Kwamamaza

I San Francisco tuzahahindura u Rwanda-Minisitiri Uwacu Julienne

Yanditswe kuya 20-09-2016 saa 10:42' na Ntakirutimana Deus


Minisiteri y’Umuco na Siporo ivuga ko Rwanda Day igiye kubera i San Francisco muri Leta Zunze Ubumwe za Amerika kuri uyu wa Gatandatu tariki ya 24 Nzeri 2016, izasiga uwo mujyi iwuhinduye urundi Rwanda kuko ngo abazaba bari aho bazerekwa ibyiza by’umuco nyarwanda bakazanarukundishwa.

Minisitiri w’Umuco na Siporo, Uwacu Julienne mu kiganiro yakoreye kuri Televiziyo y’Igihugu ku wa 18 Nzeri 2016 yavuze ko Abanyarwanda bose bazibona muri uwo munsi, mu mpanuro zizahatangirwa hakazaba harimo n’izigenewe urubyiruko rukunze ruyobywa n’abarutoza kwanga u Rwanda.

Yavuze ko Abanyarwanda bazanaganirizwa kuri byinshi bijyanye n’umuco n’uko wakubakirwaho ugateza igihugu imbere.

Yagize ati "Hazaba ubusabane no gususuruka tuvomye muri wa muco tuzereka Abanyarwanda n’abanyamahanga ibijyanye n’umuhamirizo, kubyina n’ibindi biri mu muco wacu. Nubwo bizabera mu mahanga ariko naho tuzahagira u Rwanda.”

Minisitiri Julienne yavuze ko ibizabera i San Francisco ngo azaba ari amahirwe akomeye azafasha Abanyarwanda kongera kwiyumvamo igihugu cyabo.
Ati “Abanyarwanda bari hano mu Rwanda bifashishije ikoranabuhanga bizabegerezwa ku buryo tuzasa nk’aho turi kumwe ari abari hariya n’abazaba bari hano mu Rwanda”

Urubyiruko ruzahabwa impanuro zibumbye byinshi

Muri iyo Rwanda Day ngo urubyiruko rukunze gushukwa rukangishwa u Rwanda ruzongera guhabwa impanuro zituma barukunda.

Ati “ Icyo tubabwira ni uko yaba yaravukiye mu Rwanda cyangwa mu mahanga azirikana iteka ko ari Umunyarwanda, kuba Umunyarwanda bikabana nawe bikamubamo aho ari hose. Ikindi ibyiza abona hariya iteka akabona ari ahantu yagiye agiye guhaha kugira ngo naronka ihaho yabonye azarigarure atahe mu rugo noneho ubumenyi n’ibindi yabonye bize kumufasha kubaka no guteza imbere igihugu cye.”

Iyo Rwanda Day ngo ntabwo izaba ari umunsi wihariye wo guha ubutumwa urubyiruko ku bijyanye n’indangagaciro na kirazira by’umuco Nyarwanda gusa, kuko ngo hari ahandi rujya ruherwa izo nyigisho nko mu itorero ry’indangamirwa n’ahandi, ariko n’aho ngo ruzagarukwaho.

Ati “Twumva rero icyo tuzongera kwibutsa uru rubyiruko ari uko kuba Abanyarwanda kwabo kutagarukira ku mupaka w’aha, biba mu bibaranga biba mu mibereho yabo iteka bashaka gukora no kunguka, hanyuma urwunguko babonye bakarugarura mu gihugu bagafatanya n’abasigaye mu Rwanda guteza imbere igihugu muri rusange.”

Urubyiruko rwaba rwaratojwe kwanga u Rwanda no kurwivanamo, narwo ngo ruzagenerwa ubutumwa. Ati “Ababa barahuye n’ubundi butumwa bwo kwihakana u Rwanda [...] yego hari abagerageza kuvuga ibitari byo cyangwa gusiga icyasha u Rwanda, ariko hari ukuri kwigaragariza buri wese gutuma urubyiruko rudashobora kuba nk’urwafashwe bugwate n’izo nyigisho mbi. Muri rusange na wo ni undi mwanya wo gutuma urwo rubyiruko rubohoka cyangwa ruba urubuga rwo gusobanuza ibyo rudasobanukiwe.”

Muri rusange ngo hari Abanyarwanda bamwe bagerageza kwihakana ubunyarwanda ariko ntibikunde, kuko kuba iteka bahora bavuga u Rwanda biterwa n’uko bazi neza ko ariho bafite imizi n’inkomoko yabo.

Mu rwego rwo kwerekana ukuri ku Rwanda ngo hamaze kuba uburyo bwinshi butuma ari abanyarwanda ari n’abanyamahanga baza ubwabo bakigerera mu Rwanda bakabona ukuri, ntibibe gusa ko babibwirwa.

Ati “Hari ubuhamya butangwa n’abanyamahanga baza hano, hari Abanyarwanda baba badaheruka mu Rwanda baza muri gahunda yo gusura bagasubirayo kuko u Rwanda ntirufunze.”

Yashimye abakuze bagerageza kwereka urubyiruko ibyiza by’u Rwanda, barufasha kuruvana mu rujijo rw’ibyo rwumva mu mahanga.

Mu bibazo bitandukanye Minisitiri Uwacu yagiye asubiza birimo niba Rwanda Day izakomeza kubera i Burayi no muri Amerika, aho yashubije ko no muri Afurika izashyira ikahabera n’ubwo icy’ibanze ari uko Rwanda Day y’Abanyarwanda ihora iba buri munsi mu buzima bwabo.

Minisitiri w'Umuco na Siporo, Uwacu Julienne

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved