Harigwa uburyo amasoko ya leta arimo akayabo yazajya agenzurwa byimbitse

Yanditswe na Ndayishimye Jean Claude
Kuya 1 Gicurasi 2018 saa 07:58
Yasuwe :
0 0

Urwego rw’Umuvunyi rwavuze ko hakwiye uburyo bwihariye bwo kugenzura amasoko ya leta aba arimo amafaranga menshi kugira ngo hanozwe imicungire yayo.

Mu nama nyunguranabitekerezo iheruka kubera muri Sena y’u Rwanda ku micungire y’umutungo wa leta, Umuvunyi Mukuru, Murekezi Anastase, yavuze ko hari uburyo bwatangiye kuganirwaho n’inzego zitandukanye bugamije kugenzura uko bikwiye amasoko ya leta.

Mu nama ngishwanama yo kurwanya ruswa n’akarengane baheruka gukora, Umuvunyi mukuru yavuze ko basanze mu masoko manini habamo ruswa bikagira ingaruka ku gihugu.

Yavuze ko basanga igihugu gishobora guhomba amafaranga menshi kubera ruswa haramutse hatabayeho ko abantu basangira inshingano yo kugenzura amasoko manini.

Mu kiganiro yagiranye na IGIHE, Murekezi yavuze ko ubusanzwe umushinga munini iyo ugiye gushakirwa isoko hari komite y’ishoramari igomba kuwigaho ikaba ari na yo yemera ko ukorwa, gusa ngo ntikora igenzura ry’uburyo ushyirwa mu bikorwa, bigakorwa gusa n’ikigo cyateguye iryo soko.

Yavuze ko hari kwigwa uburyo bwashyirwaho kugira ngo iyo komite yunganirwe kugira ngo iyo mishinga minini izakomeze gukurikiranwa uko ishyirwa mu bikorwa uko bikwiye.

Ubwo buryo bushya buri kwiga n’Urwego rushinze imitangire y’amasoko ya leta (RPPA), Polisi y’Igihugu, Urwego rw’Umuvunyi n’urw’Iperereza.

Murekezi yavuze ko bizeye ko ubwo buzakemura ibibazo bikunze kugaraga mu gucunga umutungo wa leta, cyane cyane mu masoko arimo za miliyari z’amafaranga y’u Rwanda.

Ubusanzwe isoko ryose ritegurirwa mu kigo, kigashaka ibyangombwa byose kugira ngo rizabeho; kigakurikiza amabwiriza ya RRPPA ariko ntibitume ibibazo byose biri mu isoko bibasha kugaragarira iki kigo, cyane ko kireba inzira ritangwamo gusa.

Yakomeje avuga ko icyo urwo rwego rukora ni ukureba ko amabwiriza n’amategeko mu mitangire y’amasoko bikorwa uko bikwiye ariko hakaba hari ibyo rudasobanukirwa bitewe n’imiterere y’isoko, aho usanga biba bisaba ubumenyi bwihariye.

Yifashishije urugero yagize Umuvunyi Mukuru yagize ati “Tuvuge nk’ibyerekeye umuhanda, ntabwo RPPA yakurikirana ibibazo by’abahanga mu bwubatsi bo mu Rwanda ngo byose babishobore; ntabwo bafite abahanga mu bwubatsi bacunga inyubako zose.”

Yasobanuye ko ibyo bituma haba ibibazo by’imicungire mibi mu ishyirwa mu bikorwa ry’ayo masoko Manini; byongeye ayo masoko y’amafaranga menshi bikaba binoroshye gutangamo ruswa.

Yagize ati “Niba ari isoko rya miliyari 20 Frw cyangwa 30 Frw ni amafaranga menshi cyane ku gihugu. Tugasanga hari ikibazo cyo kubona abayobozi b’ikigo kimwe bafata inshingano y’isoko ringana gutyo nta bundi buryo bwo kugenzura bwakozwe.”

Muri raporo ngarukamwaka z’Umugenzuzi Mukuru w’Imari ya Leta, zikunze kugaragaza ko muri rusange mu bigo 13 byihariye 60% by’ingengo y’imari hakunze kugaragaramo ibibazo byo kutabyaza umusaruro amafaranga yakoreshejwe bitewe no kudacunga neza amasezerano, ukwiyongera kw’imitungo idakoreshwa, isesagura, ikoreshwa ry’amafaranga nta burenganzira, nta nyandiko ziyasobanura hamwe n’inyerezwa ry’umutungo.

Gucunga nabi no kurigisa umutungo wa leta, Umuvunyi Mukuru avuga ko usanga ari ugushaka gukira vuba ku buryo bitumvikana kandi umuntu yagombye gukira kubera ko yakoze.

Yagize ati “Ni ikibazo cy’ubuhemu, ni ikibazo cy’ubusambo, ni ikibazo cy’umuco wo gusahura kandi twagombaga kugira umuco w’ubunyangamugayo.”

Muri raporo y’Umugenzizo w’Imari ya Leta ya 2016-2017 hagaragajwe ko ibigo 13 bya Leta byahombeje umutungo wa miliyari hafi umunani z’amafaranga y u Rwanda.

Ubwo yakiraga indahiro z’abagize Guverinoma muri Kanama 2017, Umukuru w’Igihugu yavuze ko ubudasa bw’u Rwanda bukwiye kugaragarira mu mikorere y’abarutuye no mu gushakira ibisubizo ibibazo byihariye rufite, birimo kunyereza ibya rubanda.

Umuvunyi Mukuru, Murekezi Anastase yabwiye abasenateri ko hari kwigwa uburyo amasoko ya leta arimo akayabo yazajya agenzurwa byimbitse

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza