Huye:Hakiriwe umufatanyabikorwa muri gahunda yo guca agatadowa

Yanditswe na Kanamugire Emmanuel
Kuya 30 Kanama 2016 saa 01:38
Yasuwe : XX
0

Mu cyerekezo cy’igihugu cya Leta y’u Rwanda cyo guteza imbere abenegihugu kandi ntawe usigaye inyuma, harimo na gahunda yo kubegereza ibikorwaremezo by’ibanze, harimo n’amashanyarazi nka kimwe mu byihutisha iterambere.

Mu karere ka Huye ubuyobozi buvuga ko amashanyarazi ahagaragara akiri ku kigero cya 25% kandi bifuza ko buri muturage agomba gucana kandi n’abakora imirimo inyuranye ikenera ingufu z’amashanyarazi akabageraho.

Mu rwego rwo kwihutisha iyo gahunda akarere ka Huye kagiye gukorana na sosiyete yitwa Waka Waka itanga imirasire y’izuba n’amatara afasha abaturage kubona ingufu z’amashanyarazi ku buryo bworoshye kuko uyahawe ashobora kwishyura mu buryo bw’igihe kirekire bijyanye n’ubushobozi bwe.

Jeanette Kayitesi, uyobora umushinga witwa Energy Environment Partnership (EEP) ukorera muri Waka Waka, avuga ko mu gihe cy’amezi 18 bazamara bakorera mu turere twa Huye na Nyamagabe, bafite intego yo kugeza amashanyarazi ku baturage ku buryo buhendutse kandi butangiza ibidukikije.

Kayitezi avuga ko bakoze ubushakasahatsi basanga byibuze umuturage wo mu cyaro kugira ngo abone urumuri mu rugo cyangwa acomeke telefone bimusaba amafaranga y’u Rwanda 500 buri cyumweru kandi basanga akoresha bimwe mu bikoresho byangiza ibidukikije birimo inkwi, peterori yo mu gatadowa cyangwa agakora urugendo bajya gushaka aho babona umuriro wa telefone.

Ibi ngo byatumye batekereza uburyo umuturage wo mu cyaro yabona ingufu zitangwa n’imirasire y’izuba n’itara bimufasha kubona ibyo byose kandi ku giciro kimwe n’icyo yakoreshaga kandi atangije ibidukikije.

Ati “Ni ukuvuga ngo umuturage abasha gutanga amafaranga y’u Rwanda 500 buri cyumweru agacana icyumweru, noneho mu gihe cy’ibyumweru 70 atanga amafaranga 500 buri cyumweru aba arangije kwishyura rya tara rihwanye n’agaciro k’ibihumbi 40, rigahita riba irye burundu akajya arikoresha atongeye kwishyura”.

Umuyobozi w’Akarere ka Huye, Kayiranga Muzuka Eugene yavuze ko uyu mushinga wakiriwe mu karere ayobora taliki ya 26 Kanama 2016, ukaba uje kubafasha muri gahunda bihaye yo guca agatadowa mu baturage.

Muzuka ati “Twagize amahirwe yo kubona abafatanyabikorwa baza kutwunganira muri gahunda yo gukwirakwiza amashanyarazi mu baturage bacu. Ingufu z’umuriro turacyafite nkeya mu gihugu, mu rwego rw’Akarere turi nko kuri 25%, murumva ko tukiri hasi, ariko kuba baje kutwunganira turabibonamo imbaraga zo kuzafasha abaturage bacu cyane cyane abatuye mu cyaro”.

Usibye kuba watangiye gukorera mu turere twa Huye na Nyamagabe, umushinga EEP usanzwe ukorera mu turere twa Rulindo, Gicumbi na Kamonyi kuva muri 2014, ahamaze gucuruzwa amatara n’imirasire y’izuba ibihumbi bitatu, ubuyobozi bwa Waka Waka bukavuga ko abaturage baziguze hari byinshi byahindutse mu buzima bwabo.

Alexander Brummeler, Umuyobozi wa Waka Waka mu Rwanda
Kayitesi Jeannette(hagati), umuyobozi w'umushinga EEPukorera muri Waka Waka
Amwe mu matara atangwa n'umushinga EEP

prudence@igihe.rw


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza