Hari abacyumva ko umugoroba w’ababyeyi ari umwihariko w’abagore gusa

Yanditswe na David Eugène Marshall
Kuya 19 Nzeri 2018 saa 11:20
Yasuwe :
0 0

Minisiteri y’uburinganire n’iterambere ry’umuryango (Migeprof), ivuga ko hari abacyumva ko gahunda y’umugoroba w’ababyeyi ari iy’abagore gusa nta mugabo wayijyamo, igasaba ko iyi myumvire yahinduka kugira ngi ihame ry’uburinganire rigerweho neza.

Umugoroba w’Ababyeyi ni igitekerezo cyavutse mu mwaka 2010, watangiye ari ‘Akagoroba k’abagore’ kabafashaga kuganira ku bibazo bahura nabyo no kubikemura.

Kubera akamaro kagaragaje hafashwe icyemezo ko waba ‘Umugoroba w’Ababyeyi’ maze ugahuza ababyeyi bombi, abagore n’abagabo. Mu 2013 nibwo watangijwe na Madamu Jeannette Kagame.

Mu nama yahuje abafatanyabikorwa b’umuryango uharanira ihame ry’uburinganire hagati y’abagabo n’abagore (RWAMREC) kuri uyu wa Gatatu, hagaragajwe ko hari abagabo batarumva akamaro k’umugoroba w’ababyeyi.

Umukozi ushinzwe uburinganire muri Migeprof, Nkundimfura Rosette, yavuze ko abagabo bose bitabiriye umugoroba w’ababyeyi byaba akarusho mu kugaragaza uruhare rwabo mu kwimakaza ihame ry’uburinganire.

Ati “Umugoroba w’ababyeyi ni ihuriro ryiza ry’abagize umuryango nyarwanda, ariko bamwe bakawita umugoroba w’abagore gusa. Tugize Imana abagabo bakumva inshingano zabo mu mugoroba w’ababyeyi ibibazo biwuganirirwamo byagabanuka.”

Avuga ko mu Rwanda amategeko n’imigambi ya Leta ku mahame y’uburinganire bikoze neza, ariko ngo kubishyira mu bikorwa ari ho hari ikibazo.

Nkundimfura asanga hakwiye gushyirwa imbaraga mu guhindura imyumvire ya benshi harimo n’abagabo mu rwego rwo guhuza ubuzima bwa buri munsi n’uburinganire.

Umuyobozi w’umudugudu wa Rugunga, Akagari ka Kiyovu muri Nyarugenge, Gatarayiha Désire, avuga ko mu gukemura iki kibazo hari ubukangurambaga bukorerwa mu miganda ngarukakwezi ndetse no mu nama z’abaturage za buri wa kabiri.

Ati “Aho dutangiriye ubukangurambaga, ubwitabire bw’abagabo mu mugoroba w’ababyeyi butangiye kuzamuka, nubwo butarageza aho twifuza ariko ubukangurambaga burakomeje kandi buragenda neza”.

Umuturage witwa Nsinda Apollinaire, wo mu mudugudu w’Amasangano, Akagari ka Kabuye, Umurenge wa Jabana, avuga ko hari imyumvire ya bamwe mu bagabo yuko umugoroba w’ababyeyi utabareba, kandi ari umwanya mwiza wo gucoca ibibazo biba mu miryango.

Ati “Hari abagabo babanje kumva ko bitabareba ariko aho ubuyobozi bubihagurukiriye, iwacu turawitabira, cyane ko ikibazo cy’umuryango kizwe hari umugabo n’umugore bombi, gikemuka kitaruhanije.”

Hari kandi imyumvire ijyanye n’umuco ku mibereho y’umugore cyangwa umukobwa mu buzima bwa buri munsi, usanga igihabanye n’icyo amategeko avuga ndetse bituzuzanya.

Urugero rwatanzwe ni aho mu burezi, hari ahajya humvikana abarimu bigisha abakobwa umuco w’uko bizagenda igihe bazaba bamaze gushinga ingo zabo, abandi bakigisha abahungu kuzavamo abagabo badakozwa imwe mu mirimo izamura umuryango, kandi bombi ari magirirane.

Gusa ikigo gishinzwe uburezi mu Rwanda ,REB, kivuga ko hateguwe integanyanyigisho izafasha abarimu gusobanukirwa neza ibijyanye n’uburinganire, ndetse ko Minisiteri y’Uburezi yateganyije miliyoni 45.000.000 Frw zizifashishwa mu mahugurwa y’abarimu kuri iyi ngingo.

Abitabiriye inama basanga bagabo bakwiye kwitabira umugoroba w'ababyeyi
Umukozi ushinzwe uburinganire muri Migeprof, Nkundimfura Rosette avuga ko abagabo bakwiye kugaragaza uruhare rwabo mu kwimakaza uburinganire
Nsinda Apollinaire, wo mu mudugudu w’Amasangano, Akagari ka Kabuye, Umurenge wa Jabana, avuga ko abagabo bakwiye guhindura imyumvire yuko umugoroba w'ababyeyi utabareba

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza