Huye: Abaturage basobanuriwe uko bakwirinda diyabete

Yanditswe na Prudence Kwizera
Kuya 11 Ukuboza 2017 saa 10:29
Yasuwe :
0 0

Hari bamwe mu baturage bo mu karere ka Huye bavuga ko bari basanzwe bazi ko diyabete ari indwara y’abakire, bo bakumva itabareba bityo n’ibyo kuyirinda bireba abifite gusa.

Abo baturage babigaragaje kuri uyu wa 10 Ukuboza 2017, ubwo bitabiraga igikorwa cyateguwe n’abanyeshuri bo muri Kaminuza y’u Rwanda biga ubuvuzi cyo kwigisha abaturage no kubasobanurira byinshi kuri diyabete ndetse no kubapima ku buntu ngo bamenye uko bahagaze.

Abo banyeshuri bibumbiye mu muryango witwa ‘Member of Medical Student Association of Rwanda’ (MEDISAR), basobanuriye abaturage ko diyabete ishobora guterwa n’isukari nyinshi itabasha gukoreshwa n’umubiri w’umuntu, kunywa itabi ryinshi, kunywa inzoga nyinshi, kudakora imyitozo ngororamubiri no kurya indyo ituzuye.

Abaturage basobanuriwe ko bimwe mu bimenyetso bishobora kugaragara ku muntu urwaye diyabete harimo kugira inyota cyane, gusonza buri kanya, no kwihagarika bidasanzwe, ariko basabwa kwipimisha kugira ngo bamenye uko bahagaze ndetse bahabwe inama na muganga.

Nyuma y’icyo gikorwa bamwe mu baturage babwiye IGIHE ko bari basanzwe bazi ko diyabete ari indwara y’abakire iterwa no kunywa isukari, bakumva ko nta mukene wayirwara.

Ayinkamiye Clementine ati “Ntabwo nari nzi byinshi kuri diyabete. Muri make numvaga ko ari indwara y’abakire banywa isukari nyinshi, nta mukene wayirwara, gusa badusobanuriye ibishobora kuyitera n’uko twayirinda, ku buryo nanjye nyuma yo kwipimisha mvuye aha mfashe ingamba zo kuyirinda”.

Umuyobozi wa MEDISAR, Claude Nsabimana avuga ko nk’abanyeshuri biga ubuganga bahisemo gufata iya mbere mu kurwanya diyabeti basobanurira abaturage byinshi kuri yo kuko basanze hari abatayisobanukiwe.

Nsabimana ati “Iyo tugiye hanze mu baturage dusanga bamwe bakunze kuvuga ko diyabate iterwa n’isukari kandi bakumva ko isukari inyobwa n’abakire gusa, ibyo sibyo kuko diyabati iterwa n’isukari nyinshi itabasha gukoreshwa n’umubiri w’umuntu, ishobora guterwa nanone n’itabi ryinshi, kudakora siporo, kunywa inzoga nyinshi, cyangwa kubura indyo yuzuye”.

Nsabimana akomeza avuga ko nk’abanyeshuri biga ubuvuzi bahisemo kwigisha abaturage kuko kwirinda biruta kwivuza.

Umuyobozi wungirije wa Kaminuza y’u Rwanda ishami rya Huye, Cassien Muhire, yashimye icyo gikorwa abanyeshuri bateguye, avuga ko ari byiza ko abafite ubumenyi babusangiza abandi, abizeza inkunga mu bikorwa byiza nk’ibyo.

Mu mwaka wa 2016, ubushakashatsi bw’Ikigo cy’Igihugu cy’Ubuzima, RBC, bwerekanye ko abanyarwanda bagera kuri 3% (abarenga 360, 000) barwaye diyabete ariko ababizi batarenga ibihumbi 25, kuko abenshi batajya kwisuzumisha ndetse yabahitana bamwe bakavuga ko ari amarozi.

Abaturage bo mu Karere ka Huye basabwe kwipimisha n’izindi ndwara zitandura zirimo umutima, impyiko n’izindi, bibutswa ko gukora siporo ari umwe mu miti irambye yabarinda izo ndwara zose.

Bamwe mu baturage bo mu Karere ka Huye bitabiriye kwipimisha diyabete no guhabwa inama z'ubuzima
Cassien Muhire, Umuyobozi wungirije wa Kaminuza y’u Rwanda ishami rya Huye
Claude Nsabimana, Umuyobozi wa MEDISAR avuga ko bahisemo kwigisha abaturage kuko kwirinda biruta kwivuza

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza