Kwamamaza

Musanze:Ikoranabuhanga ryinjijwe muri gahunda yo gusaba ibyangombwa byo kubaka

Yanditswe kuya 7-09-2016 saa 11:06' na Jean Claude Bazatsinda


Ikigo cy’Igihugu gishinzwe imyubakire (RHA) cyatangije uburyo bwo gusaba no gutanga ibyangombwa byo kubaka mu mijyi yunganira Kigali, hifashishijwe ikoranabuhanga.

Ubu buryo bwatangijwe ku mugaragaro mu Karere ka Musanze, ku wa 6 Nzeri 2016, bwiswe “Building Permits Management Information System, BPMIS”, bukaba bugiye kugeragezwa mu mijyi yunganira Kigali uko ari itandatu.

Abasaba ibi byangombwa bazajya begera umukozi uzaba ubishinzwe ku biro by’Akarere abigishe inzira banyuramo cyangwa bagane muri za Cyber Café buzuze ibisabwa maze bishyure bakoresheje ‘mobile money.’

Buje mu gihe abaturage bavugaga ko serivisi bahabwa zigenda buhoro kubera ubwinshi bw’ababa bazikeneye bikabakerereza ndetse bamwe bakanavuga ko haba harimo ruswa.

Ntawenanze Hamimu yagize ati “Njye nasabye ibyangombwa ahantu hatandukanye ariko ahenshi narasiragijwe bikabije kandi wabonaga ko hari abo bakiraga mbere n’ubwuzu kuko baziranye, abandi bakabisabira kuri telefone batiriwe bagera aho bitangirwa.”

Ikigo cy’Igihugu gishinzwe imyubakire kivuga ko ubu buryo buzakemura ibibazo birimo isiragira ry’abaturage na ruswa ivugwa muri uru rwego kandi buzafasha mu kubika amakuru yizewe.

Umugenzuzi ushinzwe iyubahiririzwa ry’amategeko no kugenzura imyubakire n’ibipimo ngenderwaho muri Rwanda Housing Authority, Haruna Nshimiyimana, yagize ati “Ubu buryo buzaca ibyo gusiragiza abaturage na ruswa kandi buzajya bubika amakuru ku buryo bwizewe.”

Umunyamabanga wa Leta muri Minisiteri y’Ibikorwa remezo,Christian Rwakunda, yasabye abakeneye kubaka bose ko babikora hakurikijwe igishushanyombonera, hirindwa akajagari ndetse n’ibihombo bahuraga na byo mu gihe bubatse ahatarateganyijwe.

Yagize ati “Ubu buryo bufasha kugena no kumenya neza ahemewe kubaka.Bizakuraho imbogamizi zose n’ibihombo mu gihe hubakwaga hadakurikijwe igishushanyombonera.”

Yakomeje asaba abazafasha abaturage mu kubona ibyangombwa byo kubaka ko bazirinda ko ubu buryo bwagaragaza imikorere idahwitse n’izindi nenge.

Imijyi itandatu yatoranyijwe ngo yunganire Kigali ni Musanze, Rubavu, Muhanga, Huye, Rusizi na Nyagatare.

Ishyirwa mu bikorwa ry’ubu buryo bwo gusaba no gutanga ibyangombwa byo kubaka hakoreshejwe ikoranabuhanga, Leta y’u Rwanda ibuterwamo inkunga na Banki y’Isi.

Abitabiriye igikorwa cyo gutangiza uburyo bwo gusaba ibyangombwa byo kubaka hakoreshejwe ikoranabuhanga
Umunyamabanga Uhoraho muri Mininfra, Christian Rwakunda

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 27 September 2016
Copyright © 2009 -2014 - IGIHE Ltd - All Rights Reserved