00:00:00 IGIHE NETWORK KN KINYARWANDA EN ENGLISH FR FRANCAIS

Ibibazo birindwi by’ingutu bibangamiye abamotari, abakora isuku mu mihanda n’abasekirite

Yanditswe na Muhonzire Sylvine
Kuya 18 Ugushyingo 2021 saa 01:18
Yasuwe :
0 0

Abamotari, abakora isuku mu mihanda n’abacunga umutekano mu nyubako zihuriramo abantu benshi (aba-sécurité) ni bamwe mu bakunda guhura n’ibibazo byinshi mu kazi ariko bikarenzwa ingohe ndetse bamwe bakanga kubivuga batinya kwirukanwa.

Ibi bibazo uruhuri bahura nabyo byashyizwe ahagaragara ku wa 17 Ugushyingo 2021 n’Umuryango urwanya ruswa n’Akarengane, Transparency International Rwanda, ubwo werekanaga ishusho y’ibibazo wakiriye mu 2021.

Uyu muryango wagaragaje ko wakiriye ibibazo by’abaturage 6.141 mu 2021, gusa ibyinshi muri byo byatanzwe n’abakora akazi kitwa ko gaciriritse, aho byerekanywe ko bahura n’akarengane gakomeye, hasabwa ko bakemurirwa ibibazo ndetse bagabahwa uburenganzira nk’abandi bakozi bose.

Ibibazo byagaragajwe nk’ibibangamiye abakozi biri mu ngeri zitandukanye zirimo ibijyanye n’umushahara udatangirwa igihe, kutagira amasezerano y’akazi, kudatangirwa umusanzu w’ubwiteganyirize n’ibindi.

-  Kudahemberwa igihe no guhembwa make

TI Rwanda yagaragaje ko bamwe mu ba- sécurité n’abakora isuku mu mihanda bayigaragarije ko bahembwa nyuma y’igihe kinini ndetse rimwe na rimwe ntibahabwe imishahara yuzuye. Ni ibintu uyu muryango wagaragaje ko bihabanye n’itegeko kuko umukoresha agomba guha umukozi amafaranga bumvikanye kandi ku gihe.

Umwe yagize ati “Tumaze amezi ane tudahembwa, rero iyo twishyuje umukoresha wacu ahita atubwira ngo ushaka gusezera naze muhe amafaranga ye atahe.”

Undi ukora isuku mu muhanda ati “Umushahara wari ibihumbi 40 Frw, ariko ntawukiyahembwa ubu aduha 36.300 Frw. ikindi kibazo dufite, baduhemba urwo rusenda rwabo n’ibikoresho tukabyigurira. Ubu hashize amezi atatu tudahembwa n’ubu ntituzi niba tuzahembwa kandi amasezerano arenda kurangira.”

Umuyobozi wa TI Rwanda, Ingabire Marie Immaculée, yavuze ko ari ikibazo kuba aba bakozi bahembwa make kandi ntibahemberwe igihe kandi mu bya mbere u Rwanda ruzwiho ari ukugira isuku.

Yakomeje ati “Imirenge ikwiye kubikurikirana cyane kuko igirana amasezerano n’izi sosiyete zibaha akazi. Hari n’aho ujya bakakwereka ko batarabishyura wajya ku murenge bakakwereka ko babishyuye. Bakwiye rero kubikurikirana bakareba ngo wa muntu bafitanye amasezerano ntabwo arimo arenganya Abanyarwanda.”

Murayire Hermès ushinzwe Ibikorwa muri Sosiyete ya High Sec yavuze ko hari gukorwa ibiganiro bigamije gukemura ibi bibazo harimo n’uko hagiye gushyirwaho umushara fatizo ku mukozi ku buryo nta sosiyete izaba yemerewe kuwujya munsi.

-  Kutagira amasezerano y’akazi

Itegeko rigenga umurimo mu Rwanda mu ngingo yaryo ya 39, rivuga ko umukoresha afite inshingano zo gutanga amasezerano y’umurimo ku mukozi kandi agahabwa kopi yayo, aho rigaragaza ko amasezerano atanditse abaho gusa igihe umukozi aba ataramara iminsi 90 mu kazi.

Amasezerano y’akazi ubusanzwe n’iyo akubiyemo uburenganzira bw’umukozi yaba umushahara, ikiruhuko, ubwishingizi, ubwiteganyirize n’ibindi, gusa abakoresha bamwe mu kazi ko gukora isuku no gucunga umutekano byagaragaye ko batayatanga, ndetse banayatanga ntiyubahirizwe.

Bamwe mu bakora aka kazi bavuze ko batagira amasezerano y’akazi yanditse aho hari uwavuze ko amaze imyaka 44 ari umusekirite ariko atagira amasezerano y’akazi yanditse.

TI Rwanda yagaragaje ko kutagira amasezerano y’akazi ari akarengane kuko bituma bamwe badatangirwa imisanzu mu Rwego rw’Igihugu rushinzwe Ubwiteganyirize (RSSB), aho hari n’abakatwa ku kwezi babwirwa ko bayatangirwa kandi mu by’ukuri bitakozwe.

-  Kudahabwa ikiruhuko cy’umwaka

Ubusanzwe umukozi wese yemerewe guhabwa ikiruhuko cy’umwaka cyangwa icy’ingoboka mu gihe yarwaye, yabyaye cyangwa se yagize ikindi kibazo gisanzwe. Gusa abacunga umutekano n’abakora isuku mu mihanda bavuze ko benshi bamara n’imyaka ine batarahabwa ikiruhuko cy’umwaka.

Umwe yagize ati “Ntabwo turuhuka yaba mu minsi mikuru no mu isanzwe. Tugira wa munsi umwe mu cyumweru ariko nta kiruhuko cy’umwaka tujya tugira cyangwa se ngo warwaye baguhaye ikiruhuko, reka da, iyo ugize ibyago ukarwara byanga bikunze bashyiramo umuntu akaba ariwe uhembwa ya mafaranga yawe.”

Abakora isuku bamwe bagaragaje ko iyo bagiye kwivuza bakatwa 300 Frw, cyangwa babyara bakishakira ababasimbura mu gihe hari abasekirite bagaragaje ko iyo bahawe uruhushya rwo kwivuza ntibazane repos médical bakatwa 3000 Frw.

-  Gukora amasaha y’ikirenga ntibanayahemberwe

TI Rwanda yagaragaje ko hari icyo abasekirite bita gukora double, bivuze gukora umunsi wose, bakaharara babuze ababasimbura maze bakongera bagakora undi munsi bataruhutse. Icyo gihe ngo ntibabihemberwa ahubwo utasimbuye bamukata amafaranga.

Umwe yagize ati “Amasaha y’ikirenga n’ikintu rusange mu masosiyete acunga umutekano yose, kuko nshobora kurara ijoro simbona unsimbura mu gitondo nkahirirwa. […] Reka ntayo batwishyura.”

Iteka rya minisitiri rigena uburyo amasaha y’akazi mu cyumweru yubahirizwa mu nzego z’abikorera ryo rivuga ko uwakoze amasaha y’ikirenga agomba guhabwa ikiruhuko kingana n’amasaha yakoze, atagihabwa akayahemberwa.

Itegeko rigenga umurimo mu ngingo ya 43 rigaragaza ko umukozi atagomba kurenza amasaha 45 mu cyumweru ni ukuvuga byibura amasaha arindwi n’igice mu minsi itandatu. Gusa ashobora kuyakora igihe yabyemeranyijwe n’umukoresha.

-  Kwishyurwa mu ntoki no kudatangirwa ubwiteganyirize

Aba bakozi bagaragaje ko hari abishyurwa mu ntoki bituma badashobora no kwaka inguzanyo muri banki, abandi bavuga ko batishyurirwa imisanzu y’ubwiteganyirize muri ‘Ejo Heza’, aho hari ababeshwa ko bishyurirwa nta byakozwe.

Umwe yagize ati “Bakaduhemba amezi abiri ashize atatu, bakaduhemba ahantu baboneye, baduhembera ku mihanda yaba ku biro byabo ni uko twahembwaga mu ntoki.”

Undi ati “Aduhemba 30.000 Frw kandi abandi baraduhembaga 40.000 Frw. Yaratubwiye [Umukoresha] ngo ibihumbi 10 Frw adukase ku mushahara ngo agiye kubitwishyuriramo ubwiteganyirize ariko twagiyeyo kugira ngo turebe ubwiteganyirize bashyizeho dusanga ntabwo.”

Hari abandi bagaragaje ko hari igihe bo biteganyiriza mu bimina ariko amafaranga biteganyirije bakabura irengero ryayo, mu gihe hari n’abasezera ku kazi ntibahabwe imperekeza.

Hari uwagize ati “Ugasanga warayikoreye (sosiyete) unayisezera neza ariko ukamara nk’umwaka ukivuga ngo kuki mutampaye imperekeza zanjye, kuki mutampaye imperekeza zanjye?”

Ibi bibazo n’ibindi birimo gutotezwa ku bagore no gusabwa ruswa ishingiye ku gitsina cyane cyane muri sosiyete zicunga umutekano cyo kimwe na ruswa yakwa abagabo y’amafaranga ni bimwe bindi bibazo byagaragajwe aba bakozi bato bahura nabyo, aho TI Rwanda yavuze ko hakenewe ubufatanye kugira ngo bikemurwe.

-  Ubwishingizi buri hejuru ku bamotari

Byavuzwe kenshi ko abamotari bongejwe amafaranga y’ubwishingizi bishyura ku mwaka muri Radiant, aho bagaragaje ko yiyongereye akava ku bihumbi 65 Frw akagera ku arenga 150.000 Frw, ndetse banavuga ko bahatiwe kwishyura ubwishingizi muri sosiyete imwe.

Umwe yagize ati “Twatangiye mbere twishyura ibihumbi 45 Frw, birazamuka biba ibihumbi 65 Frw, birazamuka twishyura 85 Frw, ejobundi nyuma ya Covid-19 rero byaduteye ikibazo twishyuye ibihumbi 182 Frw.”

Umuyobozi ushinzwe Imyitwarire n’Umutekano by’Abamotari, Ruhinda Félix, yavuze ko impamvu y’ubu bwiyongere bwabayeho ari nk’uko ibindi biciro bizamuka uko ibihe bihita.

Ati “Uko igiciro cy’ibirayi cyaguraga mu 2000 uyu munsi si ko kikigura cyarazamutse, byazamutse hambere kuko radiant ariyo yasigaye ariyo itanga make ari nabyo mwumvise ngo babahatiye kujya muri Radiant gusa. Nta wigeze abahatira kuyijyamo ahubwo ni uko ariyo yasigaye itanga make.”

Ruhinda avuga ko Radiant ubu ari yo yonyine yemera kwishingira moto ndetse yababwiye ko kongera amafaranga bifitanye isano n’impanuka za hato na hato z’abamotari bituma yishyura amafaranga menshi cyane mu kuriha indishyi zizikomokaho.

-  Kutabwirwa amakuru y’amafaranga bashyira muri koperative

Kugira ngo umumotari atware moto mu Rwanda agomba kuba ari muri Koperative, aho ubu mu gihugu hose hari koperative z’abamotari 182 harimo 40 zo mu Mujyi wa Kigali.

Kugira ngo bayinjiremo bishyura umusanzu shingiro uri hagati y’ibihumbi 10 Frw na 30 Frw ndetse bagatanga ibihumbi 5 Frw buri kwezi, akurwamo 1500 Frw yishyurwa muri ‘Ejo Heza’ mu gihe andi akoreshwa mu iterambere rya koperative.

Gusa bamwe mu bamotari bavuga ko ayo mafaranga y’umusanzu batanga batazi aho ajya ndetse ko n’ayo batanga buri kwezi batajya bamenya amakuru yayo, ndetse n’iyo bagize ikibazo koperative ntibagoboka.

Ruhinda avuga ko aribyo koko ko abamotari bamaze imyaka ibiri badahabwa amakuru ya koperative, batanerekwa umutungo wayo, aho yagaragaje ko byatewe n’icyorezo cya Covid-19 kuko ngo mbere bajyaga bakora inteko rusange buri mezi atatu bagahabwa amakuru.

Yakomeje agira ati “Turimo kuvugana n’Umujyi wa Kigali ndetse n’Ikigo cy’Igihugu Gishinzwe Guteza Imbere amakoperative, RCA, kugira ngo badutegurire baduhe aho tuzakorera, baduhe ibibuga binini ku buryo twazabasha gukoresherezamo inteko rusange z’abamotari, kandi barabyemeye ubu igihe n’aho bazakorera inteko rusange hari hafi kumenyekana.”

TI Rwanda yavuze ko ibi bibazo byagaragajwe n’abamotari, abakora isuku mu mihanda ndetse n’abacunga umutekano bikwiriye gushakirwa ibisubizo binyuze mu bufatanye bw’inzego zishinzwe gukemura ibi bibazo harimo na Minisiteri y’Abakozi ba Leta n’Umurimo.

Abakora isuku mu muhanda bagaragaje ko bahembwa amafaranga make kandi ntibanayahabwe ku gihe
Kudahabwa ijambo no kudahabwa amakuru ya koperative ni bimwe mu bibangamiye abamotari

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .