Kwamamaza

Ibihugu by’i Burayi biramutse bifata amasomo byaduha agahenge-Perezida Kagame

Yanditswe kuya 31-08-2016 saa 20:27' na Rabbi Malo Umucunguzi


Perezida Paul Kagame yavuze ko ibihugu by’i Burayi bitorohewe n’ibibazo by’imiyoborere, ariko bigakomeza gushaka kwigisha Abanyafurika uko bagomba kwiyobora, ibintu avuga ko bitumvikana hagendewe ku bibazo bifite uyu munsi.

Kuri uyu wa Gatatu nibwo Perezida Kagame yaherekeje Patrice Talon wa Benin wari umaze iminsi itatu mu ruzinduko rw’akazi mu Rwanda, maze mbere y’uko yurira rutemikirere, Perezida Talon ahamiriza itangazamakuru ko imiyoborere y’u Rwanda ari intangarugero muri Afurika, ndetse izahindura Afurika nk’uko inagera ku bayobozi muri uyu mugabane uyu munsi.

Nyuma ya manda ebyiri Perezida Kagame ayobora Abanyarwanda, baheruka kumusaba ko yakomeza kubayobora na nyuma ya 2017 ubwo azaba asoje manda ya kabiri, ndetse banabishimangiye muri referendumu bahindura itegeko nshinga, igikorwa bashyigikiye 98.3%.

Ibi Perezida Kagame yaje no kubibemerera, mu gihe nka Perezida Patrice Talon we ubwo yarahiriraga kuyobora Benin muri Mata uyu mwaka, yasezeranyije abaturage kuzayobora manda imwe rukumbi, anasezeranya impinduka nyinshi muri Politiki n’ubukungu.

Nubwo u Rwanda na Benin bitakurikiye inzira imwe kuri iyo ngingo, mu kiganiro n’abanyamakuru ku munsi wa nyuma w’uruzinduko rwa Perezida Talon mu Rwanda, uyu mukuru w’igihugu yavuze ko abaturage ubwabo ari bo bagena uko bayoborwa hagendewe ku mibereho yabo, amateka n’intego bimirije imbere.

Ati “Abaturage, amateka yabo, akarere, ubuzima babamo, n’ibyo bakeneye ni byo bigena amategeko igice runaka kigenderaho, agenga ubuzima muri rusange. Ni cyo gikenewe uyu munsi.”

Ni ingingo yashimangiwe na Perezida Kagame wavuze ko ikibazo cya manda akibazwa kenshi akanagitangira ibisubizo, nubwo gihora kigaruka kandi kigashimangirwa n’Abanyaburayi.

Ati “Mu Burayi, sintekereza ko ibyakozwe mu gihugu kimwe ari na byo biba ahandi. Hari ibihugu mu Burayi aho abayobozi bayobora manda zirenze eshatu. Hari byinshi mu bihugu bayobora manda ebyiri cyangwa imwe, gusa bakayobora imwe kuko baba batsinzwe iya kabiri, icyo ni ikindi kibazo. Gusa abandi bakomeza kuya gatatu, iya kane, iya gatanu.’’

Perezida Kagame yavuze ko ibyo bihugu by’i Burayi bikora ibinyuranye no muri bimwe mu bihugu bya Afurika, ariko ngo iyo biba byumva ko hari impamvu zigena uko abaturage bagomba kwiyobora, ikibazo nk’iki nticyajya kiza buri munsi.

Ati “Nifuza ko abo bantu babona amasomo nk’uko natwe tubigerageza, ahari baduha akaruhuko.Ariko niba ari byo bifata umwanya munini w’akazi kabo njye nta kibazo mbifiteho, igihari ni uko twe Abanyarwanda kandi ntekereza ko ari na ko abandi Banyafurika babyumva, dushaka kwiyobora ubwacu kandi kwiyobora neza ntabwo bizaza ari impano duhawe n’abanyamahanga.’’

‘‘Ntabwo ari byo na gato, kuko muri iyi minsi twabonye ko abo bantu batorohewe. Sinzi n’ukuntu bahaguruka bavuga ibijyanye n’imiyoborere, bafite ibibazo bikomeye Kandi niba uyobora igihugu cy’abaturage bagera kuri miliyoni 60, muri manda aho abaturage 12% bonyine ari bo bagushyigikiye kandi ugashaka ko mbyigana, hagomba kuba hari ikibazo gikomeye. Niba ushaka kumbwira ko ariko demokarasi ikora ngo mbikurikize, ubwo nzahora nyuranya na byo.’’

Mu burayi hari ibihugu bigira abaperezida bemererwa manda zose zishoboka mu gihe abaturage babatoye birimo nk’u Butaliyani, Serbia, u Busuwisi, Iceland, hakaba n’ibyemera manda ebyiri ariko umuyobozi akazongera kwiyamamaza, birimo nk’u Burusiya na Azerbaijan.

Perezida Kagame na Talon wa Benin mu kiganiro n'abanyamakuru
Perezida Kagame yavuze ko iyaba Abanyaburayi bahabwaga amasomo byatanga agahenge ku Banyafurika
Bamwe mu banyamakuru bitabiriye iki kiganiro

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved