Hateguwe umuganda udasanzwe utangiza icyumweru cy’Ubumwe n’Ubwiyunge

Yanditswe na Kanamugire Emmanuel
Kuya 1 Ukwakira 2016 saa 10:43
Yasuwe : XX
0

Kuri uyu wa 1 Ukwakira hakozwe umuganda udasanzwe ku rwego rw’igihugu mu gihe hatangizwa icyumweru cyahariwe Ubumwe n’Ubwiyunge.

Abayobozi mu nzego zitandukanye za leta bakoreye mu bice byo hirya no hino aho bari bugire ubutumwa bahatangira umuganda urangiye.

Minisitiri w’Intebe, Anastase Murekezi yawukoreye mu Karere ka Ngororero, aho yifatanyije n’abaturage mu gutera imbuto y’ibishyimbo muri iki gihe hatangizwa igihembwe cy’ihinga.

Perezida wa Sena Bernard Makuza yawukoreye mu Karere ka Huye, Umurenge wa Karama naho Perezida w’Umutwe w’Abadepite, Mukabalisa Donathille yifatanya n’abayobozi b’Umujyi wa Kigali bawukoreye mu Murenge wa Nyamirambo.

Tariki ya 1 Ukwakira 1990, abana b’u Rwanda bari barambiwe kuba mu buhunzi no kutihanganira akarengane kari mu Rwanda bafashe iya mbere batangira urugamba rwo kubohora u Rwanda, byarugejeje ku bumwe n’ubwiyunge bw’abarwo.

Ni muri urwo rwego uyu munsi tariki ya 1 Ukwakira 2016, mu gihugu hose hateguwe umuganda ufitanye isano n’urwo rugamba , kubera uruhare umuganda wagize mu bumwe n’ubwiyunge bw’Abanyarwanda nyuma ya Jenoside yakorewe Abatutsi mu 1994.

Umunyamabanga Nshingwabikorwa wa Komisiyo y’ubumwe n’Ubwiyunge Fidele Ndayisaba yateguye uwo muganda yasobanuye aho ibyo byombi bihurira, ubwo yagezaga ku banyapolitiki uko Abanyarwanda babona uruhare rwabo mu kubageza ku bumwe n’ubwiyunge mu ntangiriro z’iki cyumweru.

Ati “ Hateganyijwe icyumweru cy’ubumwe n’ubwiyunge kizatangira ku itariki ya 1 Ukwakira, ifite amateka akomeye kuko ku ya 1 Ukwakira mu 1990,umunsi hatangiwe urugamba rwo kubohora u Rwanda kandi mu by’Abanyarwanda bibohoyemo harimo ingoyi y’amacakubiri y’irondakoko y’irondakarere n’ibindi bibazo byari bibangamiye umuryango nyarwanda.”

Muri uwo muganda harakorwamo ibikorwa bitandukanye bigamije ubumwe n’ubwiyunge n’ibibushimangira, byose bigamije kunganira amajyambere rusange.

Depite Mukabalisa yifatanije n'Umujyi wa Kigali mu muganda wabereye mu Murenge wa Nyamirambo
Minisitiri w'Intebe, Anastase Murekezi yifatanyije n'Abaturage ba Ngororero mu gutera imbuto y'ibishyimbo
Perezida wa Sena, Bernard Makuza we yifatanyije n'abaturage bo mu Karere ka Huye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza