Kwamamaza

Hamenyekanye igiciro ku nzu 504 z’umushinga Vision City zagenewe abakire gusa

Yanditswe kuya 9-09-2016 saa 09:26' na Tombola Felicie


Mu rwego rwo gukemura ikibazo cy’amacumbi mu mujyi wa Kigali, Ikigo cy’Igihugu cy’Ubwiteganyirize [RSSB] gifite imishinga itandukanye yo kuzamura inyubako, zirimo iziciriritse 561 i Batsinda ndetse hari n’iz’abafite amikoro 504 zuzuye i Gacuriro zizatangira kugurishwa mu Gushyingo uyu mwaka.

Ibiciro ku nzu RSSB yujuje i Gacuriro mu murenge wa Kinyinya, Akarere ka Gasabo zagenewe abafite amikoro ahagije kuko inzu y’amafaranga make igura amadorali ibihumbi 179 ya Amerika ($179,000) ni ukuvuga hafi miliyoni 143 z’amanyarwanda, naho inzu ihenze ikagurwa ibihumbi 560 by’Amadorali ya Amerika ($560,000) akabakaba miliyoni 450 z’amafaranga y’u Rwanda.

Inzu 504 nizo zuzuye mu cyiciro cya mbere cy’umushinga Vision City zikaba zizatangira kugurishwa mu Ugushyingo uyu mwaka.

Umuyobozi mukuru wa Sosiyete ishinzwe gucunga ibijyanye n’uyu mushinga wa Vision City, UDL (Ultimate Developers LTD), Liliane Mupende Uwanziga
yatangaje ko imirimo yo kubaka yarangiye ndetse bari mu bikorwa bya nyuma.

Ati “Imirimo yo kubaka yararangiye, turi gukora isuku ya nyuma, gutera ibiti, gutunganya imbere y’inzu kuko imihanda nayo yararangiye. Turimo kandi gushyiramo imiyoboro ya internet kandi hamwe iyo mirongo irakora. Ni inzu nziza ariko ziratandukanye kuko harimo izihenze [Luxery Villas]. Hari n’amagorofa yo guturamo afite inzu zitandukanye, zaba izo hasi no hejuru.”

Mupende yakomeje asobanura ko izi nyubako zagenewe abifite. Ati "Izi nzu ni izagenewe abantu bafite umushahara uhanitse. Ntabwo dukodesha turagurisha ahubwo uguze akaba ariwe ushobora gukodesha. Kugeza ubu 20% bamaze kwemeza ko bazagurayo inzu kandi bamwe muri bo batangiye kwishyura.”

Hari nzu zifite ibyumba bine cyangwa bitanu n’iibindi byangombwa byose bikenewe nk’uruganiriro, uburiro, igikoni, igaraje gusa haba hari n’uburyo nyiraho ashobora kuyagura bitewe n’uburyo yubatsemo.

Igice cya mbere cyo kubaka izi nzu 504 kizarangira hakoreshejwe ingengo y’imari ya miliyoni ijana z’amadorali ya Amerika.

Mupende yagize ati “Igice cya mbere kizuzura hakoreshejwe miliyoni ijana z’amadorali ya Amerika, ariko turi kureba ukuntu hahita hakurikiraho ikindi gice cyo kubaka agace kagenewe ubucuruzi.”

Muri uwo mudugudu wa Vision City hari amatara ku mihanda, inzira z’abanyamaguru, ibikoresho byitabazwa igihe bahayeho inkongi, hari ahagenewe kuvangura imyanda, ibibuga by’imyidagaduro n’ibindi.

Mu kugura inzu, amafaranga ashobora kwishyurwa mu byiciro nyuma yo kubyumvikanaho, gusa ku ikubitiro ushaka kugura abanza kwishyura 30% by’igiciro cyose ku nzu yahisemo.

Mupende anavuga ko uyu mushinga unateganya kuhubaka hoteli y’inyenyeri eshatu n’ikigo cy’ubuvuzi kandi ku butaka buto.

Ati “Dushishikajwe cyane no kwita ku gukoresha neza ubutaka kuko abaturage bagenda biyongera Mujyi wa Kigali, niyo mpamvu twubaka dukurikije igishushanyo cy’imyubakire.”

Inyigo yakozwe muri 2012 n’Umujyi wa Kigali ku bufatanye na Minisiteri y’Ibikorwaremezo ndetse n’Umuryango w’Ubumwe bw’i Burayi yagaragaje ko mu myaka icumi iri imbere, Umujyi wa Kigali uzaba ukeneye inzu 35 000, ibyo rero nibyo bituma Leta ishishikariza abantu gushora imari mu bikorwaremezo mu gushakira umuti icyo kibazo.

Umushinga Vision City biteganyijwe ko uzatanga inzu 4500 ugabanyije mu byiciro bine.

Indi nkuru bifitanye isano: Hatangiye kubakwa amacumbi 561 agenewe ab’amikoro aciriritse

Imirimo yo gukora isuku irarimbanyije
Imihanda yerekeza muri uyu mudugudu ikoze neza
Izi nzu zagenewe abifite gusa
Izi nzu zizakemura ibibazo by'amacumbi adahagije mu Mujyi wa Kigali

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 2 Ukuboza 2016
Copyright © 2009 -2014 - IGIHE Ltd - All Rights Reserved