Hashobora gushyirwaho uburyo bushya bw’ibihano busimbura gufungira muri gereza

Yanditswe na Philbert Girinema
Kuya 25 Ugushyingo 2016 saa 08:07
Yasuwe :
0 0

Ubushinjacyaha bw’u Rwanda butangaza ko ibyaha birushaho kwiyongera uko umwaka utaha bugendeye ku kuba mu 2011 bwarasanze amadosiye yinjiye mu Bushinjacyaha ari 23344, muri 2012 aba 25898, mu 2013 ariyongera agera kuri 28755 naho mu mwaka wa 2014 aba 28268.

Kwiyongera kw’ibyaha bisobanura mu buryo butaziguye kwiyongera kw’abafungirwa mu magereza ndetse n’ibibagendaho bikarushaho kwiyongera dore ko abakoze ibyaha 92.5% babihamijwe.

Kuri uyu wa kane tariki ya 24 Ugushyingo 2016, Ubushinjacyaha bukuru bw’u Rwanda bufatanyija na Polisi bashyize hanze ubushakashatsi bugaragaza igituma ibyaha byiyongera, imbogamizi ababikumira bahura nabyo n’icyakorwa kugira ngo ibyaha bigabanuke.

Mu byagaragajwe harimo ibiyobyabwenge, amakimbirane ] mu ngo, amatsiko y’abana bakiri bato ku mikorere y’umubiri wabo atuma bafata bagenzi babo ku ngufu n’ibindi.

Muri ubu bushakashatsi, Ubushinjacyaha bwa bwatangaje ko hagiye kwigwa ku buryo hashyirwaho ubundi buryo bwo kugorora abantu bakoze ibyaha butari ukabishya muri gereza.

Mu kiganiro Umushinjacyaha Mukuru wa Repubulika, Richard Muhumuza , yahaye IGIHE nyuma y’imurikwa ry’ubushakashatsi, yavuze ko nubwo bisabwa kuzabanza kwigwaho ariko ubwo uburyo bushobora kuzagabanya ibibagendaho no guhindura imyumvire y’abibwira ko gukora icyaha bingana no kujya muri gereza.

Yagize ati “ Gufungwa ntabwo tuvuga ko bizahagarara ariko dushyigikiye ko hashobora kubaho n’ubundi buryo bwo guhana, butari igifungo gusa. Byafasha ko amagereza yareka kuzurirana kuko umuntu wese ukoze icyaha ajyanwa muri gereza, abariyo batangwaho byinshi kandi batinjiza, hari icyo byafasha n’uwakoze icyaha byamufasha kwisubiraho, ni ibintu bigomba kuganirwaho, bisaba guhindura amategeko ngira ngo mu minsi iri imbere bishobora kuzagerwaho.”

Uburyo bwavuzwe na Muhumuza bukubiye mu bintu byashyizwe hamwe mu bushakashatsi bwari bufite gushaka icyakorwa ngo ibyaha bigabanuke nk’imwe mu mpamvu yabwo.

Byanagarutsweho na Wibabara Charity umwe mu bakoze ubwo bushakashatsi akaba n’Umushinjacyaha ku rwego rw’igihugu, wavuze ko babivuzeho mu bushakashatsi nyuma yo kubona ko ibyaha byiyongera n’ababikora bakoherezwa muri gereza.

Ati “ Twe twasanze abantu nibakomeza gukora ibyaha tukabohereza mu magereza, yazuzura kandi itegeko riteganya n’ibindi bihano. Twavuga nk’ihazabu, hari n’uburyo umucamanza ashobora guhuza uwakoze icyaha n’uwagikorewe hatabayeho gufungwa. Ibyo bigabanya amafaranga Leta yagatanze kuri uwo muntu kandi baba biyunze.”

Avuga ko atari ku byaha byose byafatwa bityo kuko ngo hari ibyaha bikomeye bigomba kugira ibihano byihariye. Asaba ko hagira ubundi buryo bushoboka bwakoreshwa kuko ngo gereza zishobora kuzura, abazirimo bagomba kugaburirwa, kuvuzwa n’ibindi.

Ibi bivuzwe mu gihe hasanzwe hariho uburyo bwo guha abahamijwe ibyaha imirimo nsimburagifungo ifitiye igihugu akamaro (TIG), ariko usanga akenshi ihabwa abantu bahamijwe ibyaha bya Jenoside yakorewe abatutsi.

Umushinjacyaha mukuru wa Repubulika y'u Rwanda, Richard Muhumuza
Wibabara Charity umwe mu bakoze ubu bushakashatsi
Gufungirwa muri gereza bishobora gusimbuzwa ubundi buryo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244