Kwamamaza

Huye: Amezi atandatu yo kuvugurura mu ‘Cyarabu’, abaye imyaka y’amagambo gusa

Yanditswe kuya 15-11-2016 saa 14:45' na Prudence Kwizera


Hashize imyaka itandatu ubuyobozi bw’Akarere ka Huye bufunze imiryango y’inzu zakorwerwagamo ubucuruzi mu Mujyi wa Huye ahazwi nko mu Cyarabu, aho bwavugaga ko ba nyira zo bagomba kuvugurura bakazamura inyubako z’amagorofa zijyanye n’igihe, gusa kuri ubu nta kirakorwa kuko hasa n’ahabaye itongo.

Icyo gihe bavugaga ko mu mezi atandatu aha hantu hazaba hamaze kuvugururwa hongeye no gukorerwa. Kuri ubu iyo ugeze aho mu Cyarabu, ushobora kwibaza niba uri mu Mujyi wa Huye bikakuyobera, kuko habaye amatongo, bitandukanye cyane n’uko hari hameze mu myaka itandatu ishize.

Bamwe mu bahafite inzu bavuga ko ubuyobozi bwabafungiye bubasaba kubaka amagorofa kandi batabishobora kubera ubushobozi buke.

Marie Claire Umurerwa, umwe mu bahafite inzu agira ati "Mbere hari hameze neza, abantu bacuruza neza, twari dufite inzu dukodesha ku buryo umuntu uhaheruka icyo gihe ubu ahageze yakumirwa. Akarere karadufungiye ngo tugomba kubaka igorofa rifite inzu eshatu, […] ntabwo byari gushoboka kuko nta bushobozi dufite, kandi na banki zanze kuduha inguzanyo kuko tutagicuruza."

Umurerwa akomeza avuga ko nyuma yo kubona badashoboye kubaka igorofa, bashatse kugurisha kugira ngo bahahe abafite ubushobozi, ariko nabyo bikanga bitewe n’uko babahenda cyane.

Abanye-Huye bagaragaza icyakorwa

Bamwe mu bafite inzu mu Cyarabu n’abandi basanzwe bahazi hakimeze neza, basanga Akarere gakwiye kureka ba nyir’inzu bakavugurura mu buryo busanzwe banacuruza abandi bakodesha, noneho bagahabwa igihe runaka cyo kuba bamaze kuzamura inyubako zifuzwa.

Uwineza yagize ati "Ntabwo umuntu yaza ngo ahite agufungira ku wa Mbere narangiza avuge ngo ku wa Kabiri wubake igorofa, ahubwo nibatubwire bati ‘muvugurure mukore inzu zisa neza mukomeze mucuruze, noneho mwitegure mu gihe runaka mube mwavuguruye’, ubwo natwe nk’abacuruzi tuzajya muri koperative tubyubahirize."

Igihombo ku bacuruzi no kuri Leta…

Abaturage bemeza ko gufunga mu Cyarabu ari igihombo kinini kuri Leta no ku bacuruzi kuko hinjizaga imisoro myinshi. Bavuga ko ubuyobozi bw’Akarere bwabikoze mu buryo buhutaza abacuruzi, bikanatuma imisoro batangaga itongera kwinjira mu isanduku ya Leta.

Saidi Abadallah yagize ati "Ubu urabona ko habaye itongo, harakonje pe! Na Leta yarahombye kuko imisoro n’ibindi byose abacuruzi batangaga byarahagaze, imyaka itandatu hafunze ni myinshi, urumva ko bahombye, kandi n’abaturage bazaga kuhahahira barahombye."

Akarere kati ’gufunga Icyarabu byatanze umusaruro’

Umuyobozi w’Akarere ka Huye, Kayiranga Muzuka Eugène, avuga ko umujyi wose ugomba kugira icyerekezo cyiza, kandi ko kuba Icyarabu cyarafunzwe byatanze umusaruro mwiza, kuko byatumye hari inzu zizamurwa ahandi muri uyu mujyi. Atanga ingero za zimwe mu nyubako zimaze kuzamurwa mu Mujyi wa Huye, bitewe n’uko akavuga ko byatewe n’uko mu Cyarabu hafunzwe.

Ati “Iyo urebye amasoko yubatswe, ukareba inzu zubatswe hariya kwa Semuhungu, kwa Misago, buriya ni uko ziriya nzu zo mu Cyarabu zafunzwe. Ni ukuvuga ngo ni umusaruro wavuyemo. Hubatswe amasoko abiri, harimo rimwe ryakira abantu barenge 2 000, n’irindi ryakira abarenga 1 000, abo base ni abacururizaga mu Cyarabu, iyo rero hariya (mu Cyarabu) hadafungwa ariya masoko n’izindi nyubako ntibiba byarubatswe.”

Inama ku badafite ubushobozi bwo kubaka igorofa

Umuyobozi w’Akarere ka Huye, asanga ababuze ubushobozi bwo kubaka bakwiye kwishyira hamwe n’ababufite bakazamura inyubako bakayifatanya.

Ati "Kwishyira hamwe bakazana ubutaka, abandi nabo bakubaka inzu bakayifatanya ni imwe mu nzira yafasha umuntu ufite inzu adafite ubushobozi bwo kuvugurura.”

Meya Muzuka kandi abagira inama yo kuba bagurisha bakimuka cyangwa bakegera ibigo by’imari na banki bikabafasha kubaka babaha inguzanyo cyangwa ubundi buryo.

Akarere nta misoro kahombye kubera ifungwa ry’Icyarabu

Muzuka avuga ko atemeranya n’abavuga ko kuba Icyarabu cyarafunzwe byatumye akarere gahomba imisoro, ahubwo ngo imisoro yariyongereye kuko hari ibindi bikorwa byakozwe kubera ifungwa ryo mu Cyarabu.

Ati “Ibijyanye n’imisoro muvuze ngo yaragabanutse mwaba mwibeshye cyane, kuko iyo urebye uburyo Akarere twagiye tuzamuka mu misoro tuva kuri miliyoni 500 cyangwa 600, tukaba tugeze kuri miliyari ku mwaka, kuko amasoko yubatswe yagiyemo abantu benshi, n’andi mazu meza yubatswe nayo yagiyemo abantu benshi, ibijyanye n’imisoro byo bimeze neza.”

Amaherezo igisa n’amatongo yo mu Cyarabu azubakwa

Ashingiye ku bantu bamaze gusaba ibyangombwa byo kubaka, Meya Muzuka avuga ko hari icyizere ko Icyarabu kizavugururwa kikamera neza nk’uko byifuzwa, n’ubwo bwose byatinze.

Muzuka avuga ko Abarabu bahafite inzu bamaze icyumweru kimwe bavuganye ko babonye ibyangombwa biturutse iwabo, bityo ngo bagiye gutangira kubaka mu gihe gito. Naho Abanyarwanda bo ngo abenshi bamaze gusaba ibyangombwa byo kuvugurura ku Karere.

Ati “Abarabu dufitanye gahunda, kuko no mu cyumweru gishize twaravuganye batubwira ko ibijyanye n’impapuro zibemerera kuza kubaka basa naho babirangije, ikindi n’abo batari Abarabu, nabo baratangiye, hari abamaze kugurisha ibibanza byabo tuzi, hari abamaze gusaba ibyangombwa byo kubaka, ubwo tukaba twizera ko umujyi wacu ugiye kugira isura nziza.”

Umuyobozi w’Akarere ka Huye yemera ko uko Icyarabu kimeze kuri ubu byangiza isura y’Umujyi wa Huye, ariko akizeza ko amaherezo ari uko bizarangira havuguruwe nubwo nta gihe gitangwa bizaba byakorewe.

Imyaka itandatu irashize inzu zo mu Cyarabu zitaravugururwa
Mu Cyarabu hasa n'ahabaye itongo bitewe n'uko hatagikorerwa
Zimwe mu nyubako zihari zatangiye kwangirika
Isoko rya Kijyambere rya Huye, ni kimwe mu byo akarere kavuga ko ari umusaruro wo gufunga mu Cyarabu

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved