Kwamamaza

Harifuzwa amakoperative yafasha abo mu byaro kugezwaho amashanyarazi

Yanditswe kuya 26-08-2016 saa 16:53' na Ezechiel Mbananabo


Inyigo yakozwe n’Ihuriro ry’Abikorera mu bijyanye n’ingufu z’amashanyarazi (Energy Private Developers), yagaragaje ko abaturage benshi bo mu bice by’icyaro mu Rwanda banyotewe no kwibumbira mu makoperative kugira ngo bagezweho umuriro w’amashanyarazi babigizemo uruhare.

Iyi nyigo yakorewe mu turere turindwi turimo Burera na Gakenke mu Ntara y’Amajyaruguru, Gatsibo na Kirehe mu Ntara y’Iburasirazuba, Gisagara mu Ntara y’Amajyepfo na Nyamasheke na Rutsiro mu Ntara y’Iburengerazuba.

Yakozwe hagati ya tariki ya 1 Kemena 2016 kugera tariki ya 5 Kanama 2016, igamije kumenya icyo abaturage batekereze kubijyanye no kwishyira hamwe bagatanga umusanzu mu bushobozi bafite kugira ngo bagezweho umuriro w’amashyanyarazi.

Mu baturage 193 bahagarariye abandi bakoreweho iyi nyigo, 100% bavuze ko basanga abaturage biteguye gushyigikira amakoperative yabafasha koroherwa no kugezwaho amashanyarazi.

Ubwo hamurikwaga ibyavuye muri iyi nyigo kuri uyu wa Gatanu, Dr Ivan Twagirashema uyobora Energy Private Developers, yavuze ko ibijyanye n’amakoperative mu gihugu atari bishya,uretse ko mu bijyanye n’ingufu ari cyo cyaba ari gishya mu Rwanda, mu gihe no mu bindi bihugu bitandukanye bikorwa.

Yagize ati“ Niba bishoboka mu buhinzi n’ahandi, biranashoboka kugira ngo abantu bishyire hamwe bagezeho amashanyarazi. Kera byari bigoye bisaba amapironi n’imiyoboro ihenze ariko ubu ushobora gukora urugomero rutoya niba hari umugezi hafi aho, gutwika ibishingwe biva mu mudugudu bikavamo amashanyarazi, gukoresha nyiramugengeri n’amakara.”

Yakomeje agira ati “ Iterambere mu ikoranabuhanga niryo dushingiraho tuvuga ko ibyo bishoboka, aho mu mudugudu w’amazu 60 cyangwa 100 abantu bashobora kwishyira hamwe bakagira urugomero rwabo ku buryo n’abarukoraho baba ari abo muri ako gace.”

Leta y’u Rwanda yihaye intego y’uko 70% by’Abanyarwanda baba bafite umuriro w’amashanyarazi mu 2018 izagerwaho,muri 2020 bakaba bageze ku 100%, bavuye kuri 24.3 bariho kuri ubu.

Uyu muyobozi avuga ko izo koperative zigiyeho zafasha mu kugera kuri gahunda igihugu cyihaye kuko biteganyijwe ko nibura muri buri koperative haba harimo amazu 100 bikorohera umushoramari kubageraho, aho kugira ngo abonane na buri muntu.

Ati “Ibi byakorohera abashoramari bakora mu by’ingufu kuko bavugana na koperative aho kuvugana na buri muntu ku giti, ndetse na Leta kuko birongera umuvuduko w’abantu bahabwa umuriro w’amashanyarazi.”

Ndayisaba Edouard, Umuyobozi wungirije wa Energy Private Developers,yavuze ko muri iyi gahunda, yagaragaje ko ngo ahantu hose hari imigezi yakorwaho ingomero hashobora kuboneka uruganda rutanga amashanyarazi.

Kuri we ngo icyo abaturage bakora ni ukwishyira hamwe bakagira umugabane runaka ubundi umushoramari akabagezaho uruganda, kandi ngo abo baganiriye bagaragaje ko banyotewe n’igihe iyo gahunda yatangirira.

Icyakora ngo igihe aya makoperative yashyirirwaho ntikiramenyekana kuko bigomba kuganirwaho na Leta ndetse n’abandi bafatanyabikorwa.

Mu kwezi gushize, Ikigo cy’igihugu gishinzwe ingufu z’amashayarazi REG, cyavugaga ko gifite abafatabuguzi ibihumbi 600, intego ikaba aruko mu 2018, 48% bazaba bafite umuriro w’amashanyarazi ukomoka ku ngomero zisanzwe mu gihe abandi 22% bazakoresha ubundi buryo bubyara ingufu.

Mu myaka ibiri ishize,REG yabashije kubona ingufu z’amashanyarazi zigera kuri megawatt 89.5, byatumye ingufu zose zihari zigera kuri megawatts 190.

Leta ifite gahunda yo gukora imishinga izatanga megawatts 563 mu myaka ibiri iri mbere.

Abitabiriye igikorwa cyo gushyira ahagaragara inyigo yakozwe ku buryo abaturage bumva uburyo bwo kugezwaho amashyanyarazi
Dr Ivan Twagirashema uyobora Energy Private Developers
Ndayisaba Edouard, Umuyobozi wungirije wa Energy Private Developers

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 28 September 2016
Copyright © 2009 -2014 - IGIHE Ltd - All Rights Reserved