00:00:00 IGIHE NETWORK KN KINYARWANDA EN ENGLISH FR FRANCAIS

Harigwa uko hakumirwa igihombo gitezwa n’inganda zitunganya ibiryo by’amatungo bitujuje ubuziranenge

Yanditswe na Prudence Kwizera
Kuya 28 Ukwakira 2021 saa 09:44
Yasuwe :
0 0

Ikigo cy’Ubushakashatsi n’Iterambere mu by’Inganda mu Rwanda, NIRDA, cyateguye inyigisho ku banyenganda n’abandi bantu bakora akazi ko gutunyanga ibiryo by’amatungo hagamijwe gukumira igihombo gituruka ku kubitunganya bitujuje ubuziranenge.

Izo nyigisho zizamara iminsi itatu zatangiye gutangirwa ku Ishami ry’Ubushakashatsi n’Iterambere rya NIRDA mu Karere ka Huye ku wa Gatatu, tariki ya 27 Ukwakira 2021.

Bari kwigishwa porogaramu za mudasobwa zitandukanye zo kwifashisha havangwa intungamubiri z’ibiryo by’amatungo mu buryo buboneye.

Umuyobozi w’Ishami ry’Ubushakashatsi n’Iterambere muri NIRDA, Dr Kamana Olivier, yavuze ko amakosa akorwa mu kuvanga ibiryo by’amatungo atuma umusaruro atanga uba muke bigateza igihombo ba nyir’inganda n’aborozi b’amatungo.

Ati “Ugasanga intungamubiri ziri muri ibyo biryo zirahindagurika ku isoko, ugasanga uko ubisanze uyu munsi si ko bimeze ejo bigateza igihombo ku musaruro aborozi babona ndetse no ku ruganda ubwarwo.”

Yakomeje avuga ko nibakoresha ikoranabuhanga bazatunganya ibiryo byujuje ubuziranenge kandi bifite intungamubiri zidahinduka, bityo n’umusaruro uziyongere ku borozi bakoresha ibyo biryo by’amatungo.

Umworozi wo mu Karere ka Musanze akaba n’Umuyobozi wa Sosiyete yorora ikanatunganya ibiryo by’amatungo, Niyonzima Jean Bosco, yavuze ko bo akenshi bakoresha uburyo bwo kwandika ku rupapuro.

Ati “Tubivanga ku buryo busanzwe mbese ni imibare dukoresha kuko twagiye tubyiga kera mu ishuri. Tubanza gukora imibare dukoresheje ikaramu n’urupapuro dukurikije ibyo turi buvange tugakora imibare bikadutwara igihe kinini.”

Shirimpaka Jean Claude ushinzwe Ubucuruzi mu ruganda rutunganya ibiryo by’Amatungo, Huye Feeds, na we avuga ko rufite ubushobozi bwo gukora nibura toni 45 z’ibiryo by’ingurube, amafi n’inkoko buri munsi.

Yasobanuye ko mu kubivanga bakoresha porogaramu za mudasobwa bakura hanze ariko zihenze cyane.

Avuga ko amahugurwa yo gukoresha ikoranabuhanga rya porogaramu za mudasobwa azabafasha kongera ubumenyi bw’uko bari basanzwe bavanga ibiryo ndetse bizongera umusaruro mu bwiza no mu bwinshi bagashyira ku isoko ibiribwa byujuje ubuziranenge.

Kugeza ubu mu Rwanda habarurwa inganda, amakoperative n’abantu ku giti cyabo 50 bari mu kazi ko gukora ibiryo by’amatungo.

Kuri iyi nshuro hari guhugurwa inganda zirindwi kuko arizo ziri ku rwego rwiza rwo gukoresha ikoranabuhanga ritunganya ibiryo by’amatungo.

Porogaramu za mudasobwa bari kwigishwa bazajya bakoresha bavanga ibiryo by’amatungo zirimo Excel, Window User Friendly Feed Formulation, Win Feed ndetse na Dairy NLS 2001.

Umuyobozi w’Ishami ry’Ubushakashatsi n’Iterambere muri NIRDA, Dr Kamana Olivier, yavuze ko amakosa akorwa mu kuvanga ibiryo by’amatungo atuma umusaruro atanga uba muke bigateza igihombo ba nyir’inganda n’aborozi
Aborozi bibukijwe ko nibakoresha ikoranabuhanga bazatunganya ibiryo byujuje ubuziranenge kandi bifite intungamubiri zidahinduka, bityo n’umusaruro uziyongere
Bimwe mu biryo by'amatungo bitunganyirizwa mu Ruganda Huye Feeds
Hahuguwe inganda zirindwi kuko arizo ziri ku rwego rwiza rwo gukoresha ikoranabuhanga ritunganya ibiryo by’amatungo
Uruganda rutunganya ibiryo by’amatungo, Huye Feeds, rufite ubushobozi bwo gukora nibura toni 45 z’ibiryo by’ingurube buri munsi, ariko mu kubivanga bakoresha uburyo busanzwe

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .