Hamaze kugaruzwa miliyoni 420 Frw mu arenga miliyari yanyerejwe mu Mirenge Sacco

Yanditswe na Evariste Nsengimana
Kuya 10 Nzeri 2018 saa 10:27
Yasuwe :
0 0

Ikigo cy’Igihugu gishinzwe guteza imbere amakoperative (RCA), cyatangaje ko kuva mu 2009, hamaze kunyerezwa miliyari 1.6 Frw muri Koperative zo kubitsa no kugurizanya ‘Imirenge Sacco’, muri zo miliyoni 420 Frw, zimaze kugaruzwa.

Mu kiganiro Kubaza bitera kumenya, cyatambutse kuri Radio Rwanda kuri iki Cyumweru, Umuyobozi wa RCA, Harerimana Jean Bosco, yavuze ko mu yagarujwe harimo miliyoni 370 Frw, zanyerejwe mu myaka ibiri ishize.

Harerimana yavuze ko hari intambwe ikomeye yatewe mu rwego rwo gukumira ko hari abanyereza n’abatorokana umutungo wa za koperative cyangwa ngo abanyamuryango biyuhe akuya ntibabone inyungu.

Yasobanuye ko bafatanyije n’Urwego rw’Ubugenzacyaha (RIB), hari amafaranga menshi yanyerejwe mu makoperative yagarujwe.

Ati “Hafi miliyoni 420 Frw zaragarutse. Twafashe abantu tubajyana kuri RIB, bajyanwa mu butabera, Imirenge Sacco irabatsinda barishyura”.

Uretse mu Mirenge Sacco, RCA yashyikirije RIB dosiye za miliyoni 205 Frw, zaburiye mu makoperative y’abamotari mu gihugu hose. Miliyoni 2.4 Frw zahise ziboneka zitanzwe n’ab’i Rubavu batinye ko bafatwa.

Nyuma y’ubugenzacyaha bwa RIB, miliyoni 12Frw zari zaranyerejwe n’abayobozi ba Koperative z’abamotari zahise zigaruzwa mu mezi abiri ashize gusa.

Harerimana yasobanuye ko hari indi dosiye RCA yahaye RIB y’arenga miliyoni 360Frw arimo izisaga 200Frw yanyerejwe muri Koperative y’ababazi b’i Rubavu n’ahandi, abazinyereje barimo gukurikirwanwa ndetse hari n’icyizere ko azagaruzwa.

Ati “Ubu inzego turi kuvugurura, turi kuzisobanurira ko uzacunga nabi cyangwa uzakinisha amafaranga ya koperative mu nyungo ze bwite azabiryozwa.”

Umunyamabanga Mukuru Wungirije wa RIB, Kalihangabo Isabelle, yasobanye ko mu byaha abayobozi b’amakoperative bakunze gukora harimo guhishira amakuru ku bitagenda neza no gutanga raporo zitujuje ubuziranenge.

Harimo kandi kunyereza umutungo, gukoresha izina rya Koperative mu nyungu z’umuntu ku giti cye gutanga ingwate ku mugabane wa Koperative, kudatumiza inama, guca ibice mu banyamuryango n’ibindi.

Kalihangabo avuga ko hari abanyereza amafaranga bagacika ariko ko bitarangira, bakomeza gushakishwa ndetse n’imitungo ya bo igafatirwa.

RIB ivuga ko muri aya mezi abiri ashize, yahaye ubushinjacyaha ibirego yakozeho iperereza by’abanyereje imitungo ya Koperative birimo abantu 10 bo mu Karere ka Muhanga, dosiye eshanu zo mu Kamonyi n’ahandi.

Hamaze kugaruzwa miliyoni zirenga 400 Frw zari zanyerejwe muri Koperative Umurenge Sacco hirya no hino mu gihugu

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza