Hagiye gutangizwa ikoranabuhanga rizifashishwa mu kugabanya abana n’ababyeyi bapfa mu gihe cyo kubyara

Yanditswe na Evariste Nsengimana
Kuya 2 Gicurasi 2018 saa 08:10
Yasuwe :
0 0

Nubwo imibare igaragaza ko umubare w’abana n’ababyeyi bapfa mu gihe cyo kubyara mu Rwanda igenda igabanuka, ishyirahamwe ry’ababyaza b’umwuga mu Rwanda (Rwanda Association of Midwives- RAM) rivuga ko hagikenewe izindi ngamba zihariye zo gukumira izo mpfu, by’umwihariko rigiye kumurika ikoranabuhanga rizafasha kuzigabanya.

Igenzura ryakozwe ku rwego rw’ubuzima bw’abaturage mu Rwanda mu 2015 (DHS), ryerekanye ko ababyeyi bapfa mu gihe cyo kubyara bavuye ku 720 ku bihumbi 100 bakagera kuri 210 ku bihumbi 100 mu 2015, impinja zigera kuri 20/1000 zivuye kuri 27/1000, abana bari munsi y’imyaka itanu bagera kuri 50/1000 bavuye kuri 76/1000.

Mu kiganiro ubuyobozi bwa RAM bwagiranye n’itangazamakuru kuri uyu wa 1 Gicurasi 2018, gitegura umunsi mpuzamahanga w’ababyaza uba buri wa 5 Gicirasi, bwatangaje ko u Rwanda rugifite byinshi byo gukora kugira ngo rugere ku ntego z’iterambere rirambye (SDGs).

Intego z’iterambere rirambye rigaragaza ko mu 2030, ababyeyi bapfa mu gihe cyo kubyara bazagabanuka bakagera kuri 70 ku bihumbi 100, abana bari munsi y’imyaka itanu bakagera kuri 25/1000, impinja zikagera kuri 12/1000.

Ubwo buryo bw’ikoranabuhanga RAM itegura ifatanyije n’ishami ry’Umuryango w’Abibumbye ryita ku Muryango, ni udukoresho ababyaza bazajya bifashisha babyaza, tuzaba turimo amakuru mu buryo bw’amashusho, amajwi, amafoto n’inyandiko bakaturebaho mu gihe bahuye n’ikibagora.

Umuyobozi wungirije umwanditsi wa RAM, umwarimu muri Kaminuza y’u Rwanda mu ishami ry’ubuvuzi, akaba n’ umubyaza w’umwuga, Mukankusi Juliette, yavuze ko ako gakoresho bazagaha amavuriro yose.

Ati “Ako gakoresho amavuriro azajya aba agafite hariho ibintu byose, amashusho, amafoto n’ibindi byose bashobora kureba bakabyiyigisha. Ntibizasaba ko tuba duhari, wenda umuntu yajyayo mu igenzura areba niba barabifashe cyangwa nta bibazo bafite ariko nibo bazajya babyikoresha. Turashaka gukoresha ikoranabuhanga ngo tugabanye impinja n’ababyeyi bapfa n’abamugara mu gihe cyo kubyara.”

Avuga ku bibangamiye umwuga w’ububyaza n’abawukorera mu Rwanda, Perezida w’iryo shyirahamwe, Murekezi Joséphine yagize ati “Imbogamizi zose ziva mu mateka, zihera muri ya myigire, amashuri adafite abarimu n’ibikoresho bihagije, ubushozi buke n’abanyamuryango badahagije mu ihuriro, ubuvugizi budahagije.”

Abahanga mu by’ubuzima bavuga ko mu gihe izo mbogamizi zidashakiwe umuti, bigira ingaruka ku ireme ry’ubuvuzi, bigatuma umubare w’abapfira n’abamugarira muri icyo gikorwa wiyongera.

Bagira inama kandi ababyeyi yo kurya indyo yuzuye mu gihe batwite, kwipimisha bakurikirana neza ubuzima bwabo n’ubw’abana mu gihe abaganga bagirwa inama yo gukurikirana no kugira inama ababyeyi, gukora kinyamwuga, kwihugura kugira ngo izo mpfu zibashe kugabanuka.

Mu Rwanda hose hari ababyaza bagera ku 1788, muri abo, abasaga 370 nibo biyandikishije mu ishyirahamwe ry’abanyamwuga ryashinzwe mu 2011, rikaba rimaze guhugura ababyaza 142 bafite ubushobozi bwo guhugura abandi nabo bahuguye abandi 400.

Uyu munsi mpuzamahanga ufite insanganyamatsiko igira iti “Ababyaza mu gufata iya mbere mu gutanga serivisi nziza”, uzizihirizwa mu Rwanda muri Hotel Marasa Umubano ku wa 4 Gicurasi no ku wa Gatandatu, aho ababyaza basaga 200 bazahabwa amahugurwa ajyanye n’umwuga, bakanamurikirwa bimwe mu byagaragajwe n’ubushakashatsi byerekana uko urwo rwego ruhagaze.

Perezida w'ishyirahamwe ry'ababyaza b'umwuga mu Rwanda, Murekezi Joséphine, mu kiganiro n'abanyamakuru
Umuyobozi wungirije umwanditsi wa RAM, umwarimu muri Kaminuza y’u Rwanda mu ishami ry’ubuvuzi, akaba n’ umubyaza w’umwuga, Mukankusi Juliette
Olive Basillette, ushinzwe amahugurwa ahoraho akaba n'umwarimu muri Kaminuza y'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza