Kwamamaza

Huye: Bamaze amezi atatu bavoma ibirohwa ku bw’imiyoboro y’amazi yaciwe

Yanditswe kuya 8-09-2016 saa 17:39' na Prudence Kwizera


Abaturage batuye mu midugudu igera kuri itanu yo mu kagari ka Gatobotobo, Umurenge wa Mbazi, mu karere ka Huye, bavuga ko bamaze amezi arenga atatu bavoma amazi mabi mu gishanga cya Rwabuye, nyuma yuko imiyoboro y’amazi meza bari bafite iciwe ubwo hakorwaga imihanda mu gace batuyemo.

Ubwo umunyamakuru wa IGIHE yasangaga aba baturage bavoma mu gishanga cya Rwabuye bamubwiye ko imiyoboro ibazanira amazi aho batuye ikimara gucibwa batakamniye ubuyobozi ariko ntibwabakemurira ikibazo.

Ancille Mukamusoni ati “Imashini zaje zikora umuhanda zitemagura amatiyo, icyo dusaba uyubobozi ni uko bwadusanira amatiyo tukongera kubona amazi meza, kuko ayo tuvoma mu kabande aba arimo inzoka, tuyavoma dufite ubwoba”.

Agnes Mukamanzi ati “Izi ngo zose zari zifite amazi, duhora tubaza bakatubwira ngo amazi azaza, ayo tuvoma mu kabande aba arimo imisundwe, haba harimo n’utuyoka kuko iyo uteretse ijerekani ukarebamo mu kanya ubona ubuyoka bwigoronzora. Turifuza kugira ngo tubone amazi, kuko bimaze igihe kirekire”.

Aba baturage bavuga ko amazi meza bari basanzwe bavoma hafi y’ingo zabo ndetse hari n’abari barayagejeje mu nzu zabo, bayegerejwe n’abihayimana b’abafurere b’Abafaransisikani batuye muri uyu murenge wa Mbazi.

Ubwo twabazaga aba bihayimana uko iki kibazo gihagaze, umwe muri bo utifuje ko amazina ye yatangazwa yabwiye IGIHE ko iki kibazo kikimara kuba bandikiye ubuyobozi bw’Akarere ngo bugishakire umuti, ariko hakaba hashize igihe kirekire kidakemuka.

Gusa yijeje abaturage ko bazakomeza kubakorera ubuvugizi umunsi ku wundi bakongera kubona amazi meza nk’uko byahoze.

Umuyobozi wungirije ushinzwe iterambere ry’ubukungu mu Karere ka Huye, Cyprien Mutwarasibo avuga ko yari azi ko iki kibazo cyakemutse ariko ngo bagiye kugikurikirana, gusa ntagaragaza igihe kizakemukira.

Mutwarasibo yagize ati “Abafurere twari twavuganye yuko ibyangiritse babisana, noneho bakatuzanira agaciro k’ibyo bakoreshseje tugafatikanya kureba uko twabishyura. Twibazaga ko Abafurere nka bene umuyoboro babikoze, ariko ubwo batarabikora turaza gukurikirana bikorwe”.

Ubuyobozi bw’akarere ka Huye buvuga ko kugeza ubu ibipimo by’ubushakashatsi byerekana ko abatuye aka karere bari ku kigereranyo cya 82% bafite amazi meza kandi batajya barenga metero 200 bajya kuvoma.

Abaturage bo mu kagari ka Gatobotobo bataka kubura amazi ni abatuye mu midugudu ya Rwabuye, Gasharu, Bigangara, Mpinga na Kanyinya.

Bagaragaza ko kuba bari kuvoma amazi mabi yo mu gishanga, biri kubagiraho n’izindi ngaruka zitandukanye, nk’abafite ubwiherero mu nzu bagaragaza impungenge z’ubuzima bw’abagize imiryango yabo.

Amazi bavoma mu kabande ntibizeye ubuziranenge bwayo

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 11 Ukuboza 2016
Copyright © 2009 -2014 - IGIHE Ltd - All Rights Reserved