Ibigo byo mu Rwanda byatangiye kurambagirizwa kuzitabira inama ihuza Afurika n’u Bufaransa

Yanditswe na Ishimwe Israel
Kuya 14 Ugushyingo 2019 saa 10:14
Yasuwe :
0 0

Abayobozi muri Komite itegura Inama izahuza u Bufaransa na Afurika mu 2020 bari mu Rwanda aho batangiye gusura ibigo bya leta n’ibyigenga mu kubikangurira kuzayitabira.

Inama ya 28 y’u Bufaransa na Afurika izabera mu Mujyi wa Bordeaux ku wa 4-6 Kamena 2020. Yahaye umwihariko kwiga ku ‘iterambere rirambye ry’imijyi’ ariko izanareba kuri Politiki, ubukungu n’umuco.

U Bufaransa bwayitumiyemo ibihugu 54 bya Afurika; biteganyijwe ko izitabirwa n’abakuru b’ibihugu, abikorera n’abandi.

Iyi nama izaganirirwamo ingamba zirambye zo guhangana n’ibibazo biri mu mijyi ya Afurika n’iy’u Bufaransa.

Kuri uyu wa Kane, Umuyobozi Wungirije w’Ikigo cy’Igihugu cy’Iterambere (RDB), Niyonkuru Zephanie, yakiriye itsinda ry’abayobozi mu Ishami ry’Ubukungu bwa Afurika y’Uburasirazuba rikorera muri Ambasade y’u Bufaransa i Nairobi, riyobowe na Benoît Gauthier baganira ku ruhare rw’u Rwanda muri iyo nama.

Mu byo baganiriyeho harimo gutoranya ibigo bizaturuka mu Rwanda bizayitabira bikanerekanamo ibyo bikora no kugaragaza ahari amahirwe y’ishoramari mu gihugu.

Byagarutsweho mu kiganiro Umuyobozi ushinzwe ibikorwa (Chargé d’Affaires) bya Ambasade y’u Bufaransa mu Rwanda, Jérémie Blin n’Umunyamabanga wungirije mu itsinda ritegura inama ya Afurika n’u Bufaransa, Stephan Dubost, bagiranye n’itangazamakuru kuri uyu wa 14 Ugushyingo 2019.

Blin yavuze ko ‘‘U Rwanda ni igihugu twitayeho kuko rushyira imbere imiturire y’imijyi. Umwihariko w’iyi nama ni uko ari ubwa mbere izaba ivuga ku iterambere ry’imijyi. Intego ihari ni ukuganira ku buryo bwo kugira imijyi itekanye.’’

Yashimangiye ko kuva Perezida Macron yatorwa yatsuye umubano n’ibihugu bya Afurika.

Mu nzego iri tsinda rizaganira nazo harimo n’Urugaga rw’Abikorera (PSF) mu gihe abandi bazakurikiranwa na Ambasade.

Dubost yakomeje ati “Tuzaganira ku mijyi irambye, ifite serivisi zose z’ibanze, ishobora guturwa kandi ifite ibyangombwa nkenerwa byose.’’

Yavuze ko umubano wa Afurika n’u Bufaransa wubakiye ku mateka n’umubano utuma impande zombi zikomeza kunoza imikoranire.

Ati “Afurika ni umugabane dushishikariza abashoramari kugana kuko hari amahirwe menshi awurimo.’’

Afurika ifite imijyi ituwe n’abaturage miliyoni 472, ndetse bazikuba inshuro ebyiri mu myaka 25 bagere kuri miliyari mu 2040. Nibura mu 2050, imijyi ya Afurika izaba ituwe n’abaturage b’inyongera basaga miliyoni 187.

Ikibazo cy’imiturire cyatangiye guhabwa icyerekezo ndetse cyashyizwe muri gahunda ya Guverinoma y’imyaka irindwi, aho igihugu cyiyemeje kubaka imidugudu y’ibyitegererezo no kuvugurura utujagari mu gufasha Abanyarwanda gutura neza, gusaranganya ubukungu no kubona imirimo myinshi idashingiye ku buhinzi.

U Rwanda rwihaye intego ko nibura mu 2024, abantu 35% bazaba batuye neza mu mijyi, 70% bazaba batuye neza mu midugudu.

Ibipimo by’Ikigo cy’Igihugu cy’Ibarurishamibare (NISR) bigaragaza ko ubwiyongere bw’Abanyarwanda mu myaka 10 bwazamutseho 2.6%. Byitezwe ko mu myaka 25 uzava kuri miliyoni 11.8, ukagera ku zisaga 21 mu 2041.

Gutuza abaturage mu mijyi biri mu bintu by’ingenzi bigaragaza impinduka ku bukungu bw’igihugu.

Inama y’iminsi itatu izahuza u Bufaransa na Afurika yatumiwemo ibigo bisaga 500 na ba rwiyemezamirimo b’Abanyafurika bagera ku 1000.

Biteganyijwe kandi ko izahurirana n’ibikorwa by’imyidagaduro birimo ibitaramo n’umukino uzahuza ikipe y’intoranywa z’Abafaransa n’Abanyafurika.

Inama ihuza Afurika n’u Bufaransa iheruka yabereye i Bamako muri Mali mu 2017. Ni urubuga abakuru b’ibihugu bunguraniramo ibitekerezo ku ngingo zitandukanye zirimo politiki, ubukungu n’ umutekano.

Iyi nama iba rimwe mu myaka ibiri ikabera mu Bufaransa cyangwa mu gihugu cy’ikinyamuryango mu bivuga Igifaransa uzwi nka Francophonie.

U Bufaransa ni igihugu cya kabiri ku Mugabane w’u Burayi cyohereza ibicuruzwa byinshi muri Afurika.

Umuyobozi Wungirije w’Ikigo cy’Igihugu cy’Iterambere (RDB), Niyonkuru Zephanie (hagati), yakiriye itsinda ry’abayobozi mu Ishami ry’Ubukungu bwa Afurika y’Uburasirazuba rikorera muri Ambasade y’u Bufaransa i Nairobi baganira ku Nama ya 28 izahuza Afurika n’u Bufaransa
Ibigo byo mu Rwanda byatangiye kurambagirizwa kuzitabira inama ihuza Afurika n’u Bufaransa izabera mu Mujyi wa Bordeaux ku wa 4-6 Kamena 2020
Perezida Kagame yitabiriye Inama ya 27 ihuza u Bufaransa n’ Afurika yabereye i Bamako muri Mali mu 2017

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza