00:00:00 IGIHE NETWORK KN KINYARWANDA EN ENGLISH FR FRANCAIS

Huye: Senateri Prof Dusingizemungu yeretse abafite inganda ibyiza byo kunywana n’abaturage

Yanditswe na Prudence Kwizera
Kuya 15 Nzeri 2021 saa 02:45
Yasuwe :
0 0

Senateri Prof Dusingizemungu Jean Pierre yasabye abafite inganda kugira imikoranire myiza n’abaturage kugira ngo babashe kubona umusaruro mwiza kandi n’abo baturage batere imbere n’imibereho yabo irusheho kuba myiza.

Yabivuze kuri uyu wa Kabiri, tariki ya 14 Nzeri 2021, ubwo yari mu Karere ka Huye yitabiriye igikorwa cyateguwe n’Uruganda ruhinga rukanatunganya Ikawa rwa Huye Mountain Coffee cyo guhemba abahinzi bahize abandi mu kweza ibilo byinshi ku giti kimwe cy’ikawa.

Hahembwe abahinzi 105 bo mu Mirenge ya Kigoma, Maraba, Simbi, Mbazi, Gishamvu na Huye; bahawe ibihembo birimo inka, ingurube, ihene n’ibikoresho byo kwita kuri kawa.

Ntakirutimana Emmanuel wahize abandi yahawe inka ndetse n’ibindi bikoresho byo gukorera Kawa kuko yejeje umusaruro w’impuzandengo y’ibilo 4,9 ku giti.

Yagize ati “Nakoresheje ifumbire y’imborera n’imvaruganda ndetse nkazikatira neza, nkazirinda ibisambo, ubu zimeze neza nta kibazo. Mu mwaka ushize nasaruye toni imwe n’ibilo 200, ninjiza ibihumbi birenga 250. Uyu mwaka nasaruye toni imwe n’ibilo 254 mbasha kubona amafaranga agera ku bihumbi 560.”

“Igihembo mpawe ndacyishimiye ku buryo ngiye gukaza umurego nkabona ibilo birindwi ku giti kimwe.”

Undi muhinzi wahembwe ni Nyirarugwiro Appolinarie weza ibilo biri hejuru ya bine ku giti kimwe cya Kawa. Yavuze ko igihe amaze ayihinga yamuteje imbere.

Ati “Mu rugo rwanjye nta kibazo cy’ubukene twigeze tugira kuko tubona iby’ibanze byose tubikesha ikawa duhinga kandi nishyura mituweli ku gihe. Uruganda rwadushyize no mu matsinda ku buryo tubasha kwizihamira no kugurizanya.”

Umuyobozi Mukuru wa Huye Mountain Coffee, Rubanzangabo David, yavuze ko bateguye igikorwa cyo gushimira abahinzi bazamuye umusaruro wa Kawa ku giti kimwe kugira ngo babatere umurava wo gukora cyane kandi na bagenzi babo babigireho.

Ati “Twateraniye hano ngo dushimire abahinzi umurava bagize wo gufata neza ikawa bongera umusaruro mu bwinshi no mu bwiza, kugira ngo bakomeza uwo murava kandi n’abandi babarebereho nabo bazamure umusaruro ube mwinshi kandi mwiza.”

Senateri Prof Dusingizemungu Jean Pierre yashimye imiyoborere myiza iri mu gihugu yimakaza iterambere ry’abaturage. Yashimye abahinzi ku muhate bafite mu buhinzi bwa Kawa, asaba abafite inganda ziyitunganya kunywana na bo kugira ngo bagire imikoranire myiza ibateza imbere bose.

Yashimye imikorere ya Huye Mountain Coffee, asaba ko abazazana inganda mu Karere ka Huye bakwiye gukora nkarwo.

Ati “Nifuzaga ko abazazana inganda bose bazabanza kunyura muri Huye Mountain Coffee kugira ngo babanze bige uburyo bakoresha kugira ngo banywane, bakorane neza n’abaturage bagiye guturana na bo. Bikwiye kubaho mukabwira abazanye inganda ko banywana n’abaturage kugira ngo imibereho y’abaturage itere imbere ibe myiza kurushaho.”

“Ni bwo uzabona abaturage bose baturiye inganda bavayo [bava mu bukene] nk’uko abaturiye Huye Mountain Coffee bavuyeyo batera imbere.”

Yasobanuye ko iyo mikoranire myiza izatuma inganda zitera imbere ndetse n’abazituriye bagatera imbere.

Umuyobozi w’Akarere ka Huye, Sebutege Ange, yavuze ko gahunda yo gushimira abahinzi ba kawa bitwaye neze no gukebura abatarabigeraho ari nziza kuko ibafasha kunoza ibyo bakora.

Ati “Uku guteza imbere ubuhinzi ni byo bitunga umuryango bigatunga ubikora bigateza imbere n’ubukungu bw’igihugu. Ubu natwe twigiye kuri iki gikorwa Huye Mountain Coffee yakoze, ubutaha natwe mu Karere tuzahemba umuhinzi wa mbere uzaba wagize ibilo byinshi ku giti kimwe mu Karere kose.”

Hagamijwe gufasha abaturage kugira imibereho myiza, Huye Mountain Coffee yubakiye abaturanye nayo amavomo atandatu y’amazi, nayo akaba yatashywe ku mugaragaro.

Senateri Prof Dusingizemungu yasabye abafite inganda kunywana n’abaturage kugira ngo imikoranire ibe myiza
Umwe mu bahinzi ba kawa ashyikirizwa ibikoresho bimufasha kuyitaho
Prof Dusingizemungu yasobanuye ko imikoranire myiza izatuma inganda zitera imbere ndetse n’abazituriye bakagira imibereho myiza
Ntakirutimana Emmanuel wahize abandi yahawe igihembo nyamukuru cy'inka ndetse n'ibindi bikoresho byo gukorera Kawa kuko yejeje umusaruro w'impuzandengo y’ibilo 4,9 ku giti

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .