Kwamamaza

Huye: Batewe impungenge n’ubwiyongere bw’abana b’inzererezi mu mujyi

Yanditswe kuya 10-11-2016 saa 18:52' na Prudence Kwizera


Bamwe mu bakorera mu mujyi wa Huye n’abahatembera, bavuga batewe impungenge n’abana b’inzererezi bari munsi y’imyaka 15 y’amavuko, bari kugenda biyongera muri uyu mujyi, bagasaba ko inzego zibishinzwe ko zakita kuri iki kibazo kitarafata indi ntera.

By’umwihariko aba bana bagaragara mu masaha y’umugoroba na nijoro, nk’uko bitangazwa na bamwe mu bamotari n’abacuruzi bakorera mu mujyi wa Huye.

Umumotari witwa Kalisa yagize ati “Njyewe nirirwa mu mujyi ntwaye moto, na nimugoroba mba mpari kuko akenshi ntaha saa sita z’ijoro. Muri uyu mujyi rero inzererezi ziri kwiyongera ugeranyije no mu mezi ashize, kuko ubu hari n’amasura mashya turi kubona, sinzi aho bari guturuka. Bari kwiyongera mu masaha y’umugoroba nka saa mbiri kuzamura ukageza mu ma saa sita z’ijoro”.

Abanye-Huye baganiriye na IGIHE bahuriza ku kuba koko abana b’inzerezi bari kiyongera kandi bakaza basanga abandi bahasanzwe, bityo bagasaba ko inzego z’ubuyobozi zagira icyo zikora.

Mukamuganga yagize ati “Wenda ni uko umuntu yabivuga bakagira ngo ni ugukabya, ni ukuri abana b’inzerezi hano mu mujyi bariyongereye, kandi baje muri iyi minsi, nta byumweru bibiri bishize. Ubuyobozi bugomba kugira icyo bukora rero”.

Mu bice IGIHE yasuye yabonye abana batangira kugera mu mujyi ahagana saa tatu z’umugoroba, aho baba bari imbere y’amazu y’ubucuruzi, basaba umuntu wese babonye.

Zimwe mu mpamvu aba bana bavuga ko zatumye bata ishuri bakava no mu miryango yabo harimo amakimbirane hagati y’ababyeyi babo, ubupfubyi n’ibindi.

Fabrice Mugabo, uri mu kigero cy’imyaka 13 avuga ko yaturutse mu karere ka Muhanga, aza kuba inzerezi mu mujyi wa Huye, bitewe no kubura ababyeyi, akabura n’undi wamurera.

Olivier Bizimana w’imyaka 14 y’amavuko, avuga ko yaturutse mu murenge wa Ndora mu karere ka Gisagara, akaba yaraje kuzerera mu mujyi wa Huye kubera mukase wamutotezaga.

Hari abataka ko babiterwa n’inzara

Jean Paul Ndamutsayezu, avuga ko yaturutse mu murenge wa Kigoma mu Karere ka Huye, akaba yarabaye inzerezi kubera ko yavaha ku ishuri akabura ibyo kurya.

Ati “Mama yari arwariye mu Ruhengeri, noneho nava ku ishuri nkubura ibyo kurya, ubwo ndagenda ngiye kumureba mu Ruhengeri, ngeze i Muhanga mbona ntazagerayo, mpitamo kugaruka ino aha. Ubu ndasaba nabona ibyo kurya ubundi nkiryamira mu iteme”.

Abana bazerera mu mujyi wa Huye, bifuza kuva mu muhanda bakajya kwiga, kuko na bo batishimiye ubuzima babayemo.

Gusa iyo muganira bagaragaza ko bifuza kwiga neza kandi bafite aho baba heza nta makimbirane, kandi babona iby’ibanze mu buzima birimo ibiryo, imyambaro n’ibikoresho by’isuku.

Umwe yagize ati “Mbonye n’umugiraneza akajya kundera, cyangwa bakanjyana mu kigo kwiga, byaba ari byiza kuko nanjye iyo nirebye mbona mu buzima bwanjye hari ikibura, mbona ntacyo nzimarira”.

Berekanye aho barara munsi y’amateme

Aba bana bigaragara ko badaheruka kwikoza amazi kubera imyenda isa nabi baba bambaye bemeza ko irimo inda n’imbaragasa, berekanye aho barara munsi y’amateme.

Buri mwana afite aho arara mu iteme rye, batinya ko polisi ishobora kuza ikabafatira icyarimwe.

Hamwe muho umunyamakuru yabashije kugera ni imbere y’Inzu Mberabyombi y’Akarere ka Huye, ahandi ni ahitwa i Madina hafi y’amarembo ya Kaminuza y’u Rwanda ishami rya Huye.

Ubuyobozi bw’Akarere ka Huye buhakana ko inzererezi ziyongereye

Umuyobozi w’Akarere ka Huye, Kayiranga Muzuka Eugene, ntiyemeranya n’abavuga ko abana bazerera mu mujyi wa Huye biyongereye. Gusa avuga ko bahagaragara ariko bafite ingamba zo kubakuramo burundu.

Muzuka yagize ati “Ntabwo twavuga ko biyongera sinzi niba ahari ibarura mwakoze, ahubwo bagenda bagabanuka, (…) tukaba tunashima ababyeyi ko bagiye babyumva bakarushaho kwita ku bana babo, ngira ngo twafashe ingamba zikomeye zo guhana ababyeyi bateshuka ku nshingano zabo bakohereza abana mu mihanda, twakoze ubukangurambaga mu barimu kugira ngo bajye batubwira umwana wataye ishuri tumukurikirane tumushake”.

Arakomeza ati “Ingamba kuri bake barimo n’abo bagomba kuvamo, kuko hari amatsinda twashyizeho agenda adufasha kureba abo bana, tukareba ibibazo bafite, ikibatera kujya mu mihanda, akaba ari cyo tujya gukemura mu ngo zabo”.

Ubuyobozi bw’akarere ka Huye buvuga kandi ko ingamba zashyizweho zo gukura abana mu muhanda burundu, bazihuriye n’utundi turere bahana imbibe, kuko hari n’abaturukayo bakaza kuzerera mu mujyi wa Huye.

Aba bana bazerera bakunze kugaragara mu mujyi wa Huye mu masaha y'umugoroba
No ku manywa hari ubwo bagaragara
Mu mujyi wa Huye rwagati ahakunze kugaragara abana b'inzererezi
Umwe mu bana asohoka aho arara mu muferege w'amazi imbere y'Inzu Mberabyombi y'Akarere ka Huye

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved