Kwamamaza

HCR yemeje ko 2017 izarangirana n’ikibazo cy’impunzi z’Abanyarwanda

Yanditswe kuya 1-10-2016 saa 14:29' na Cyprien Niyomwungeri


Ishami ry’Umuryango w’Abibumbye ryita ku mpunzi (HCR), amatsinda y’abaturutse mu bihugu bitandukanye bya Afurika ndetse n’Umuryango wa Afurika yunze ubumwe (AU), bemeranyijwe gushyira akadomo ku kibazo cy’impunzi z’Abanyarwanda cyari kimaze imyaka irindwi kiganirwaho.

Iyi nama ikomeye yabaye ejo kuwa Gatanu ku biro bya HCR i Geneva mu Busuwisi, yemeje ko kuwa 31 Ukuboza 2017, hazahagarikwa burundu ubufasha ubwo ari bwo bwose bwagenerwaga impunzi z’Abanyarwanda zizaba zikiri mu buhungiro.

Yitabiriwe n’abahagarariye u Rwanda n’abo mu bindi bihugu bifite impunzi nyinshi z’Abanyarwanda nka Angola, Burundi, Cameroon, Repubulika Iharanira Demokarasi ya Congo, Kenya, Malawi, Repubulika ya Congo, Afurika y’Epfo, Uganda, Zambia na Zimbabwe.

Bagarutse ku bushake bwo gushyiraho ingamba zo kurangiza ubuhunzi bw’Abanyarwanda zatangijwe mu Ukwakira 2009 zikaba zizaba zashyizwe mu bikorwa mu mpera z’umwaka utaha.

Komiseri mukuru wa HCR, Filippo Grandi yavuze ko iyi nama yashyize akadomo ku biganiro bigamije guca ubuhunzi ku Banyarwanda bahungiye mu bihugu bitandukanye bya Afurika kuva mu 1959 kugeza 1998.

Yagize ati“Ku Isi hari impunzi zirenga miliyoni 21, icy’ingenzi ntabwo ari ukubitaho no kubaha ubufasha butandukanye ahubwo ni ugushaka ibisubizo hakiri kare. Inama y’uyu munsi ni intambwe y’ingenzi mu gushakira ibisubizo impunzi z’Abanyarwanda zahunze hagati ya 1959 na 1998 no gushyira akadomo kuri ubwo buhunzi nka bumwe mu bumaze igihe kirekire muri Afurika.”

Kuva mu mwaka wa 2002 Leta y’u Rwanda yagiye ihamagarira amahanga kohereza impunzi z’abanyarwanda mu gihugu cyabo ndetse na bo bakangurirwa gutaha kuko ibyo bari bahunze byari byararangiye.

Hashize imyaka itatu kandi hafashwe umwanzuro ko sitati y’ubuhunzi ku banyarwanda bari hirya no hino ku Isi ikurwaho, ibyemezo byagiye bikomwa mu nkora n’impamvu zitandukanye.

Ibihugu byose byitabiriye iriya nama byiyemeje ko bizakomeza gushyigikira impunzi ziziyemeza gutahuka ku bushake mu Rwanda mu mutekano usesuye, bizifasha kubona amakuru yuzuye ku bijyanye no gutahuka.

Itangazo rya HCR rivuga ko yemeye gutanga impamba ku mpunzi zishaka gutahuka, mu rwego rwo gushyira mu bikorwa gahunda yayo yo gucyura impunzi.

Ibihugu byose byasabye ihagarikwa rya sitati y’ubuhunzi, byijejwe ko impunzi izaba itarataha kuko sitati yayo y’ubuhunzi itararangira, izakomeza guhabwa ubufasha mpuzamahanga.

Umuyobozi wungirije wa UNHCR ushinzwe imibereho myiza, Volker Türk, yerekanye ko biteguye gukomeza gukorana na za Leta zakiriye impunzi z’Abanyarwanda mu gushaka uko ubwo buhunzi bwarangirana n’Ukuboza 2017.

Kugeza ubu impunzi z’abanyarwanda zikiri mu buhungiro zigera ku 286 336 nk’uko imibare ya UNHCR ibigaragaza, ariko Minisitiri Mukantabana avuga ko iyi mibare ishobora kwiyongera kuko Repubulika Iharanira Demokarasi ya Congo ivuga ko ifite abagera ku bihumbi 245.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved