Huye: ’Igitwenge gikiza’ cyafashije abahoranaga agahinda mu bihe byo kwibuka

Yanditswe na Tombola Felicie
Kuya 13 Mata 2018 saa 10:46
Yasuwe :
1 0

Bamwe mu barokotse Jenoside yakorewe Abatutsi bajyaga bahura n’ihungabana rikomeye, ubwihebe, agahinda kadashira no kudasinzira mu bihe byo kwibuka baratangaza ko umwitozo witwa ‘igitwenge gikiza’ wabafashije kongera kugira akanyamuneza.

Ni umwitozo baherewe mu mahugurwa y’iminsi ine yatanzwe n’umuryango ufasha abanyarwanda gukira ibikomere n’ihungabana, hagamijwe kubaka ubudatsimburwa (Rwanda Resilience and Ground Organization), washinzwe n’abanyeshuri bari barangije ibyo kwita ku buzima bwo mu mutwe mu mwaka wa 2015.

Umuyobozi wa Rwanda Resilience and Ground Organization, Habimana Samuel, yagize ati “Duseka nk’umwitozo ariko bikaba ari umuti mu kuvura agahinda gakabije n’ubwihebe. Twifashisha icyo gitwenge tukihaza umunezero muri twe. Ni igitwenge umuntu yishakamo ariko gikora neza nk’aho umuntu yaba agusekeje cyangwa se ubonye ibisekeje.”

Yakomeje agira ati “Icyo tubabwira ni uko igihe umuntu yumva agahinda, kwiheba, ubwoba bitangiye kuza ahita yishakamo igitwenge. Gihita gihangamura agahinda gakabije kandi igitwenge cyubaka umutuzo umubiri ukeneye.”

Abahuraga n'ihungabana bigishijwe tekinike zo guhumeka no guseka

Abo banyeshuri bashakaga gufasha abanyarwanda gukira ihungabana n’ibikomere byo mu mutima kuko nubwo hashize imyaka jenoside ibaye, hari abakibaho mi buzima bwo mu gihe cya Jenoside.

Kuva uwo muryango watangira, abasa 800 barahuguwe mu turere twa Huye, Nyamagabe, Nyaruguru na Rubavu bihindura ubuzima bwabo.

Amahugurwa y’igitwenge gikiza yatangijwe mu Karere ka Huye, itsinda ry’ababyeyi 10 bari barananiwe kwiyakira mu bihe byo kwibuka, ntibasinzire ndetse hakaba hari abo kubitaho buri gihe ariko ubu batangaje ko igitwenge gikiza cyamaze kubafasha.

Umuyobozi wa Rwanda Resilience and Ground Organization, Habimana Samuel, avuga ko ubwonko budashobora gutandukanya igitwenge umuntu yishatsemo n’ikindi gisanzwe, akaba ariyo mpamvu umusemburo w’ibyishimo uhita ukorwa ako kakanya bigahagarika uwari ugiye kubaho mu bihe byashize mu gahinda.

Yavuze ko ubu barimo gufashwa n’umukorerabushake wo muri Australia ubimazemo igihe kandi bifuza kugera ku bantu benshi batarabasha guhangana n’ibihe banyuzemo ngo babirenge.

Yagize ati "Umwitozo wo guseka, tubifatanya n’umwitozo wo guhumeka bita ’Pranayama’ wo kumenya uko umuntu azamura umwuka akanawusohora igihe yumva agahinda gakabije cyangwa se yumva agiye nko gutaka."

Umwitozo w’igitwenge gikiza watangijwe n’abantu batanu mu 1995 , igitwenge gikiza kirakwirakwira ku Isi hose kugeza mu bihugu 55 n’u Rwanda rurimo.

Uko igitwenge gikiza cyabahinduriye ubuzima

Nyiratunga Liberatha w’imyaka 54 wo mu Karere ka Huye, Umurenge Ngoma, mu Kagaki ka Matyazo yagize ati “ Kuva Jenoside yarangira nahuye n’ikibazo cy’ihungabana, nkumva sinshaka kujya aho abantu bari nahajya nkamererwa nabi, ubu rero mbasha guseka, mu mutwe hararuhutse.”

Avuga ko umwitozo w’igitwenge gikiza utuma kuri ubu abona ibitotsi ati “ Njya mu biganiro nkakurikirana, kwa kundi abantu bahungabana ndakomera, nk’ejo umwana w’umukobwa yarahungabanye ariko kuko namaze kumenya uko nitwara narikomeje nta kibazo byangizeho.”

Mukamurenzi Apauline w’imyaka 50 yagize ati “ibitekerezo by’umuntu biba biri mu bihe waciyemo iyo tugeze mu bihe byo kwibuka. Kuri ubu ndi muri kino gihe cya none kuko tekiniki z’igitwenge gikiza zituma uhita utekereza akantu gasekeje ukagaruka mu buzima busanzwe kandi wari ugiye kwiheba.”

Yavuze ko ari umuti atazihererana, ati “Nsigaye ndyama ngasinzira, niyo ndi mu biganiro twize igitwenge cya bucece ukoresha nuwo mwicaranye ntabimenye ariko akaba ari umuti kuri wowe, nzabisangiza abandi rero.”

Umukozi wa AVEGA na FARG mu bijyanye n’ubujyanama, Mukamana Emelite, yavuze ko impinduka zigaragaza kuko ahorana nabo kandi bikaba byari bigoye kubabona bishimye.

Ati “Ni abantu batakundaga kwishima, badaseka ngo ubone bishimye ku mitima yabo, mbese ubona ko ari bantu bahorana akababaro n’agahinda mu maso yabo. Ikintu cya mbere cyantangaje ni ukuhagera ukabona baseka bishimye, ukabona ko nta ntimba ikibagararagara mu maso.”

Avuga ko abantu bose bakwiye kumenya ko hari bagenzi babo bakiri mu buzima bwo mu 1994, bakeneye kwegerwa kugira ngo bagire icyizere cy’ejo hazaza.

Mukamana Emelite, Umukozi wa AVEGA na FARG mu bijyanye n’ubujyanama
Umukorera bushake wo muri Australia niwe ufasha abagize umuryango RRGO gutanga amahugurwa y''Igitwenge gikiza"
Barasuhuzanya buri wese agahita aseka kuko yamaze kumenya ibanga ry'igitwenge gikiza
Habimana Samuel avuga ko guseka ari umuti buri wese agendana
Bemeza ko igitwenge gikiza cyabafashije kudahungabana

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza