Hasobanuwe uburyo kutandikisha umutungo mu by’ubwenge ari igihombo

Yanditswe na Evariste Nsengimana
Kuya 24 Kamena 2019 saa 06:22
Yasuwe :
0 0

U Rwanda rwatangije icyumweru cyahariwe kumenyekanisha akamaro ko kurengera umutungo bwite mu by’ubwenge ku bayobozi b’ibigo by’amashuri,iby’ubushakashatsi n’iby’abikorera n’uruhare kuwurengera bigira mu iterambere.

Iki gikorwa cyatangiriye muri Kigali Marriot Hotel guhera kuri uyu wa 24 Kamena, cyateguwe n’umuryango ushinzwe kurengera umutungo bwite mu by’ubwenge(World Intellectual Property Organisation:WIPO) n’ikigo gishinzwe Iterambere mu Rwanda (RDB) gifite mu nshingano kwandika no kurengera uwo mutungo.

Umuyobozi Mukuru wungirije wa RDB, Emmanuel Hategeka, yavuze ko u Rwanda ruzi akamaro kwandikisha umutungo bwite mu by’ubwenge bifite ku iterambere ry’umuturage n’iry’ubukungu muri rusange, ariyo mpamvu rwimakaje politiki yo guteza imbere ubukungu bushingiye ku bumenyi no guhanga udushya.

Uretse kuba kwandikisha igihangano nk’umutungo bwite mu by’ubwenge biha nyiracyo uburenganzira busesuye ko ari icye ari nawe kizanira inyungu, binamwongerera uburenganzira bw’uko nta wundi wakibyaza inyungu kitaramuvunnye, yanabikora bikamworohera kumukurikirana mu rwego rw’amategeko.

Umwanditsi mukuru muri RDB, Kayibanda Richard, yavuze ko ubwo bukangurambaga ari igikorwa kizamara icyumweru, kigizwe n’amatsinda abiri azakorerwamo ibintu bitandukanye bigamije gukangurira abantu kwandikisha umutungo bwite mu by’ubwenge wabo.

Abayobozi b’ibigo bikora ku bushakashatsi n’iterambere, aba Kaminuza n’ibindi bigo byigisha, bazerekwa uko bishobora kugira uruhare mu guhanga udushya kandi bikatwandikisha nk’umutungo wabyo.

Kayibanda ati “Bazaba baganira ku kamaro k’umutungo bwite mu by’ubwenge mu bushakashatsi no kugira politike zijyanye nawo muri ibyo bigo.”

Hazabaho kandi igihe cyo kuganira n’abikorera bafite ibigo bito n’ibiciriritse ku ruhare rw’umutungo bwite mu by’ubwenge mu bikorwa byabo bya buri munsi.

Ati “Kuko ni ibigo usanga bikora ubushakashatsi, bigira ibihangano. Ni ngombwa ko bamenya uruhare kuwurengera bigira mu kubasha guhangana ku masoko.”

Ubu bukangurambaga buri kubera mu bihugu bitanu muri Afurika birimo u Rwanda.

Umuyobozi uhagarariye u Rwanda muri WIPO, Rugomboka Emmanuel, yavuze ko ibyo bigo bigiye kwibandwaho ari bimwe mu bikora ubushakatsi bukwiriye kubyazwa umusaruro.

Ati “Turashaka ko ubwo bushakashatsi buva muri za laboratwari bukabyazwa umusaruro, Turareba niba ibihangano byabo birinzwe.”

Umuyobozi w’ishuri ritanga amasomo mu gukora filime mu buryo bw’umwuga rikanazikora rya IBTC, Uwizeyimana Jilly Claude, yavuze ko kwandikisha igihangano bituma nta muntu wakivogera ngo akigutware cyangwa ngo akibyaze inyungu.

Ati “Nakangurira abantu bose bahanga kugana RDB ikabandikaho ndetse ikabarindira umutungo wabo.”

RDB igaragaza ko nubwo kwandikisha umutungo bwite mu by’ubwenge bifite akamaro gakomeye, mu Rwanda abantu benshi batitabira kuwandikisha uko bikwiye.

Ubwo hizihizwaga umunsi w’umutungo bwite mu by’ubwenge, RDB yagaragaje ko abantu bawandikisha mu Rwanda bavuye kuri 499 mu 2010 bakagera ku 1253 mu 2018.

Umuyobozi Mukuru wungirije wa RDB, Emmanuel Hategeka, yavuze ko u Rwanda ruzi akamaro kwandikisha umutungo bwite mu by’ubwenge bifite ku iterambere ry’umuturage n’iry’ubukungu
Umwanditse mukuru muri RDB, Kayibanda Richard, yavuze ko ubwo bukangurambaga ari igikorwa kizamara icyumweru
Umuyobozi uhagarariye u Rwanda muri WIPO, Rugomboka Emmanuel, yavuze ko ibyo bigo bigiye kwibandwaho ari bimwe mu bikora ubushakatsi bukwiriye kubyazwa umusaruro.
Ibigo by’amashuri n’abikorera bigiye gusobanurirwa byihariye akamaro ko kurengera umutungo bwite mu by’ubwenge

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza