Ibihugu byo muri COMESA biri kwiga uko abacuruzi bato n’abaciriritse bakwimakaza ikoreshwa ry’ikoranabuhanga

Yanditswe na Akayezu Jean de Dieu
Kuya 21 Mutarama 2021 saa 11:17
Yasuwe :
0 0

Akanama k’Ubucuruzi mu Muryango w’Ubucuruzi w’Akarere ka Afurika y’Iburasirazuba n’Amajyepfo, CBC [COMESA Business Council] ku bufatanye na banki zo muri uyu muryango byagiranye ibiganiro bigamije kwemeza politiki imwe y’ikoreshwa ry’ikoranabuhanga mu bacuruzi bato n’abaciriritse (SMEs).

Ibi biganiro byabereye i Kigali ku wa 20 Mutarama 2021, byitabirwa n’ibihugu icyenda byari bihagarariwe na ba Guverineri ba Banki Nkuru, abaminisitiri bafite imari mu nshingano, abagenzura ikoranabuhanga, abanyenganda, abafite ibigo by’itumanaho, banki z’ubucuruzi na ba rwiyemezamirimo bato n’abaciriritse.

Umuyobozi w’Inama y’Ubucuruzi ya COMESA (COMESA Business Council/CBC), Uwera Sandra, yavuze ko bafite intego y’uko ibigo by’imari byose byo muri uyu muryango bigira ikoranabuhanga ndengamipaka rihurijwe hamwe kugira ngo umuturage abashe gutumiza ibicuruzwa mu kindi gihugu atarinze kubikuza amafaranga.

Yakomeje agira ati “Gushyiraho ikoranabuhanga rihuriweho mu kwishyura ku bacuruzi bato n’abaciriritse bizafasha mu kuva mu guhererekanya amafaranga ku nganda nto tujya mu bukungu bushingiye ku ikoranabuhanga buhendutse, bworoshye kandi buciye mu mucyo.”

“Iri koranabuhanga ryitezweho kuzamura ingano y’ihererekanya bicuruzwa ndengamipaka, byongerere imbaraga ba rwiyemezamirimo bato n’abaciriritse ndetse n’uruhare bagira mu bucuruzi bw’Akarere.”

Muri ibi biganiro hakomojwe ku korohereza no guteza imbere ba rwiyemezamirimo bato n’abaciriritse n’uburyo uruhare rwabo mu gukoresha ikoranabuhanga mu bucuruzi no guhererekanya amafaranga, ibintu bavuze ko byatuma habaho iterambere ry’ubukungu n’ihangwa ry’imirimo.

Umunyamabanga Uhoraho muri Minisiteri y’Ubucuruzi n’Inganda, Sebera Michel, yavuze ko “Kugira ngo tubashe kubyaza umusaruro ibyiza by’ubukungu bushingiye ku ikoranabuhanga, imbogamizi zose zishobora gukoma mu nkokora ba rwiyemezamirimo bato n’abaciriritse zigomba kubanza kuvanwaho.”

Ibi bishimangirwa n’Umuyobozi w’Urugaga rw’Abikorera mu Rwanda, Robert Bafakulera, uvuga ko kwemeza politiki y’ikoranabuhanga mu bigo bito n’ibiciritse muri COMESA ari ngombwa cyane kugira ngo ihererekanywa ry’amafaranga hagati y’abacuruzi ryorohe, ryihute kandi rihenduke.

Yagize ati “Abacuruzi bato bafite uruhare rukomeye mu iterambere ry’ubukungu n’imibereho y’abatuye umuryango COMESA binyuze mu bucuruzi bwambukiranya imipaka, nyamara baracyahererekanya amafaranga mu buryo budakwiye kandi bubateza ibyago”.

Bafakulera avuga ko icyorezo cya COVID-19 kizasiga ubwiyongere bw’abakoresha ubu buryo, ibyo abona nk’imbogamizi ku guteza imbere inganda nto ndetse n’ubusumbane mu kugera ku bikorwa remezo bikenerwa.

Ati “Hari byinshi bikenewe gukorwa kugira ngo habashe kubaho ukudaheza ba rwiyemezamirimo bato n’abaciriritse.”

Uwungirije Umunyamabanga Mukuru wa COMESA, Amb. Kipyego Cheluget, yavuze ko iyi politiki imwe y’ikoranabuhanga mu bigo by’imari bito n’ibiciriritse muri uyu muryango izatanga umusaruro cyane ko ibihugu byagaragaje ubushake bwo kuyishyigikira.

COMESA yerekana ko mu bucuruzi bwose bwanditswe mu bihugu bigize uyu muryango, ibigera kuri 96% ari ubucuruzi buto n’ubuciriritse.

Politiki y’ikoranabuhanga ihuriweho mu bigo bito n’ibiciriritse muri COMESA izafasha kongera ubucuruzi ku rugero byibura rwa 10% buri mwaka.

Gahunda yo kwishyura hifashishijwe ikoranabuhanga ikomeje kwimakazwa mu Rwanda aho Banki Nkuru y’Igihugu (BNR) igaragaza ko byihutisha ubukungu kandi amafaranga atakara mu bucuruzi akagabanuka cyane.

Imibare yo mu 2017 igaragaza ko nibura buri mwaka BNR itakaza miliyari ebyiri zo gukoresha inoti nshya n’ibiceri bisaza kubera guhererekanywa mu ntoki.

U Rwanda rufite intego ko mu mwaka wa 2024, amafaranga abarirwa ku kigero cya 80 % y’umusaruro mbumbe w’igihugu azajya ahererekanywa hifashishijwe ikoranabuhanga, avuye kuri 34.6% mu 2019.

Umuyobozi w’Inama y’Ubucuruzi ya COMESA, Uwera Sandra, yavuze ko bafite intego y’uko ibigo by’imari byose byo muri uyu muryango bigira ikoranabuhanga
Umunyamabanga Uhoraho muri Minisiteri y’Ubucuruzi n’Inganda, Sebera Michel, yavuze ko imbogamizi zishobora gukoma mu nkokora ba rwiyemezamirimo bato n’abaciriritse zigomba kuvanwaho
Umuyobozi w’Urugaga rw’Abikorera mu Rwanda, Robert Bafakulera, yashimangiye ko kwemeza politiki y’ikoranabuhanga mu bigo bito n’ibiciritse ari ingenzi
Ibihugu byo muri COMESA biri kwiga uko abacuruzi bato n’abaciriritse bakwimakaza ikoreshwa ry’ikoranabuhanga mu nama yateraniye mu Mujyi wa Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .