Ibigo bitwara abagenzi byanenzwe kutagenzura ibinyabiziga no gukoresha abashoferi ubutaruhuka

Yanditswe na Evariste Nsengimana
Kuya 25 Nyakanga 2019 saa 05:37
Yasuwe :
0 0

Ubuyobozi bw’ibigo bitwara abagenzi mu modoka rusange, bwatunzwe agatoki ku kutagenzura ubuziranenge bw’ibinyabiziga n’imibereho y’abakozi babyo bakora amasaha y’ikirenga, bikagira uruhare mu mpanuka zihitana ubuzima bwa benshi.

Byagarutsweho kuri uyu wa Kane mu mahugurwa y’umunsi umwe abayobozi bahawe na Polisi y’u Rwanda ku cyicaro gikuru cyayo, ku bufatanye n’Urwego Ngenzuramikorere, RURA.

Umuyobozi w’Ishami rishinzwe iterambere n’igenamigambi ry’ubwikorezi muri RURA, Emmanuel Asaba Katabarwa, yavuze ko ubugenzuzi icyo kigo cyakoze bugaragaza ko ‘imiterere y’imodoka n’imikorere y’abakozi bitera impanuka ku gipimo kirenga 90%’.

Yavuze ko hakenewe guhindura imyumvire, cyane cyane ku bayobozi b’ibigo bitwara abagenzi, bagakangurira abashoferi kwirinda amakosa abashora mu mpanuka.

Ati “Ibibazo by’impanuka dukunda kugira usanga uruhare runini ari bo [abashoferi] babigizemo uruhare. Ntabwo aribo ntera ibuye cyane, natwe [ababayobora] twakagombye gufata ingamba zituma ya myumvire yabo ihinduka.”

Katabarwa yavuze ko impanuka zimwe ziterwa n’uko abashoferi baba bakoze igihe kinini n’abahawe ikiruhuko ntibagikoreshe uko bikwiye.

Umuyobozi Mukuru Wungirije wa Polisi y’u Rwanda ushinzwe ibikorwa, CP Namuhoranye Felix, yabwiye abayobora ibigo bitwara abagenzi ko impanuka zo mu muhanda zishobora kwirindwa, igihe cyose umushoferi yirinze imyitwarire imushyira mu kaga n’abo atwaye.

Muri iyo myitwarire yavuzemo gutwarira ibinyabiziga ku muvuduko ukabije, kwangiza ikoranabuhanga rigabanya umuvuduko, gutwara basinze cyangwa bavugira kuri telefone, gutwara imodoka itujuje ubuziranenge, gukoresha ibiyobyabwenge n’ibindi.

CP Namuhoranye yavuze ko hari ubwo usanga abakoresha bishimira kubona inyungu nyinshi, bakirengagiza gukoresha ibinyabiziga biyibaha n’ubuzima bw’abantu bushobora kugendera mu mpanuka.

Ati “Ikibazo bafite ni uko bashaka kubona amafaranga menshi mu byo bakora ariko ntabwo amafaranga menshi akwiye kuboneka utwaye ubuzima bw’abantu. Amafaranga urwana nayo utwaye ubuzima bw’abantu nta agaciro agifite.”

Umuvugizi wa Polisi y’u Rwanda, CP Jean Bosco Kabera, yavuze ko aya mahugurwa aza gufatirwamo imyanzuro irimo kugenzura byihariye imikorere y’ibigo bitwara abagenzi n’ubuziranenge bw’ibinyabiziga bakoresha, no kuba ababiteshukaho bafatirwa ibihano.

Umuyobozi w’ihuriro ryibigo bitwara abagenzi, Mwunguzi Théoneste, yavuze ko abashoferi bahabwa ikiruhuko ahubwo bagikoresha nabi, ugihawe ntaruhuke akigira mu bindi.

Ati “Dusabwa kongera ubukangurambaga ngo turebe ko twahindura imyumvire yabo, umushoferi uhawe umwanya aruhuke uko bikwiye.”

Aya mahugurwa akozwe mu gihe kandi ubukangurambaga bugamije gukumira impanuka buzwi nka ‘Gerayo Amahoro’ Polisi y’u Rwanda yatangije bugeze ku cyumweru cya 11 muri 52 buzamara.

DIGP Namuhoranye yabwiye abitabiriye aya mahugurwa ko impanuka zo mu muhanda zishobora kwirindwa igihe cyose umushoferi yirinze imyitwarire mibi
Bamwe mu bayobozi bitabiriye aya mahugurwa
Katabarwa yavuze ko ubugenzuzi RURA yakoze bugaragaza ko imiterere y’imodoka n’imikorere y’abakozi bitera impanuka ku gipimo kirenga 90%
Umuyobozi w’ihuriro ryibigo bitwara abagenzi, Mwunguzi Théoneste, yavuze ko abashoferi bahabwa ikiruhuko ahubwo bakagikoresha nabi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza