Kwamamaza

Odette Uwamariya asanga umwanya yahawe muri Minaloc ari inshingano zikomeje

Yanditswe kuya 18-10-2016 saa 16:05' na Jean Pierre Tuyisenge


Ubwo yahererekanyaga ububasha na Vincent Munyeshyaka wahoze ari Umunyamabanga Uhoraho muri Minisiteri y’Ubutegetsi bw’Igihugu, Odette Uwamariya uherutse guhabwa uyu mwanya, yavuze ko ibyo aje gukora ari nko gukomeza inshingano yari afite bitewe n’uko yari asanzwe yita ku baturage.

Uwamariya Odette yari umuyobozi w’Intara y’u Burasirazuba, binamuha icyizere ko imirimo mishya yahawe azayuzuza neza bitewe n’uko ubuyobozi abufitemo ubunararibonye.

Uwamariya yavuze ko imirimo mishya yahawe ari ubutumwa bukomeje ahereye ku nshingano yari asanzwe afite nkuko The New times ibitangaza.

Ati “ Ibi mbibona nk’ubutumwa bwagutse, gusa nizera ko dufatanyije nk’ikipe tuzabigeraho. Mfite ubunararibonye cyane mu guhuza ibikorwa, ndumva nta mpungenge mfite. Dukwiye gukora ku buryo ibyo dufite tubikoresha neza, nizera ko kugera ku ntego bishoboka mu gihe ikipe dukoreramo yaba iyobowe neza.”

Uyu muhango wabaye kuri uyu wa Mbere tariki ya 17 Ukwakira 2016, wanahuriranye no gusinya imihigo hagati y’iyi Minisiteri n’ibigo biyishamikiyeho, aho Umunyamabanga wa Leta muri Minisiteri y’Ubutegetsi bw’Igihugu ushinzwe iterambere ry’abaturage Munyeshyaka Vincent, yasabye ababiyobora kwitondera ibikubiye muri iyo mihigo basinye, no gukora uko bashoboye bakazayesa.

Yagize ati “ Imihigo yose ishingiye ku miyoborere, gutanga eerivisi nziza n’imibereho myiza y’abaturage. Iyi ni intego twashyizeho izadufasha kugera ku byo twiyemeje, gusa kugira ngo tubigereho biradusaba gukorera hamwe.”

Munyeshyaka yasabye abayobozi gushyira imbaraga mu kuzuza inshingano bashinzwe no gukurikirana inzego baba bafite mu nshingano.

Ati “ Ni icyerekana ko dukwiye gukora igenzura ryimbitse mu bigo ry’uko bikora. Uyu mwaka ugiye kuba udasanzwe, aho tugomba kugera ku ntego twihaye, tukanashyiraho izindi, tureba niba intego z’iterambere rirambye zaragezweho.”

Umunyamabanga wa Leta muri Minaloc ushinzwe imibereho myiza y’abaturage no kurengera abaturage, Dr Alvera Mukabaramba wari uyoboye uwo muhango, yavuze ko iyo mihigo izafasha mu iterambere ry’abaturage rihuriweho.

Ati “ Dufite hafi ibigo bitanu bishamikiye kuri iyi Minisiteri bifite aho bihuriye n’Imibereho myiza y’Abaturage no kurengera abaturage; ikibazo cyo kwita ku bakozi ni ingenzi cyane, turajwe ishinga no kureba niba koko twuzuza inshingano zacu neza.”

Dr Mukabaramba yasabye abayobozi gukorana bya hafi kugira ngo bafashe Minisiteri kugera ku ntego zayo zigamije kwishakamo ibisubizo.

Ibigo 10 bishamikiye kuri iyi Minisiteri byanashyize umukono ku mihigo, harimo NIC, NEC, MHC, RGB, FARG, NCPD, NIDA, LODA, RDRC, RBA.

Odette Uwamariya (ibumoso) avuga ko gukorera hamwe bizatuma bagera ku byo biyemeje

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved