00:00:00 IGIHE NETWORK KN KINYARWANDA EN ENGLISH FR FRANCAIS

Huye: Imiryango isaga 5000 yafashijwe kuva mu bukene bukabije

Yanditswe na Prudence Kwizera
Kuya 15 Nyakanga 2021 saa 01:48
Yasuwe :
0 0

Ubuyobozi bw’Akarere ka Huye bwatangaje ko muri gahunda yo kuzamura abaturage batishoboye mu mwaka w’ingengo y’imari wa 2020/21, bwafashije abarenga 5000 kuva mu bukene bukabije ku nkunga y’abafatanyabikorwa.

Mbere y’uko uwo mwaka utangira, mu Karere ka Huye hari habaruwe imiryango 7864 iri mu bukene bukabije ariko urangira muri yo igera ku 5095 ibashije gutera intambwe ifatika kuko kuri ubu abayigize basigaye bifashije mu mibereho y’ibanze.

Byagarutsweho n’umukozi w’Akarere ka Huye ushinzwe guhuza ibikorwa by’abafatanyabikorwa, Kayitare Léon Pierre, ubwo hatangwaga amatungo magufi ku miryango itishoboye yo mu Murenge wa Rwaniro mu Karere ka Huye, aho buri rugo rwahawe ihene enye.

Kuri iyi nshuro ayo matungo yatanzwe ku miryango 270 yo mu turere twa Huye, Nyanza na Nyamagabe hagamijwe kuyifasha kuva mu bukene bukabije.

Kayitare yavuze ko abagize iyo miryango bafashijwe muri gahunda zitandukanye zirimo kugirwa inama, guhabwa amatungo, kubakirwa inzu n’ubwiherero n’ibindi biyifasha kuva mu bukene. Yavuze kandi ko abafatanyabikorwa b’akarere babigizemo uruhare runini.

Ati “Abafatanyabikorwa babigizemo uruhare runini kuko ibikorwa bakora bizamura cyane abaturage kuko bataza gusa ngo babahereze ahubwo babanza no kubigisha no kubabumbira mu matsinda kugira ngo bungurane ibitekerezo ndetse batozwe n’umuco wo kuzigama no kugurizanya.”

Amatungo yatanzwe kuri iyi nshuro n’urugaga rw’abahinzi n’aborozi bo mu Rwanda Imbaraga ku bufatanye na Vétérinaires Sans Frontières (VSF-Belgique) ndetse Rotary Club International.

Umuyobozi Mukuru w’Urugaga rw’abahinzi n’aborozi bo mu Rwanda Imbaraga, Munyakazi Jean Paul, yavuze ko bahisemo gufasha imiryango itishoboye nyuma yo kuganira n’ubuyobozi bw’akarere bukababwira ko hari imiryango itishoboye iri mu cyiciro cya mbere n’icya kabiri ikeneye gufashwa.

Yashimye ko hari bamwe mu bahawe ihene mu myaka yashize, ubu bamaze kwivana mu bukene bagura inka zibaha umukamo, asaba abandi kubafatiraho urugero.

Bamwe mu baturage bo mu Murenge wa Rwaniro bahawe ihene bavuze ko bagiye kuzifata neza kugira ngo zizabafashe gutera intambwe bava mu bukene.

Nyiramana Claudine ati “Bampaye ihene enye, niteguye kuzifata neza kandi nizeye ko zizamfasha kuva mu bukene. Ihene ibyara kabiri mu mwaka, urumva ko ari itungo ryiza kandi ritagoye korora. Niteguye ko nko mu mwaka umwe nzava mu cyiciro cy’ubukene bukabije kuko ihene irororoka.”

Rusizi François na we yavuze ko ashingiye ku matungo yahawe n’ubundi bufasha yagiye ahabwa yiteguye kuva mu bukene bukabije bitarenze umwaka utaha wa 2021/22.

Iyo miryango itishoboye iri gufashwa mu mushinga washowemo ibihumbi 85$ aho akoreshwa mu byiciro bitatu birimo kubaka aho amatungo azaba, guhinga ubwatsi azagaburirwa no kubaka akarima k’igikoni gahingwamo imboga zo kurya.

Abahawe amatungo magufi bavuze ko bazayafata neza akabakura mu bukene
Umuyobozi Mukuru w’Urugaga rw’abahinzi n’aborozi bo mu Rwanda Imbaraga, Munyakazi Jean Paul, yavuze ko bahisemo gufasha imiryango itishoboye nyuma yo kuganira n’ubuyobozi bw’akarere
Perezida wa Rotary Club ya Butare mu 2021, Dr. Mahara Isidore, yavuze ko uyu mushinga wose washowemo ibihumbi 85$
Umukozi w’Akarere ka Huye ushinzwe guhuza ibikorwa by’abafatanyabikorwa, Kayitare Léon Pierre, yasabye abahawe amatungo kuyafata neza akabakura mu bukene bukabije

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .