Ibiro Ntaramakuru by’Abashinwa byasabwe kutaba nk’ibinyamakuru bigaragaza Afurika nk’umugabane w’ibibazo

Yanditswe na IGIHE
Kuya 12 Ugushyingo 2019 saa 11:46
Yasuwe :
0 0

Ibiro Ntaramakuru by’Abashinwa, Xinhua, byashimangiye ubufatanye bwabyo n’ibitangazamakuru byo muri Afurika, mu rugamba rwo kumenyekanisha isura nziza y’umugabane wa Afurika itandukanye n’igaragazwa n’itangazamakuru ryo mu Burengerazuba bw’Isi nk’umugabane wugarijwe n’ibyorezo, inzara n’ibindi bibi.

Xinhua ni byo biro ntaramakuru bifite umubare munini w’ababihagarariye ku isi kuko ifite ibiro mu bihugu bigera ku 170 ku migabane yose, ikagira abakozi barenga 5,000. Ni ibiro ntamakuru bya Leta y’u Bushinwa, ndetse n’Umuyobozi wabyo muri kiriya gihugu aba ari ku rwego rwa Minisitiri muri Guverinoma.

Kuva ku wa Gatanu w’icyumweru gishize, i Nairobi muri Kenya habereye inama y’iminsi itatu yari ihurije hamwe abayobozi b’ibitangazamakuru n’abanditsi bakuru b’ibinyamakuru birenga 40 byo mu bihugu bigera kuri 15 byo muri Afurika ariko bikoresha Ururimi rw’Icyongereza.

Ni inama yari igamije kumurika urubuga ruhuriza hamwe inkuru, amafoto n’amashusho rwakozwe n’itsinda ry’impuguke mu by’ikoranabuhanga rya Xinhua, ruzajya rwifashishwa n’ibinyamakuru bifitanye amasezerano nk’uburyo bwo kumenya amakuru abera hirya no hino ku Isi.

Uru rubuga rufite uburyo bworohereza ibitangazamakuru byasinyanye amasezerano y’imikoranire na Xinhua, ku buryo bibasha kubona amakuru, amafoto na video biba byakozwe ku Isi hose, bikaba byayakoresha mu kusakaza amakuru ku babikurikira.

Umwanditsi Mukuru wungirije wa Xinhua muri Afurika akaba n’Umuyobozi wungirije wa Xinhua Africa, Wu Zhiqiang, yavuze ko biteguye gukomeza imikoranire n’ibitangazamakuru byo muri Afurika hagamijwe gutangaza amakuru ya nyayo y’uyu mugabane.

Ati “Xinhua muri Afurika irifuza gukomeza imikoranire igamije kugeza ku bafatabuguzi bacu n’abaturage bose b’Isi bakurikirana amakuru, mu kubagezaho amafoto, amashusho y’ibikorwa by’ingenzi bya Afurika.”

Muri iyi nama hasinywe amasezerano y’imikoranire hagati y’ibinyamakuru bitatu byiyongere ku bindi byari byayasinye mbere. Ibyasinye birimo kimwe cyo mu Rwanda (Taarifa), icyo muri Ghana na Liberia.

James Munyaneza, ushinzwe kugenzura ibijyanye n’amakuru atangazwa kuri The New Times (Managing Editor), wavuze mu izina ry’abanyarwanda bari bitabiriye iyi nama; yashimye uburyo Ibiro Ntaramakuru by’Abashinwa bitigeze bifata umurongo wo guharabika u Rwanda mu mahitamo yarwo atandukanye arimo nka gahunda yo guteza imbere ibikorerwa mu Rwanda, Made in Rwanda.

Yavuze ko hari ibitangazamakuru mpuzamahanga bifite ibiganiro na gahunda zitambutswa mu ndimi gakondo z’ibihugu, asaba ko mu gihe bishoboka, Xinhua yazareba uko nayo ishyiraho iyi gahunda mu rwego rwo gukomeza kumenyekanisha uyu mugabane.

Charles Omondi ukorera Daily Nation yo muri Kenya, we yasabye Xinhua kutaba nk’ibindi binyamakuru mpuzamahanga bigaragaza Afurika nk’umugabane w’ibibazo, ahubwo ko hakwiye no kwitabwa ku mahirwe yibitsemo.

Ati “Reka tugerageze kugaragaza isura nziza ya Afurika. Hari ibibi bigaragazwa bya Afurika, ariko ntabwo ariyo byonyine bihari.”

Mu gihe hari ihangana ku isoko mu itangazamakuru, Xinhua yasabwe kuguma mu murongo wayo ugamije iterambere rya Afurika, ikirinda kuzagwa mu mutego w’ibindi binyamakuru.

Xinhua kandi yashimiwe ko ikora akazi kayo neza, ntibe nk’igikoresho cy’impinduramatwara mu gihe u Bushinwa bukataje imikoranire na Afurika.

Michael Omondi uri mu buyobozi bukuru bwa Xinhua Africa, amurika urubuga rushya ruzajya rugaragaramo amashusho, inkuru n'amafoto mu buryo butari busanzwe bumenyerewe
Magnus Mazimpaka washinze Taarifa amaze gusinya amasezerano na Xinhua
Elvis Darko wo muri Ghana nyuma yo gusinya amasezerano y'imikoranire n'Umuyobozi wa Xinhua Africa, Wang Jida
Ikinyamakuru The News cyo muri Liberia ni kimwe muri bitatu byasinye amasezerano y'imikoranire na Xinhua
Charles Omondi ukorera Daily Nation yo muri Kenya, yavuze ko bidakwiye kugaragaza Afurika nk'umugabane w'ibibazo gusa
Umwanditsi Mukuru wungirije wa Xinhua muri Afurika akaba n’Umuyobozi wungirije wa Xinhua Africa, Wu Zhiqiang, yavuze ko biteguye gukomeza imikoranire n’ibitangazamakuru byo muri Afurika
James Munyaneza wa The Newtimes yashimye uburyo Xinhua yakomeje kuba mu murongo umwe n'u Rwanda mu mahitamo rwagiye rufata mu bihe bitandukanye
Abayobozi b'ibitangazamakuru n'abanditsi bakuru baturutse mu bihugu bigera kuri 15 nibo bari bitabiriye iyi nama yabereye mu Mujyi wa Nairobi

Indi nkuru wasoma: Umwanditsi Mukuru wa Xinhua yashimye umusanzu wa IGIHE mu iterambere ry’itangazamakuru mu Rwanda


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza