Ibigo by’amashuri byashyiriweho uburyo bwihariye bwo kwizihiza Umuganura

Yanditswe na Evariste Nsengimana
Kuya 21 Nyakanga 2018 saa 11:25
Yasuwe :
0 0

Minisiteri y’uburezi yasabye ibigo by’amashuri yose abanza, ayisumbuye n’amakuru, cyane cyane acumbikira abanyeshuri, kubateganyiriza uburyo bwihariye bwo kwizihiza umunsi w’Umuganura uzaba ku wa 3 Kanama 2018.

Mu ibaruwa iyi minisiteri yandikiye abayobozi bwose b’uturere ku wa 19 Nyakanga 2018, yabasabye ko amashuri yose aho ava akagera agomba kwizihiza umunsi w’umuganura, uzaba ufite insanganyamatsiko igira iti “Umuco, Isoko y’ubumwe n’ishingiro ryo kwigira’

Iyi baruwa yashyizweho umukono n’Umunyamabanga Uhoraho muri MINEDUC, Mulindwa Samuel, hari aho igira iti “Bitewe na gahunda y’isozwa ry’igihembwe cya kabiri cy’umwaka w’amashuri wa 2018, iyi tariki izahura n’ibiruhuko rusange kandi amwe mu mashuri azaba yaratangiye ibiruhuko, turasaba ko hagandewe ku ngengebihe yo gusoza ibiruhuko, buri kigo cy’ishuri cyakwizihiza umunsi w’umuganura.”

Ikomeza ivuga ko uwo munsi ku mashuri uzahuzwa n’isozwa ry’igihembwe cya kabiri, ukaba n’umwanya mwiza wo kwishimira umusaruro wabonetse muri icyo gihembwe, ndetse ko ubuyobozi bw’Akarere bugomba guteganya ikigo kimwe uzizihirizwamo ku buryo bwihariye.

Ku mugereka wayo harimo ingingo zitandukanye zizaganirizwa abanyeshuri zibanda cyane ku muganura, nabo bakavuga uruhare rwabo ku muganura w’umuryango wabo n’igihugu muri rusange.

Abahize abandi kandi bazatanganzwa mu ruhame ndetse bagenerwe n’amashimwe, banahige uburyo bazafasha bagenzi babo gutsinda ibyabananiye.

Abarezi nabo bazajya bagaragaza ishuri n’ikigo bitsindisha kurusha ayandi mu Karere, hanabeho kuremera abanyeshuri batishoboye bahabwe ibikoresho by’ishuri no kugaragaza ibikorwa by’umuco Nyarwanda, ubusabane n’ibindi.

Umuganura usobanuye byinshi

Mu kiganiro yagiranye n’itangazamukuru ku wa Kane, Minisitiri w’umuco na Siporo, Uwacu Julienne, yavuze ko kwizihiza umuganura ari umwanya wo kwishimira umusaruro Abanyarwanda babonye mu bikorwa bitandukanye, ko bigomba gukorwa hanazirikanwa ko urugendo rukiri rurerure, bagakomeza gushyira imbere umurimo nk’uburyo bwo kurusoza amahoro.

Hambere guhera mu binyejana bisaga 12, Umuganura wizihizwaga mu gihe cy’umwero w’amasaka bakishimira uburumbuke, bikaba n’igihe cyo gusabana k’umuryango mugari hamwe n’abaturanyi, banywa amarwa ya Kinyarwanda, bafite umutsima w’amasaka, amata y’inka, isogi irimo ibirunge, bakanakora indi mihango ya Kinyarwanda.

Gusa muri iki gihe byarenze urwego rwo kwita ku musaruro w’ubuhinzi n’ubworozi gusa, ahubwo bigera no mu zindi zireba ubuzima n’iterambere by’Abanyarwanda.

Uyu mwaka umuganura uzizihizwa uhujwe n’icyumweru cy’Iserukiramuco Nyafurika ry’Imbyino ‘Fespad’ rigiye kubera mu Rwanda ku nshuro ya cumi, rizatangira ku wa 29 Nyakanga kugera ku wa 3 Kanama 2018, rizakorerwa mu turere dutandukanye tw’igihugu.

Izatangirizwa mu Mujyi wa Kigali ku wa 29 Nyakanga ikomereze mu Ntara y’Amajyaruguru mu Karere ka Musanze, i Rubavu mu Ntara y’Iburengerazuba, i Rwamagana mu Burasirazuba, i Huye mu Majyepfo risorezwe i Nyanza.

Hazanakorwa igitaramo ndangamuco kizwi nka “i Nyanza twataramye’ ku wa 2 Kanama, hazanizihirizwe Umunsi w’umuganura ku rwego rw’igihugu, ku wa 3 Kanama.

Umunyamabanga Uhoraho muri MINEDUC, Samuel Mulindwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza