Kwamamaza

Hari abasirikare ba Canada bakivurwa ihungabana bakuye mu Rwanda mu 1994

Yanditswe kuya 6-09-2016 saa 09:14' na IGIHE


Impuguke mu bijyanye n’imitekerereze ya muntu, zigaragaza ko abasirikare bajya mu butumwa bw’amahoro bakenera ubumenyi bwihariye mu guhangana n’ibibazo, kurusha uko bagira ubuhanga n’ubumenyi mu kurwanisha imbunda n’izindintwaro batojwe.

Abasirikare ba Canada boherejwe mu Rwanda mu butumwa bw’Umuryango w’Abibumbye bwo kugarura amahoro mu 1994, MINUAR, ngo ntibigeze bahabwa ubwo bumenyi, ku buryo ingaruka zabyo zicyigaragaza na nyuma y’imyaka 22 Jenoside irangiye.

Umwe mu basirikare bari mu Rwanda, Jean-Yves St-Denis wari ufite ipeti rya kapiteni, yavuze ko agihura n’ingaruka z’ibyo yabonye kandi ntanagire icyo abikoraho, ubwo imbaga y’Abanyarwanda yicwaga muri Jenoside yakorewe Abatutsi mu 1994.

Mu kiganiro na CBC, St-Denis wari ushinzwe ibikoresho yagize ati "Ni ibintu bikomeza mu gihe kirekire n’iyo wasubiye mu buzima busanzwe.”

Ibi babizamuye mu gihe Guverinoma ya Canada yatangaje ko igiye kohereza abasirikare 600 n’abapolisi bagera ku 150 mu bikorwa byo kugarura amahoro mu minsi iri imbere.

Ntabwo hatangajwe ibihugu bazerekezamo, gusa ngo bishobora kuha hagati ya Sudani y’Epfo, Repubulika Iharanira Demokarasi ya Congo, Mali cyangwa Repubulika ya Centrafrique.

St-Denis avuga ko mbere yo koherezwa mu Rwanda muri Mata 1994 batigeze bategurwa mu mutwe, yisanga abona Jenoside n’amaso ye na n’ubu ikimugaruka mu mutwe, kugeza ubwo mu 1997 yatangiye kuvurwa ingaruka zituruka ku ihungabana, Post-traumatic stress disorder, PTSD.

Ati “Abasirikare bagomba gutegurwa bakongera bagategurwa babifashijwemo n’abahanga mu mitekerereze mbere y’uko bagenda, kugira ngo babashe gukomera mu bihe bitoroshye.’’

Ishami rishinzwe abahoze mu gisirikare muri Canada rivuga ko umubare w’abavurwa ihungabana usa n’uwikubye gatatu mu myaka umunani ishize.

Mu 2007 abagera ku 5,548 bahoze mu ngabo bavurwaga PTSD, nk’uko bigaragara muri raporo iheruka gushyikirizwa Inteko Ishinga Amategeko ya Canada. Uyu mubare waje kwiyongera kuko muri Werurwe 2015 abari bari gukurikiranwa bageze ku 14,375.

Iyi ndwara ngo ishobora kwibasira benshi mu gihe hari ibyo bumva bashobora gukora, ariko hakaba impamvu zituma bidakorwa nk’uko byagenze mu Rwanda, bigatuma batangira kumva ko ntacyo bamaze.

St-Denis yakomeje agira ati “Twumvaga ko ntacyo twashoboye gufasha, tukibaza icyo twakora turamutse duhuye n’ikintu gisaba imbaraga nyinshi ngo gikemurwe. Abasirikare bakaba bashaka gutanga ubufasha, gukora ibyiza bishoboka, ariko iyo bibaye ko bazitirwa cyangwa babuzwa kugira icyo bakora, ni ibintu bigoye kwakira iyo urangije ubutumwa,’’

Umuyobozi ushinzwe ubuvuzi mu bitaro bivura ihungabana muri Canada, Ottawa Anxiety and Trauma Clinic, Dr. Ken Welburn, yavuze ko ubutumwa bw’amahoro bushobora guteza ihungabana ku basirikare bafite imyitozo n’ibikoresho bibashoboza kugira icyo bakora ariko ntibishoboke.

Ati "Niba hari impamvu zitakwemerera kugira icyo ukora kandi ugasabwa kuguma aho ngaho ubirebera biri kuba, uba ufite ibyago byinshi by’ihungabana.’’

Welburn yavuze ko hari abasirikare bashobora guhungabana muri ubwo buryo, ariko ngo yizera ko nibura mu myaka 15 ishize igisirikare kimaze kubona neza ko ari ingenzi gutegura abasirikare mu mutwe bakabasha kwakira mu ntekerezo ibyo bahura nabyo.

Ubusanzwe ingabo zigiye koherezwa mu butumwa bw’amahoro zihabwa amahugurwa azitegura mu mutwe, azwi nka “Road To Mental Readiness.” Welburn avuga ko ayo mahugurwa aba agizwe n’ibiganiro n’abantu banyuze mu bihe nk’ibyo mu butumwa butandukanye, ingaruka byabagizeho n’uburyo babyitwayemo.

Undi musirikare, Major Brent Beardsley, wari mu butumwa hamwe na General Romeo Dallaire bombi basezerewe mu ngabo, aheruka gutangaza ko ibibazo by’imitekerereze byamuziye mu 2000, nyuma y’imyaka itandatu avuye mu Rwanda.

Ibibazo bye byasembuwe n’amahugurwa yari ari gutanga nyamara we atarigeze ayahabwa ubwo yari agiye kuza mu Rwanda, biramugora ku byakira, atangira kugira ikibazo byo kutita ku bintu, n’ibyiyumviro bye bigahinduka cyane.

Ati “Rimwe na rimwe narabyukaga nkananirwa no kwambara inkweto, nkicara hasi ngo nzambare ariko bikananira.’’

Bamwe mu basirikare bari mu Rwanda mu bikorwa byo kubungabunga amahoro

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 30 Nzeri 2016
Copyright © 2009 -2014 - IGIHE Ltd - All Rights Reserved