Huye: Mu bibazo birenga 300 Umuvunyi Mukuru yasize mu mwaka ushize, hamaze gukemurwa 150

Yanditswe na Prudence Kwizera
Kuya 19 Kamena 2019 saa 09:21
Yasuwe :
0 0

Mu bibazo bigera kuri 320 abaturage bo mu Karere ka Huye bagejeje ku Rwego rw’Umuvunyi mu Ukwakira 2018 rusaba ko bikurikiranwa, ibigera ku 150 byarakemuwe ibisigaye na byo biri mu nzira zo gukemuka.

Byatangajwe ubwo Umuvunyi Wungirije ushinzwe gukumira no Kurwanya Akarengane, Yankulije Odette, yagiranaga ibiganiro n’abayobozi mu Karere ka Huye kuri uyu wa kabiri, barebera hamwe aho ibyo bibazo bigeze bikemurwa.

Yankurije yavuze ko ari gahunda bihaye muri iki cyumweru yo kuzenguruka mu turere bareba niba ibibazo basize basabye ko bikemurwa byakemuwe n’imbogamizi zaba zarabijemo.

Yavuze ko ubwo baheruka mu Karere ka Huye bakiriye ibibazo byinshi, bimwe birakemurwa ibindi bihabwa umurongo ariko hagira ibisigirwa inzego z’ibanze kuko basanze biri mu nshingano zazo.

Ati “Twakiriye ibibazo by’akarengane k’abaturage byinshi, hari bimwe bigera ku 159 byahise bisubizwa cyangwa bihabwa umurongo w’uko bizakemuka, ariko hari n’ibindi biba bisaba gukomeza gukurikira twasabye abayobozi ko bakurikirana ni byo twaje kureba aho bigeze.”

Ibyo bibazo byose Urwego rw’Umuvunyi rwabyakiriye tariki ya 17-19 Ukwakira 2018 muri gahunda isanzwe yo kwakira ibibazo by’abaturage.

Umuvunyi Wungirije ushinzwe gukumira no Kurwanya Akarengane, Yankulije Odette, yaganiriye n’Abanyamabanga Nshingwabikorwa b’imirenge yo mu Karere ka Huye aho buri umwe yagiye avuga kuri buri kibazo kiri aho ayobora n’aho kigeze gikemuka.

Umuyobozi w’Akarere ka Huye, Ange Sebutege, yavuze ko ibibazo basigiwe n’Urwego rw’Umuvunyi bageze kure babikemura kandi n’ibisigaye bizakemurwa vuba.

Ati “Ku ikubitiro Umuvunyi Mukuru akiva hano hari ibibazo bigera ku 150 byahise bibonerwa ibisubizo hasigara ibindi bigera ku 170 akenshi bijyanye no gushyira mu myanzuro ibyo inkiko ziba zarafasheho ibyemezo […] Twongeye kwiha igihe kingana n’ukwezi kumwe ko gukemura ibisigaye kuko Umuvunyi yatugiriye inama y’uko tuzabikemura.”

Ibibazo abaturage bagejeje ku Muvunyi byibanda ku kurangiza imanza ziba zarafashweho umwanzuro n’inkiko; kudahabwa ingurane y’imitungo yabo yangijwe; abakoreye Leta cyangwa rwiyemezamirimo batahembwe n’ibindi.

Sebutege yagaragaje zimwe mu mbogamizi bahura nazo avuga ko mu kurangiza imanza hari abatishimira uko zarangijwe bagakomeza kujurira naho ku kwishyura imitungo hari ubwo bategereza ingengo y’imari.

Yavuze kandi ko hari ibibazo basanga bigomba gukemurwa n’izindi nzego bikaba ngombwa ko babikorera ubuvugizi.

Abanyamabanga Nshingwabikorwa b’imirenge bari bitabiriye ibyo biganiro bagaragaje ko bahura n’imbogamizi ikomeye mu kurangiza imanza kuko hari abaturage bigomeka ku byakozwe bakabyanga bityo ntibikorwe.

Umuvunyi Wungirije ushinzwe gukumira no Kurwanya Akarengane, Yankulije Odette, yagiriye inama abayobozi y'uko bakemura ibibazo by'abaturage bayajemo inzitizi
Abanyamabanga Nshingwabikorwa b’imirenge bagaragaje ko bahura n'imbogamizi mu kurangiza imanza kuko hari abaturage bigomeka bakabyanga
Abayobozi bihaye ukwezi kumwe ko gukemura ibibazo bisigaye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza