Harategurwa ingamba zikarishye zishobora guca Suruduwili mu Rwanda

Yanditswe na Cyprien Niyomwungeri
Kuya 5 Gashyantare 2018 saa 11:44
Yasuwe :
0 0

Ikigo cy’igihugu gishinzwe imisoro n’amahoro (RRA), kiratangaza ko ku bufatanye n’izindi nzego za Leta harimo gutegurwa ingamba zikarishye zishobora kuzaca inzoga za Suruduwili mu Rwanda, zirimo gushyiraho imisoro n’ubugenzuzi bukomeye ku nganda n’abatumiza ibikorwamo izi nzoga bizwi nka ‘Spirit’.

Komiseri Mukuru wa RRA, Richard Tusabe, aherutse gutangaza ko ubusanzwe ingunguru za Spirit zije gukorwamo inzoga zitasoreshwaga mu rwego rwo guteza imbere inganda. Gusa ngo byagaragaye ko hari abatazijyana mu nganda ahubwo bakazijyana mu baturage bakazinywa bakurikiye ubukana bwazo.

Yagize ati “Ikibabaje kirimo ni uko haje kuvukamo icyuho aho ba bantu bazanye za sprit mu by’ukuri bamwe batazijyana mu nganda, ugasanga ahubwo bazijyanye no mu baturage ugasanga umuturage wenda afashe icupa ry’urwagwa agafata ya siprit uko yakabaye agasukamo ngo ayongeremo akantu k’ubukana, ugasanga abantu bamwe hari n’ababuze ubuzima bwabo kubera ibyo bintu.”

Akomeza avuga ko mu rwego rwo gukumira ibi bibazo, by’uko hari ababinywa hatasuzumwe ubuziranenge bigashyira ubuzima bwabo mu kaga, harimo kwigwa ingamba zirimo n’uko biriya bikorwamo inzoga ‘spirit’, byajya bisoreshwa.

Ati “Ese aho ntitwareba uko twazisoresha byaba na ngombwa tukagusubiza n’amafaranga ariko watugaragarije ibyo wazikozemo, tukirinda kuba wazijyana ahandi. Wazisoreye byakugora kugira ngo ujye kuziha abaturage bazinywe muri ubwo buryo.”

Komiseri Tusabe avuga ko harimo gutekerezwa n’uko ibikorwamo inzoga ‘spirit’ byajya bishyirwa mu bubiko ahantu runaka hanyuma inganda zikajya zigenerwa bitewe n’ibyo zigiye gukora, zikazanagaragaza ibyo zakoze mu byo zatwaye.

Yagize ati “Nubwo dushaka amafaranga y’imisoro ariko nanone ni ukuyashaka mu buryo budahutaza abantu, bashobora kuba batakaza ubuzima bwabo banyoye izo nzoga.”

Kugeza ubu izi ngamba zirimo kuganirwaho n’inzego zitandukanye zirimo; RRA, Minisiteri y’imari n’igenamigambi n’izindi bireba.

Ikibazo cya Suruduwili cyagarutsweho na Perezida w’Itorero ry’Igihugu, Edouard Bamporiki, mu nama y’Igihugu y’Umushyikirano iheruka, aho yavuze ko inyungu yose igihugu cyaba cyunguka muri iyi nzoga cyayihomba ariko ntikomeze kwica abaturage.

Yagize ati “Iyi nzoga ihendutse kurusha amazi, kurusha agakarito gato k’amata, nicyo kinyobwa kiri mu Rwanda kigura make, bishatse kuvuga ngo umwana wakizindukiyeho ntashobora gukora. Aka kantu kagura 200 ukanyoye ari kamwe gahita kamwica, ‘amafaranga twaba twinjiza yose urebye kuri izo mbaraga dutakaza ziba ziriwe zishwe na suruduwili ni yo menshi.”

Yongeyeho ko niba itanga inyungu nyinshi yazamurirwa igiciro igahenda, bityo uyinywa akaba yiriwe ku kazi akorera amafaranga yo kuyigura.

Komiseri Mukuru w'Ikigo cy'Imisoro n'Amahoro, Richard Tusabe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza