00:00:00 IGIHE NETWORK KN KINYARWANDA EN ENGLISH FR FRANCAIS

Hari igihugu mu kindi- Sgt. Mukarubogo asobanura iby’urugo rw’Inkotanyi mu rugamba rwo kubohora igihugu

Yanditswe na IGIHE
Kuya 2 Ukwakira 2021 saa 02:48
Yasuwe :
0 0

Si benshi babasha kwiyumvisha ukuntu ingabo nke za FPR Inkotanyi zabashije kubohora igihugu cyose cyari cyaramunzwe n’ivangura ariko gifite abasirikare benshi n’ubushobozi buruta ubwazo. Gusa, ubuzima n’ibyavugirwaga mu rugo Inkotanyi zabagamo ku ‘Mulindi w’Intwari’ ni ryo pfundo.

Usuye uru rugo abona neza ukuntu Inkotanyi ‘zabaga zarateguye’ umugani w’imvugo z’ubu, ku buryo kuba zaratsinze urugamba zigakura igihugu mu menyo ya rubamba bitatunguranye cyane.

Sergeant Mukarubogo Julienne ni umwe mu bari abasirikare ba RPA, ubu ashinzwe umutekano ku Ngoro y’Amateka yo ku Mulindi w’Intwari iherereye mu Majyaruguru y’u Rwanda mu Karere ka Gicumbi, Umurenge wa Kaniga, Akagari ka Mulindi.

Uyu mubyeyi w’abana babiri wamaze imyaka irindwi mu ngabo zabohoye igihugu, yatembereje IGIHE muri iyi ngoro y’Amateka, ahabaga Perezida Paul Kagame wari uyoboye urugamba rwo kubohora igihugu, ndetse n’abandi banyapolitiki n’abasirikare bakuru.

Uru rugo Inkotanyi zarubayemo hagati ya 1990 na 1994 ubwo zatangiraga urugamba rwo kubohora igihugu kugeza zirutsinze ndetse zikanahagarika Jenoside yakorewe Abatutsi, ubu ni igicumbi kibumbatiye amateka yo kubohora u Rwanda.

Mukarubogo yerekana inzu zitandukanye zigize iyi ngoro y’Amateka ikiri gutunganywa, anasobanura ibyakorerwagamo ku buryo bigaragara ko buri kintu cyari ku murongo.

Iya mbere ni iyagabamo Perezida Kagame, ahakirirwaga abashyitsi batandukanye babaga bagiye gusura Inkotanyi cyangwa se bafite ibintu runaka bagiyemo, aho babanzaga kubazwa ibibagenza mbere yo kugira aho boherezwa.

Ku Mulindi w’Intwari kandi habaga ibibuga Inkotanyi zakiniragamo mu buryo bwo kwidagadura, yaba umupira w’intoki wa Basketball na Volleyball ndetse n’uw’amaguru.

Aha hanabereye umukino wamenyekanye cyane wahuje urubyiruko rwa FPR n’urw’Abakombozi baturukaga mu ishyaka rya PSD. Umukino warangiye FPR itsinze Abakombozi ibitego 2-0 mu mupira w’amaguru, na bo babatsinda amaseti 3-0 muri Volleyball.

Arusha, women’s wing,.. zimwe mu nzu zari muri uru rugo

Iyo uhagaze ku kibuga cya Volleyball na Basketball uba witegeye inzu nyinshi zakorerwagamo ibintu bitandukanye, harimo iyaberagamo inama, iyo ababyinnyi n’abahanzi bataramiragamo ari ko banakusanya inkunga ubu ikoreramo uruganda rw’icyayi ndetse n’umunara wa Radio Muhabura uba uwureba hakurya.

Mukarubogo akomeza yerekana izindi nzu ziri ku Mulindi w’Intwari zirimo aho bitaga Arusha, aho abanyapolitiki bateguriraga amasezerano ya Arusha n’inzu yitwaga women’s wing yabagamo abakobwa n’abagore b’abanyapolitiki n’abasirikare.

Mukarubogo avuga ko iyo nzu ya Arusha ari yo yaberagamo ibiganiro byose bijyanye n’amasezerano y’amahoro yaberega i Arusha muri Tanzania.

Ingoro y’Amateka yo ku Mulindi w’Intwari iracyavugururwa ngo izajye isurwa na ba mukerarugendo, ariko ibice byinshi byararangiye, aho irimo n’indake ebyiri Perezida Paul Kagame yakoreshaga mu gutanga amabwiriza, ikaba n’ubwihisho igihe yari ayoboye urugamba rwo kubohora igihugu.

Nimara kuzura yose biteganyijwe ko izajya yakira ba mukerarugendo bari hagati y’ibihumbi 120 na 50 ku mwaka.

Aka gace Inkotanyi zakamazemo imyaka igera kuri ine
Muri aka gace niho hari Ingoro Ndangamateka y'Urugamba rwo kubohora igihugu
Sergeant Mukarubogo Julienne ni umwe mu bari abasirikare ba RPA, ubu ashinzwe umutekano ku Ngoro y’Amateka yo ku Mulindi w’Intwari
Sergeant Mukarubogo Julienne aganira n'umunyamakuru wa IGIHE
Sgt. Mukarubogoaganira n'Umunyamakuru wa IGIHE imbere y'aho abanyepolitiki bakoreraga hitwaga Arusha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .