutane ruzasomerwa (ingingo ya 226).

Abashakanye bari mu rubanza rw’ubutane bashobora kugabanywa imitungo by’agateganyo kabone n’iyo rwaba rutarasomwa

Ku birebana n’ Imicungire y’umutungo w’abashyingiranywe mu gihe bategetswe kuba ahantu hatandukanye, uretse igihe abashyingiranywe basezeranye ivanguramutungo risesuye, umutungo wimukanwa n’utimukanwa ugabanywa abashyingiranywe mu buryo bw’agateganyo nyuma yo kuwukorera ibarura rishyirwaho umukono n’impande zombi kandi hakitabwa ku nyungu z’umwana n’ iz’ umwuga w’abashyingiranywe (ingingo ya 227).

Buri wese mu bashyingiranywe ategetswe kwita kuri uwo mutungo. Nta na rimwe ashobora kuwugurisha, kuwutanga cyangwa kuwutangaho ingwate. Mu gihe umwe mu bashyingiranywe atabyubahirije ku mpamvu z’uburiganya, uwo bashyingiranywe ashobora gusaba iseswa ry’ibyakozwe na mugenzi we.

Usibye gutana burundu biturutse ku mpamvu umunani ziteganyijwe mu ngingo ya 218 twavuze hejuru, iri tegeko rishya rigenga abantu n’umuryango ryanateganyije ko abashakanye byemewe n’amategeko bashobora gusaba gutana biturutse ku bwumvikane bwabo. Bisaba ko babanza kumvikana ku gusesa ishyingirwa no ku nkurikizi zaryo kandi bagashyikiriza umucamanza amasezerano akemura ingaruka z’ubutane.

[email protected]


Niba ushaka kuduha inkuru waduhamagara kuri 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza