00:00:00 IGIHE NETWORK KN KINYARWANDA EN ENGLISH FR FRANCAIS

Hatangijwe ibikorwa byo kuhira mu mirenge 25 yibasiwe n’izuba Iburasirazuba

Yanditswe na Hakizimana Jean Paul
Kuya 16 Ugushyingo 2021 saa 02:10
Yasuwe :
0 0

Minisiteri y’Ubuhinzi n’Ubworozi ifatanyije n’ubuyobozi bw’Intara y’Iburasirazuba, batangije ibikorwa by’umuganda wo kuhira imyaka no gutera ubwatsi bushobora guhangana n’izuba mu bice bimwe na bimwe byo mu mirenge 25 yahuye n’ikibazo cy’izuba ryinshi.

Ni ibikorwa byatangijwe mu turere hafi ya twose kuri uyu wa Mbere tariki ya 15 Ugushyingo 2021 nyuma y’aho bigaragaye ko mu mirenge 95 igize iyi Ntara, igera kuri 25 yahuye n’ikibazo cy’izuba ryinshi kuburyo muri iyi mirenge hashobora kugaragara ikibazo cy’amapfa.

Guverineri w’Intara y’Iburasirazuba Gasana Emmanuel, yavuze ko hari ibice bimwe byababaye cyane kurusha ibindi kubera izuba, ariyo mpamvu bari gukangurira abaturage batuye muri iyi Ntara gutera ibiti byinshi kuko bizana imvura.

Yakomeje agira ati “ Iyo ugiye kureba usanga ari utugari tumwe n’imirenge imwe ariko muri rusange hari imirenge ibabaye cyane kurusha indi. Nko muri Kirehe hari Umurenge wa Mpanga, muri Kayonza imirenge ya Ndego, Mwili na Murundi, wajya Nyagatare hari Umurenge wa Rwimiyaga, Gatsibo ni Umurenge wa Rwimbogo, Bugesera ni imirenge hafi itanu naho Rwamagana hakaba imirenge nka Mwulire na Karenge.”

Yavuze ko kuri ubu bari kugerageza kureba ahababaye cyane ariko ngo no mu borozi byabagizeho ingaruka kuburyo hari gusuzumwa uburyo bashobora gufashwa mu bushobozi buhari.

Bamwe mu baturage buhiriwe imyaka bavuze ko izuba ryavuye muri uyu mwaka ryangije ibishyimbo n’ibigori bari barateye, bagasaba Leta kubafasha kubona izindi mbuto zera vuba babasha gutera.

Gasana Damas utuye mu Kagari ka Kirebe mu Murenge wa Rwimiyaga wari wahinze ubwatsi ku buso bungana na hegitari ebyiri, yavuze ko izuba ryinshi riri kuva ryatumye inka ze zisonza ndetse n’umukamo uragabanuka.

Minisitiri w’Ubuhinzi n’Ubworozi. Dr Gerardine Mukeshimana, yasabye abahinzi kwita cyane ku bihingwa byihanganira izuba kugira ngo bizabafashe mu kurwanya inzara.

Yibukije abahinzi cyane cyane abegereye amazi ko uyafite atarumbya, abasaba kuyakoresha buhira imyaka yabo.

Abahinga ku buso buhujwe yabasabye kwishyira hamwe bakuhira bakoresheje imipira izamura amazi bahawe na Leta , abizeza ubufatanye muri iki gihe imvura yabaye ingume hirya no hino muri iyi Ntara.

Uyu muganda wabereye mu mirenge yibasiwe n'izuba ryinshi mu Burasirazuba
Minisitiri Dr Mukeshimana yasabye abaturage kwita ku myaka yera vuba, no guhinga ibihingwa byihanganira izuba
Abaturage basabwe gushyira hamwe mu kuhira imyaka muri iki gihe bugarijwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .