Ibinyabiziga bya Leta bigiye gushyirwamo ikoranabuhanga rikumira ababikoresha mu nyungu zabo

Yanditswe na Evariste Nsengimana
Kuya 26 Ugushyingo 2019 saa 01:10
Yasuwe :
0 0

Minisitiri w’Ibikorwa Remezo (Mininfra), Amb. Gatete Claver, yatangaje ko guhera muri Mutarama 2020, imodoka zikoreshwa ibikorwa n’imishinga bya Guverinoma zizaba zamaze gushyirwamo ikoranabuhanga rigenzura niba abashoferi batazikoresha mu bitayifitiye akamaro, mu rwego rwo kunoza imicungire yazo.

Minisitiri Gatete yabivuze kuri uyu wa 26 Ugushyingo 2019 ubwo yagiranaga ikiganiro n’Abadepite bagize Komisiyo y’Ingengo y’Imari n’Umutungo by’Igihugu ku micungire y’umutungo w’igihugu uri mu nshingano za Minisiteri ayobora.

Muri ibi biganiro hagaragajwe ko ibinyabiziga bya Leta byakunze kugaragara ko bicungwa nabi ndetse ko hari n’ababikoresha babijyanye mu bikorwa bidafitiye Leta inyungu.

Minisitiri Gatete yavuze ko hari aho wasangaga byafashe indi ntera ku buryo hari ababijyanaga ku bibuga by’imipira, ku tubari, mu mihango yo gushyingura n’ibindi nyamara bigenewe kujya ahantu biri mu kazi gusa.

Ati “Bikajyanwa mu minsi y’imibyizi no mu mpera z’icyumweru. Uko zigenda ni nako zinywa amavuta, ni ko zangirika. Hari ubwo wasangaga zihariye ¾ by’impanuka ziba ku modoka za Leta, ugasanga no kuburana turatsindwa.”

Minisitiri Gatete yavuze ko Leta yafashe umwanzuro mu 2008 waje kuvugururwa mu 2014 wo kugabanya imidoka za Leta zihabwa abakozi bayo isigaye ibitangaho arenga miliyari 5 Frw.

Yavuze ko ubu Leta isigaye ifite imodoka nke zikora mu mishinga n’ibikorwa bya Leta kandi ko nazo igiye gushyiraho ikoranabuhanga rizakumira abazikoresha mu bidafitiye inyungu Guverinima.

Ati “Turimo gushyiramo uburyo bw’ikoranabuhanga rigenzura imodoka zose, ibyo zirimo gukora, aho zaraye, aho zahagaze, umwanya zahagaze, Lisansi yanyoye, buri kimwe cyose kikaba kizwi kugira ngo ntihagire ukubeshya uburyo ubwo aribwo bwose.”

Gatete yavuze ko iryo koranabuhanga rizafasha Leta kugenzura abashoferi bajyaga bajyana imodoka za Leta mu bikorwa bitayifitiye inyungu bagashaka ibyo babeshya, bikayiteza igihombo.

Ati “Iyo izatangira gukoreshwa ku wa 1 Mutarama 2020, ubu bari mu igerageza, bari guhugura abantu.”

Perezida wa Komisiyo y’Ingengo y’Imari n’Umutungo by’Igihugu, Munyaneza Omar, yavuze ko iri koranabuhanga ari umushinga wo kwishimirwa kuko rizanoza imicungire y’ibinyabiziga bicye bigikoreshwa mu bikorwa bya Leta.

Minisiteri y’Ibikorwa remezo igaragaza ko Leta ifite ibinyabiziga bisaga 4472 birimo imodoka zikora ibikorwa byayo [zambaye Pulake GR] 1390, izikora mu mishinga yayo [zambaye pulake GP] 568, moto zikora ibikorwa byayo [zambaye Pulake GRM] 1051 naho izikora imishinga yayo [zambaye Pulake GPM] 1463.

Ibinyabiziga bya Leta bigiye gushyirwamo ikoranabunga rizajya ryifashishwa mu kurigenzura

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza