00:00:00 IGIHE NETWORK KN KINYARWANDA EN ENGLISH FR FRANCAIS

Huye: Abaturage bagera kuri 50% bagaragaje kutanyurwa na serivisi bahabwa n’ibitaro by’akarere

Yanditswe na Prudence Kwizera
Kuya 24 Kanama 2021 saa 03:25
Yasuwe :
0 0

Abakenera serivisi z’ubuvuzi mu Karere ka Huye bangana na 50%, bagaragaje kutanyurwa n’izo bahabwa n’ibitaro by’ako Karere (Ibitaro bya Kabutare) basaba ko uko bakirwa n’uko bavurwa byakongerwamo ingufu.

Babigaragaje mu bushakashatsi bwakozwe na Association Modeste et Innocent (AMI) bugamije guhuza abakenera serivisi n’abayitanga kugira ngo irusheho kuba nziza.

Ubwo bushakashatsi bwakorewe ku bantu 100 bivurije kuri ibyo bitaro mu mezi ya Kamena na Nyakanga 2021 bwagaragaje ko abangana na 50% batishimira serivisi bahabwa na byo.

Muri ubu bashakashatsi abaturage bagiye babazwa ibibazo birebana n’uko babona serivisi bahabwa n’ibitaro bya Kabutare, ndetse na byo bihabwa umwanya kuko byihaye amanota.

Ku kijyanye no guhabwa serivisi yihuse ku buryo nta wushobora kuremba, abaturage batanze amanota 50% na ho ibitaro bya Kabutare byiha 75%.

Ku kijyanye no guhabwa imiti ku murwayi wagiye kwivuriza ku ikarita y’ubwisungane mu kwivuza, abaturage bahaye ibitaro bya Kabutare amanota 40% byo byiha 80%.

Uko abaforomo bakira neza abarwayi bakabaganiriza neza ndetse n’abakora isuku badahutaza abarwayi, na cyo cyarebweho muri ubu bushakashatsi; abaturage bahaye ibyo bitaro amanota 60% byo byiha 90%.

Muri rusange abaturage bahaye ibitaro bya Kabutare amanota 50% byo byiha 81,6% bivuze ko harimo ikinturanyo cya 31,6%.

Bamwe mu bagiye kwivuriza kuri ibyo bitaro bavuze ko hari ibyo babona bikwiye kuvugururwa muri serivisi bahabwa birimo kongera umubare w’abakozi bikagabanya imirongo batonda bategereje guhabwa serivisi.

Nakabonye Véneranda ati “Njyewe nasaba ko bakongera umubare w’abakozi wenda bakaba babiri kuko tumara umwanya munini ku murongo dutegereje umuntu akaba yaharembera. Gusa ntitwabaveba kuko na bo baragerageza, ntabwo baba bahagurutse ngo bagende badusige.”

Mporanyi Modeste we asaba ko mu mezi atatu amaze muri ibyo bitaro arwaje umuntu, bahawe serivisi nziza ariko hakwiye kongerwa imbaraga ahatangirwa serivisi zo kwishyura.

Mutaganda Fabien ushinzwe ubuvugizi muri AMI, yavuze ko ashingiye ku byavuye mu bushakashatsi yagira inama Ibitaro bya Kabutare ku gushyira ingufu mu bijyanye no kwakira abarwayi no kwibutsa abaforomo kutabwira nabi abo baha serivisi.

Ati “Bisaba ko aho bakirira abarwayi n’aho bishyurira hashyirwa abakozi bahagije n’imashini zihagije kugira ngo haveho biriya bintu byo kubona abantu barunze bari ku mirongo.”

“Ikindi twabagiraho inama ni uburyo bwo kwibutsa abaforomo n’abaganga muri rusange kumenya kujya babwira ababagana imvugo nziza kuko umuturage uza ku bitaro aza arembye, rero aje agatinda guhabwa serivisi aremba kurushaho cyangwa iyo abwiwe nabi asubira inyuma.”

Ubuyobozi bw’ibitaro bya Kabutare buvuga ko kenshi ababitangamo serivisi bahugurwa ku kwakira neza babagana kandi hashyizweho n’agasanduku k’ibitekerezo kugira ngo uwakiriwe nabi abashe kubigaragaza bikosorwe.

Umuyobozi Mukuru w’Ibitaro bya Kabutare, Dr Nzambimana Jean Bosco, yavuze ko ubusakashatsi bwa AMI babushimye kuko bubafasha kumenya aho bashyira ingufu.

Yavuze ko agendeye ku kinyuranyo kiri hagati y’amanota abaturage bahaye ibitaro ndetse n’ayo byo ubwabyo byihaye, bakuyemo isomo.

Ati “Twabonye ko nubwo twe twumva ko dutanga serivisi nziza, hari aho tutaranoza, rero ni isomo rikomeye kandi hari ibyo bavuga ukabona koko ni byo. Tugiye kwigira kuri icyo kinyuranyo dufate umwanzuro ku buryo nka nyuma y’igihembwe bazagaruka bakareba uko byakosowe kuko ni ikintu kidufasha kubaka serivisi dutanga.”

Ku kijyanye no gutanga imiti ku bivuriza ku ikarita y’ubwisungane mu kwivuza, AMI ivuga ko yemeranyije n’ibitaro bya Kabutare ko bazagikoraho ubuvugizi ku nzego zibishinzwe kugira ngo na bo bajye bahabwa imiti yose kimwe n’abakoresha ubundi bwishingizi.

Mu kwezi kumwe Ibitaro bya Kabutare biganwa n’ababikeneraho serivisi basaga 3500.

Abaturage bagera kuri 50% bagaragaje kutanyurwa na serivisi bahabwa n’Ibitaro by’Akarere ka Huye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .