Hari abazongera kutubwira ko baheruka kutubona badutora?- Depite Mukabalisa

Yanditswe na Ishimwe Israel
Kuya 4 Ukwakira 2016 saa 07:17
Yasuwe : XX
0

Imvugo isa n’iyamaze kwamamara muri bamwe mu baturage bavuga ko intumwa za rubanda bazibona zije kubasaba amajwi, zamara kwicara mu myanya zatorewe ntizibegere, bakongera kuzica iryera zisubiye mu bikorwa byo kongera kwiyamamaza.

Abadepite kimwe n’abandi bayobozi barimo abo mu nzego z’ibanze bakunze kumva ibibavugwaho, ndetse hagafatwa ingamba zo kubikemura.

Mu minsi yashize, Minisitiri w’Ubutegetsi bw’Igihugu, Francis Kaboneka yasabye abayobozi kwegera abaturage bakabakemurira ibibazo.

Perezida w’Inteko Ishinga Amategeko, Umutwe w’Abadepite, Donatille Mukabalisa aherutse gutangaza ko bamaze igihe basanga abaturage aho batuye ku buryo ushaka kuvuga ko batakibegera bigoye ko yabona aho ahera.

Ubwo yari mu muganda udasanzwe watangizaga icyumweru cy’ubumwe n’ubwiyunge mu Rwanda, ku wa Gatandatu tariki ya 1 Ukwakira 2016, mu Murenge wa Nyamirambo, Depite Mukabalisa yagarutse ku cyavanaho iyo mvugo y’abaturage.

Yagize ati “Ngira ngo abajyaga bavuga ngo baheruka badutora bakongera kutubona tuje kongera kubasaba amajwi, ubu se bazongera kutubwira ngo baheruka badutora ra! Oya natwe twihaye umuhigo wo kugira ngo tubegere tuganire namwe twumve ibitekerezo byanyu, twumve niba hari n’ibibazo mufite muri izo gahunda zose zigamije iterambere.”

Yakomeje atangaza ko gahunda yo kwegera abaturage yakozwe mu gihugu hose mu ngendo zatangiye muri Gicurasi.

Ati “Abadepite bose uko ari 80 bamaze iminsi hirya no hino mu gihugu begera Abanyarwanda batugiriye icyizere bakadutora. Bazengurutse utugari twose tw’igihugu guhera muri Gicurasi, twahereye Iburengerazuba n’Amajyepfo, nyuma tujya Iburasirazuba n’Amajyaruguru. Ubu rero tukaba turimo gusoreza mu Mujyi wa Kigali, ubu nta kagari na kamwe ko mu gihugu tutagezemo.”

Icyari kigamijwe muri urwo rugendo kwari ukuganira n’abaturage nk’ababahagarariye bahereye ku nshingano inteko ifite yo gutora amategeko yo kumenya no kugenzura ibikorwa bya Guverinoma, kugira ngo barebere hamwe uko za gahunda ziba zigamije kuvana Abanyarwanda mu bukene n’amategeko niba zishyirwa mu bikorwa.

Depite Mukabalisa yongeye kwibutsa abaturage ko bakora mu nyungu zabo.

Ati “Nagira ngo mbabwire ko kuvuga ngo turabahagarariye, ibyo tuba dukora byose tuba tubikora mu izina ryanyu. Itegeko dutora, tuba turitoye mu izina ry’Abanyarwanda bose barenga miliyoni 11, ni ngombwa rero ko tubegera.”

Muri izo ngendo ngo bakiriye ibibazo bitandukanye by’abaturage bafatanyiriza hamwe n’ubuyobozi kubikemura, ibidashoboye gukemuka basaba ubuyobozi kubikemura, bakamenyesha abadepite uko babikemuye mu gihe ntarengwa baba bahawe.

Ikibazo cy’abana bata ishuri nicyo basanze henshi mu ho basuye, bagaya ababyeyi batagira uruhare mu gufasha abana babo kwiga kandi ari ubuntu, abibutsa ko baba bica n’Itegeko Nshinga.

Ati “Itegeko Nshinga rigena ko buri Munyarwanda wese afite uburenganzira ku burezi kandi kwiga amashuri abanza ni itegeko. Umubyeyi wese utajyanye umwana ku ishuri aba yishe Itegeko Nshinga, ubwo murumva ukuntu biremereye?”

Mu murenge wa Nyamirambo basanze ikibazo gikomeye cyugarije urubyiruko ari icy’ibiyobyabwenge basaba abayobozi kugihagurukira.

Depite Mukabalisa Donatille yatangaje ko ikibazo cyo kwegera abaturage cyamaze kuvugutirwa umuti urambye
Depite Mukabalisa Donatille(ibumoso), Musenyeri Rucyahana John na Meya w'Umujyi wa Kigali, Mukaruliza Monique mu muganda rusange

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza